Hebre-na 12
12
Alona nAbuya
1Kayam ei suma suma glangâsâ ablaud’a nguyina, ar ei fogei ahle suma d’eleina ki tcho d’a nga ngapa ateid’a pet teyo. Ei vei tei ad’enga kur ringâ á vei vama Alona mi tinim sä avoreina. 2Ei tini irei yam Jesus ma nad’u tinda hi he gagazi meid’a ma nga mi ndagat memetna. Ni ma ve tam kur ndaka ata agu ma b’alina, ni ma mi gol zulona ni va d’uo yam furî d’a sä avorombina. Ki tchetchemba, mi kak sä akulo ata bik ka ndjufa hi zlam mba amula hAlonid’a.
3Agi djib’eregi yam mam ma ve tam ad’enga abo suma tcho suma a kak djangûna ki sed’ema. Ar agi kawagi d’i, ar tagi tchuk lus suo mi. 4Kayam dur magi ma ki tchod’ina, agi ndjigid’egi nga gak matna d’uo tua. 5Agi maragi yam zla d’a giget ta Alona gigid’egi d’igi groma na d’a zu? Mbaktumba ti dala:
Gorona, ang gol gat ta Ma didina nga mi gad’anga
d’igi vama hawana na d’i,
ata yima nga mi ngobongâ,
ar tang tchuk lus suo mi.
6Kayam Ma didina nga mi gat sama mam le kama,
nga mi to sama lara ge ma mam hurum vum d’igi goroma na na kazlingâta.
7Agi vagi tagi ad’enga kur gat ta a nga gad’agi d’igi sana nga mi gat goroma na d’a, kayam gat ndata nga d’i tak kei ala Alona nga mi gad’agi d’igi groma na. Ni gor ma lara ba, abum nga mi gad’am mbuo ge? 8Wani le Alona mi gad’agi nga d’igi groma na d’uo ni, agi ni gro suma a vud’uzi akulo hawa ya’â, nga ni grom suma vuta d’i. 9Ei djib’erei yam abuyoi suma kur duniyad’a ka hina: Azi nga gad’eya, ei nga gei yei kä avorozi mi. Ei ndak á gei yei kä avok Abui ma sä kur akulod’ina á kagei karid’a kal luo zu? 10Abuyoi suma kur duniyad’a ka hina, a nga gad’ei ndjö yam vama ndak djivid’a irazina. Wani Alona nga mi gad’ei ni yam djivi meid’a, kayam ei kagei suma bei tchod’a d’igi mam na. 11Ata yima a nga gad’eina, ei golei ni d’igi a lei ni tchod’a na, wani bugola, gat ndata nga d’i mba ki b’leng nga halasa ki tit ta d’ingêra yam suma a ve tazi kurutna.
Tchenda ki ge humba
12Kayam ndata, ar agi yogi abogi ma kauna akulo, agi siragi guguvagi ma amangeîna mi. 13Agi tid’igi kur lovot ta djivi d’a d’ingêra, kayam asegi ma dileîd’a mi hulongeî d’i, wani mi sira ni sira.
14Agi b’ad’agi tagi á kagagi ki b’leng nga halasa ki suma pet ki tit ta d’ingêra. Bei tit ta d’ingêra ba ni, sa mi ndak á we Salad’a d’i. 15Agi gologi tagi djiviya, sa mi kid’ak kei ata sumad’a hAlonid’a d’i. Ar sa mi tchol adigagi d’igi agu ma aglarâ na á djok suma ablaud’a ki tcho mamba d’i. 16Agi gologi tagi djiviya, ar sama mizeuna d’oze sama bei le mandara Alonina kak adigagi d’igi Esau ma gus ngol mamba woi ki te ma ngiyeûnina na d’i. 17Agi wagi ala bugola, mam halat ki simina ala abum mi b’e vunam kamu pî, abum mi min ndi, kayam Esau mi fe nga lovota á mbut hurum mbi.
18Agi mbagi nga ni go kahinad’a d’igi Israel-lâ na d’i. Nahina d’a Sinai d’a suma a ndak á dot ta nga d’i ngal akud’a bibiliud’a, ni yima wurana ki nduvun nda i’îlika ki babar ma ndundulâ 19ki tchina hadifina ki del la nga d’i de zlad’id’a mi. Ata yima Israel-lâ a hum del ndatina, a tchen Alona ala mi dazi zlad’a bugol luo d’a, 20kayam azi ndak á ve vun ma he ma ala: Le d’uwarâ mi do ahina ndata ni, agi mba tchum mbei kahinad’a na d’i. 21Azi le mandara ngola abo vama azi wuma, gak Moise pî mi dala: An nga ni le mandarâ, ni zlak mi.
22Wani agi mbagi go ata ahina d’a Siyon-nda, nazina hAlo ma arina, ni Jerusalem mba akulod’a, ni yima malaika suma bubupma a nga kuana. 23Agi mbagi go ki Tok ka furîd’a hAlona grom suma a vut avok suma simiyêzi sä b’ira akulona. Agi mbagi go gen Alo ma ka sariyad’a yam suma petna ki muzu’â hi suma d’ingêr suma a bo suma Alona mi mbud’uzi ndak memetna. 24Agi mbagi go gen Jesus ma aduk suma kAlona yam vun ma djin ma awilina ki buzuwam ma yama a nga dum zlam djivid’a kal buzuna hi Abel-lîna.
25Agi gologi tagi djiviya, ar agi noyôgi mam ma nga mi dagi zlad’ina d’i. Kayam le suma a noî mam ma nga mi gigid’ezi yam andagad’a ka hina a prut nga woi d’uo, le ei nga humî gigeta hi mam Ma akulona d’uo mi ni, ei mba prud’i woi ni nana ge? 26Ni ma delem mbi giget andagad’a kur bur mámina, wani ki tchetchemba, mi hle vunam ala: Ar kua yan tu, an mba ni giget nandagad’a hol li, wani akulod’a mi. 27Zla d’a ala: Ar kua yan tu d’a, ti tagei nala ahle suma a lazina a mba giged’a, a mba kal leyo, kayam vama bei gigeta ba na, mi ar kaka.
28Kayam ndata, ei suma kalei kur leu d’a bei gigeta na d’a, ar ei lei mersi mAlona kayam ndata. Ar ei kud’orei Alona ki kud’or ra lum tam djivid’id’a ki mandarâ ki zlaka, 29kayam Alo meina naku d’a nga d’i ngal ahlena woid’a.
Currently Selected:
Hebre-na 12: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.