Marik 3
3
Sama abom tche mogod’ina
(Gol Mat 12.9-14; Luc 6.6-11)
1Bugola, Jesus mi hulong kal kur gong nga toka hi Juif-fîd’a. Mi fe sama abom tche mogod’ina nga kua. 2Suma a nga kuana a so irazi atam ngolol á we na ni mba mi sud’um ini kur bur ma sabatna zu? Kayam azi nga hal lovota á vum ki zlad’a.
3Jesus mi de mi sama abom tche mogod’ina ala: Ang tchol akulo avok suma pet. 4Bugola, mi dazi ala: Gat meid’a ar lovota á le djivid’a kur bur ma sabatna, d’oze á le tchod’a zu? Á sut sana, d’oze á tchi sana zu? Wani azi seng silil.
5Mi pret tam mi golozi ki zlazi pet, hurum zal ngola, kayam me mi fe hur ma wurana yam hur mazi ma b’ala. Mi de mi sa máma ala: Ang mat abong ngeyo. Mi mad’am mbeyo; abom mbut blangâm ma adjeuna.
6Fariziyêna a buzuk abua. Ata yi máma na wat, azi ndjak vunazi ki suma hi Herot-na yam Jesus, ni nana ba, azi mba bam mbei ge?
Ablau suma a mba gen Jesus
7Jesus mi i ki mam suma hata avun apo d’a Galile-d’a. Ablau suma a tcholï Galile, Jude, 8Jerusalem, Idume, suma dang alum ma Jurdê-na ki suma kur azì ma ngui Tir ki Sidon-na pet. Azi mbeï gevem kayam azi hum ahle suma mi nga mi lazina.
9Mi de mi mam suma hata ala a halam alum mba gora tala ablau suma a hebem mbuo d’a. 10Mi sut wa ablau suma. Kayam ndata, suma tugud’eid’a pet a nga mol kam kä á domu. 11Ata yima muzuk ma teteng ma tchona mi wuma, mi ge tam kä avoromu, mi er ad’um akulo ala: Angî Alona Goroma. 12Wani Jesus mi gad’am ad’enga ala ar mi dum zlam mbei d’i.
Jesus mi man suma a sunuzina dogo yam mbà
(Gol Mat 10.1-4; Luc 6.12-16)
13Bugola, Jesus mi djak akulo yam ahinad’a, mi yi suma hurum mi vazina; azi mba gevem mi. 14Mi manazi dogo yam mbà, mi yazi ala Suma a sunuzina. Mi dazi ala: An managi ala agi kagagi ki sed’enu, an sunugi á tchi wala mi. 15Mi hazi ad’enga kayam azi á dik muzuk ma teteng ma tchona woi mi. 16Suma mi manazi dogo yam mbàna ba wana: Simon ma Jesus mi tinim simiyêm ala Pierre-râ, 17Jacques ki wiyema Jean Zebede groma suma mi tinizi simiyêzi ala Buwanages, nala, gro alo ma breîd’a na, 18Andre, Filip, Bartelemi, Matiye, Toma, Jacques Alfe goroma, Tade, Simon ma kak djangûna ki gata hi Romê-nid’a avo’â, 19ki Judas Iskariyot ma mba mi he Jesus abo mam suma djangûnina mi.
Jesus simiyêm a min i ki sed’em avo
20Jesus mi hulong avo. Ablau suma a togï kua d’ei, gak Jesus azi ki mam suma hata a fe nga lovota á te tena d’i. 21Kid’a simiyêm a hum zla ndatid’a, azi buzuk a iza á vum mbeyo, kayam azi dala: Yam mbut wa da’.
Jesus mi hulong ded’a mi suma a min vum ki zlad’ina
(Gol Mat 12.22-32; Luc 11.14-23; 12.10)
22Suma hat gat suma Jerusalem-ma a mba, a dala: Mi nga ki Belzebul kurumu. Suma hiuna a nga dala: Ni kad’enga hamulâ hi muzuk ma tchonina ba, mi nga mi dik ki muzuk ma teteng ma tchona woi wana.
23Jesus mi yazi gevemu, mi dazi zlad’a ki d’ogolâ ala: Ni nana ba, Seitan mi ndak á dik ndram Seitan woi ge? 24Le ba leu d’a tud’a ti wal kä mbà á dur tad’u ni, leu ndata ti ndak á kak kuo d’a. 25Le ba suma kur azì ma tuna a wal kä mbà á dur taziya ni, azì máma ndak á kak kuo d’a. 26Le ba Seitan mi wal mbà á dur tamu ni, leu mamba ndak á kak kuo d’a, wani ti dap mi daba.
27Na ni sana mi ndak á kal avo hi sama ad’engâ á hurumum bei mi djinim zu? Wani mi djinimî djina tua ba, bugola, mi hurumum ahligiyem tua mi.
28Gagazi, an nga ni dagiya, Alona mba mi vat hurum mbei yam tcho d’a pet ta hi sumid’a ki las sa suma a nga lazata pet. 29Wani sama lara pî ma nga mi las Muzuk ma bei tchod’a ba nina, Alona mba mi vat hurum mbei kam mbuo gak didin, kayam mi le ni tcho d’a bei Alona mi vat hurum mbei kata. 30Jesus mi de hina kayam azi nga dala: Mi nga ki muzuk ma tchona kurumu.
Jesus asum azi ki b’oziyoma
(Gol Mat 12.46-50; Luc 8.19-21)
31Ata yi máma, Jesus asum azi ki b’oziyoma a mba, a nga tchola abua. Azi sun atam á yumu. 32Ablau suma a nga kak kä gevema, a dum ala: Gola! Asung azi ki b’oziyongâ a nga abua, a nga halangû.
33Mi hulong dazi ala: Ni nge ba, nasun azi ki b’oziyona ge? 34Wani mi pret tam mi gol suma a nga kak kä gevema, mi dazi ala: Gol asun azi ki b’oziyona ba wana. 35Kayam sama lara pî ma nga mi le minda hAlonid’ina, mam mi wiyena, ni wiyenda, nasun mi.
Currently Selected:
Marik 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.