Jean 10
10
Ma pola ki tumiyôna
1Jesus mi dazi ala: Gagazi, an nga ni dagiya, le sama nga mi kal avun kangâna hi tumiyônina d’uo ba, wani le mi dja’î kabo ma dingâ ni, mam mi sama kul ma tchi matna. 2Wani sama nga mi kal avun kangânina, ni ma pol tumiyôna. 3Ma ngom vun kangânina mi malam vuna, mi yi tumiyô mama ki simiyêziya. Tumiyô mama a humum delemu, mi buzuguzi woi abua mi. 4Ata yima mi buzuk tumiyô mama woi abu petna, nga mi tit avoroziya. Tumiyôna a nga tit ad’um mi, kayam azi humum delemu. 5Azi mba tit ad’u sama ding ngi, wani a mba djang ngei abomu, kayam me a nga hum del sama ding ngi.
6Jesus mi dazi zla d’a d’ogol ndata, wani azi we nga ad’u zla d’a mi dazizid’a d’i.
Jesus ni Ma pol ma djivina
7Kayam ndata, Jesus mi dazi kua ala: Gagazi, an nga ni dagiya, an ni vun kangâna hi tumiyônina. 8Suma a mba avorona pet a ni suma kul suma tchi matna, wani tumiyôna a nga humuzi delezi d’i. 9An ni vun kangâna. Le sama kal ata vun máma ni, mba mi fe suta, mba mi kal kuru, mba mi ndabua, mba mi fe yima te hatna. 10Ma kula mi mba ná kula, ná tchi matna, ná b’lak ahlena mi. An mba ni kayam azi fe arid’a, a fat kam kua kam kua.
11An ni Ma pol tumiyô ma djivina. Ma pol tumiyô ma djivina nga mi he tam mbei yam tumiyôna. 12Sama le sun nda beged’a ni ma pol tumiyôna d’i, tumiyôna a ni mama d’uo mi. Le mi we ngûna nga djïya ni, mi ar tumiyôna woyo, mi ringâ. Ngûna mi mba, mi vik tumiyôna, mi b’rawazi woi yayak. 13Mi ringâ kayam mam mi sama le sun nda beged’a, nga mi djib’er yam tumiyôna d’i. 14-15An ni Ma pol tumiyô ma djivina. D’igi Abun mi wan an wAbun mi na, an we tumiyô mana, tumiyô mana a wan mi. Kayam ndata, an nga ni he tan ndei á matna yam tumiyô mana. 16An nga ki tumiyô suma dingâ kua, suma a nga kur kangâ ma wana d’uo na. Mbeî an mba ni mbazi kur mi. Azi mba humun delenu, azi mba mbut ades ma tuna, ma polozina ni tu mi.
17Abun nga mi le kanu, kayamba an nga ni he tan ndei á matnid’a, an mba zlit tan akulo kua mi. 18Sana nga kad’enga á tchan ndi, wani an tanda nga ni he tan ndei á matna. An nga kad’enga á he tan ndeyo, an nga kad’enga á tchol tan akulo mi. NAbun ba, mi han vun ma he máma.
19Kayam ndata, wala ti tchol aduk Juif-fâ kua yam zla ndata. 20Suma ablaud’a adigazi a dala: Mi nga ki muzuk ma tchona kurumu, mi gurut ni gurud’a. Ni kayam me ba, agi humugizi ge?
21Suma hiuna a dala: Sama nga ki muzuk ma tchona kuruma, mi ndak á de zla d’a hina d’a d’i. Muzuk ma tchona mi ndak á mal ir suma duka woi zu?
Juif-fâ a noî Jesus woyo
22Vun til ma a tin gong nga kud’ora hAlonid’a irat vatna nga avo Jerusalem, ni til ma ab’lenga. 23Jesus nga mi poi kur gong nga kud’ora hAlonid’a, ad’u azangâ hi Salomon-na. 24Kayam ndata, Juif-fâ a nguyumu, a djobom ala: Ni mindja ba, ang arami bei le gigrita ge? Le angî Mesi-yu ni, ang dami woi mbak.
25Jesus mi hulong dazi ala: An dagiya wa, wani agi hagi nga gagazid’a kan ndi. Sun nda an lat ki simiyê Abunda nga d’i le glangâsâ kanu, 26wani agi nga hagi gagazid’a d’i, kayam agi nga aduk tumiyô mana d’i. 27Tumiyô mana a nga humun delenu. An waziya, azi nga tit ad’un mi. 28An hazi ari d’a didinda, azi mba bo d’i, sama mba mi prud’uzi woi abona nga d’i. 29Abun ma handjina ni Ma kal ahlena petna. Sama ndak á prud’uzi woi abo Abuna nga d’i. 30Ami kAbun ni tu.
31Juif-fâ a yo ahinad’a kua á durumu. 32Jesus mi hulong dazi ala: An tagagi sun nda djivi d’a ngola hAbunda. Ni yam sun me ba, agi min durun kahinad’a ge?
33Juif-fâ a hulong dum ala: Ni yam sun nda djivid’a ba, ami min durung kahinad’a d’i, wani kayamba ang nga las Alonid’a. Ang tang ma ala ni sana na, ang mbut tang ala angî Alona.
34Jesus mi hulong dazi ala: A b’ir kur gat magid’a ala: Alona mi dazi ala: Agi nalona d’uo zu? 35Le Alona mi yi suma zla mamba mba atazi adjeuna ala alona, le b’ira hAlonid’a ndak á mbut tuo ni, 36ni nana ba, agi nga dagi yam an ma Abun mi manan mi sununï kur duniyad’ina ala: Ang nga las Alona, ni kayamba an dala: An nAlona Goroma d’a zu? 37Le an nga ni le sunda hAbunda d’uo ni, agi hagi gagazid’a kan ndi. 38Wani le an nga ni lad’u ni, agi le hagi gagazid’a kan nduo pî, agi hagi gagazid’a yam sun ndata. Hina wani, agi mba wagi tetet ala Abun nga kurunu, an nga kur Abun mi.
39Kayam ndata, azi halam kua á ved’a, wani mi nde woi aboziya.
40Jesus mi hulong abo alum ma Jurdê-na, ata yima Jean mi le suma batemba kua avo’â, mi kak sä kua. 41Suma ablaud’a a mba gevemu, a dala: Jean mi le nga vama ndandal yam tu d’i, wani zla d’a pet ta mam dat yam sa mámid’a ni gagazi. 42Ata yi máma, suma ablaud’a a he gagazid’a kamu.
Currently Selected:
Jean 10: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.