Galat-na 4
4
1Gola! An nga ni dagiya, ata yima gor ma te djona habuma nga gogora tua na, mi wal nga ki magoma d’i, hina pî mam mi sala ahlena pet. 2Wani ata yima mam nga gogora tua na, mam nga ad’u suma ngomoma ki suma a nga ngom ahle mamina, gak yima abum mi ngamzina. 3Ei ni hina mi. Kid’a ei ni gugureina tua d’a, ei ni magumeina hahle suma yam andagad’ina. 4Wani kid’a yina ndaka, Alona mi sunï Gorom ma atchad’a ti vud’um ad’u gata hi Juif-fîd’a, 5kayam mi pat suma a nga ad’u gatina woyo, kayam ei mbud’i Alona groma mi.
6Kayam agi mbud’ugi groma, kayam ndata, Alona mi sunï Muzu’â hi Goromina kuri ma nga mi zud’i á yi ala Aba, nala, Abunu. 7Hina, angî magoma d’uo d’a, wani angî goroma. Le angî goroma ni, Alona mba mi hang ahle mama pet suma nga mi ngomozi yam gromina.
Djib’era hi Paul la yam suma Galat-nid’a
8Wani adjeu d’a agi ni suma bei wAlona tua d’a, agi lagi ni magomba mi filei ma ala nAlo ma gagazina d’uo na. 9Wani ki tchetchemba, agi wagi wa Alona, kal pet Alona mi wagi mi. Ni nana ba, agi dok hulongôgi ata hat ta adjeu d’a amangeî d’a hohoud’a d’ei ge? Agi min mbud’ugi magumei mazina d’ei zu? 10Agi nga ngomogi burâ ki tilâ ki yina ki bizad’a tua. 11An nga ki mandarâ, dam sun nda an lat adigagid’a mba d’i mbut vama hawana kla.
12B’oziyona, an nga ni tchenegiya, ar agi mbud’ugi d’igi an na, kayam an tan mbut d’igi agi na mi. Agi lan nga vama tcho yagi tu d’i. 13Agi wagiya, ata yima an tchagi wal Zla d’a Djivid’a avo’â, an ni ki tugud’eid’a. 14Tugud’ei d’a ata hliwinda ni vama kuka kagiya. Hina pî, agi golon nga is si, agi noyôn nga d’uo mi. Wani agi van atagi d’igi malaikana hAlonina na, d’igi Jesus Christ tamba na mi. 15Furî magi ndata ti nga ni lara ge? An nga ni dagi woi mbak, le ni vama nda’â ni, agi pad’agiya wa iragi handjiya wa kur bur máma. 16Ki tchetchemba, an mbut sama djangû magina kayamba an nga ni dagi zla d’a gagazid’id’a zu?
17Suma a tchagi wal Zla d’a Djivi d’a dinga ndazina a nga halagi ki hat hurâ ngola, wani nga ni hat hur ma iratna d’i. Azi min á walagi woi ki sed’emi kayam agi hurugi hat kazi mi. 18Wani hat hur ma djivina ni djivid’a ata yina pet, wani nata yima an nga adigagina hol li. 19Grona, vut ta an vud’ugi kur ndakid’a, hulong nga d’i tan d’igi atchad’a ti vut gorâ na, gak Christ mi kak kurugiya. 20Ki tchetchemba, an min iza hatagi á mbut delen kä, kayam me an nga ni djib’era kagiya.
Vama taka yam Agar azi ki Sara
21Agi danu, agi suma min á tid’igi yam gatina, agi humugi nga zla d’a gata ti data d’uo zu? 22Kayam a b’ir kur mbaktumba hAlonid’a ala Abraham mi nga ki grona mbà; ma tuna asumî magomba, ma dingâ asumî gor vuta. 23Wani ma magomba vud’uma ni ata minda hi sanid’a, wani ma gor vuta vud’uma, a vud’umî yam vun ma hled’a hAlonina. 24Zla ndata ni zla d’a d’ogola yam arop suma mbà ndazina. Azi ni vun ma djin ma mbàna. Ta tud’a ni ngad’a yam ahina d’a Sinai-d’a, nala, Agar, ni d’a mba d’i vut gro suma magomba. 25Agar ndata nahina d’a Sinai d’a yam andaga d’a Arabi-d’a. Hle tat ni d’igi azì ma ngol ma Jerusalem ma tchetchem wana na, kayam ndat nga d’i le magomba ki grotna. 26Wani Jerusalem mba akulod’a ni gor vuta, ndat nasuya. 27D’igi mbaktumba hAlonid’a ti de na ala:
Ndak ka b’al gendreged’a bei vutid’a,
ndak le furîd’a;
ndak ka ndak ka vuta ti lak nga yat tu d’uo d’a,
ndak tchayîd’a;
kayam ndak atcha d’a digik keid’a,
ndak nga ki grotna kal atcha d’a nga ki mandjufîd’a.
28Kayam ndata, b’oziyona, agi ni gro suma yam vun ma hled’a hAlonina d’igi Isak na. 29D’igi adjeu gor ma a vud’um kur minda hi sanina mi djop vun ma a vud’um yam ad’enga hi Muzu’â hAlonina na, ki tchetchemba, ni na mi. 30Mbaktumba hAlonid’a ti de nana ge? Ti dala: Ang dik atcha d’a magomba ki gorotna woyo, kayam gorâ hatcha d’a magomba mba mi te djona ki gorâ hatcha d’a gor vutid’a d’i. 31Kayam ndata, b’oziyona, ei ni grona hatcha d’a magomba d’i, wani ei ni grona hatcha d’a gor vutid’a.
Currently Selected:
Galat-na 4: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.