Tit 2
2
Ncaakpasɩa 'la cɩ 'la wɔlɩ
1‑Ma, ‑mɔɔ, 'maa ca ɩmɩa ‑ɩya cacawɔlɩa 'titi ‑glɩ 'lɛ bhlo na. 2'Naa ‑glɛɛglɛnyaa falɩ macɩ pɔlɛ cɩ, ma 'plɩ ncɛlɩa ‑ɔya -delikʋtɛlɔ ‑ŋwa 'lɛ 'kʋ na, ma 'plɩ pɔɔwɔtɩnya, ncɛlɩa pɔɔtɛtɛ 'titi, walʋ ɩya pɔlɛkʋtɛlɔ ‑yelio 'lɛ na.
3'Sɛtɛɛ bhlogbɩɩ, ŋlʋkpasɩa ‑masɛ, ɩ ‑fata 'lɛ lebhe mala 'namʋa ‑ʋ ‑kplɔ. Ma 'la kalɩa ma 'ye ‑glaan naa, ma 'la 'plɩa nʋgbumlaŋwlɛ. 'Naa, ma ca wɔɔnanɩ. 4‑Sa ma cɩ 'ka 'lɛ ŋlʋgbɩa saa ‑ɩ ‑fata 'lɛ lebhe ma wabhawabhalɩ ma ‑ŋutiecɩ ɩya mala 'cuo, 5ma 'plɩ ŋlʋgbɩa ‑ɔ ‑kʋ 'lɛ macɩɩn, ‑ɔ falɩɔ 'lɛ ‑ncɩ pɔlɛ cɩ, ‑ɔ ‑ci 'lɛ mala 'sli 'klʋlɩsa, ‑ɔ nanɩ 'lɛ pɔlɛ 'kʋ, ‑ɔ ‑ka 'lɛ ma ŋutiecɩ 'la zʋlɩɛ na ca ɩya ma 'la ka sɛ Laagɔ 'la niwɔlɩa wɔɔnyinyi cɩ nyɩtɛlɩ.
Ncaanyɩgbɩa 'la cɩ 'la wɔlɩ
6‑Ɔ ‑glɩ 'lɛ nyɩgbɩa na, maa ‑masɛ, solu maa lebhe ma cibhlili macɩ klasa 7wɔlɩa ‑tɛtɛa nɩkplaan. Pala -naa nʋnʋgbɩ 'nanɩa nɩkplaan lebhe ‑n ‑glɩ nclɔɔa ma cɩ 'lɛ dɩbalɩ na. 'Naa ‑naa cacawɔlɩa ‑kplɔ, 'maa falɩ -ncɩ pɔlɛcɩ, 8‑naa wɔɔnyɩtʋa ʋ 'nylugolu 'kʋ, ma 'la 'lɩlɩʋ 'ge ‑ylɛylɛ nɩkplaan ɩya ‑zɔbhɛlɩgbanyɔa 'ta ‑anyɩ wɔɔnyinyi ‑ylɛylɛ cɩ nyɩtɛlɩda 'lɩ na, ‑zo 'kɔɔ pla.
Geye 'la cɩ 'la wɔlɩ
9'Naa geyea kalɩ ma tocɩa 'la zʋlɩɛ ‑tɛtɛa 'fɩan nɩkplaan. 'Naa ma nama maa pɔlɛ 'kʋ, maya maasɔ 'la 'tɩtɔa wɔlɩ, 10ɩya ma 'la ghlia ‑ylɛylɛ. 'Naa ma pala lebhe ma tocɩa cɩ maa clɩɩa 'fɩan ‑delikʋtɛbhalɩ. ‑Sa ma cɩ 'ka 'lɛ Laagɔ, ‑ala Gbʋʋnsanyɔa 'la cacawɔlɩa ‑tɛtɛa 'fɩan nɩkplaan 'ŋlɩ 'nyɩ.
Laagɔ 'la 'lɔlʋa 'la cɩ 'la wɔlɩ
11Sa Laagɔ 'la ‑walʋa ‑ʋ sa 'lɛ ncɛlɩa 'fɩan gbʋʋn na ya ʋcɩ pala na. 12Ka ʋ ca 'lɛ ‑anyɩ saa ‑a cɩ ka 'lɛ nʋnʋnʋ ɩya ‑a ka ɩmɩa ‑ɩ 'ta 'lɛ Laagɔ 'tʋ ‑ka ɩya ‑laagɔzɔn ‑naa 'la lɩɩa la 'tʋa bɩkʋwlʋ na. Ɩya, ‑a ka ‑pɔtɔnʋ 'la 'bhlɛsʋa nɩkplaan, dɩgalɩ, 'kʋnylugolulɩɛ ɩya Laagɔ 'la lobholiɛ nɩkplaan kʋ. 13Ɩya ‑a ka 'nanɩa ‑a 'tɛlɩ 'lɛ pɔlɛ 'kʋ ɩya clɩɩa 'kʋa ‑ala Laagɔa, ɔma ‑ɔ 'ghli 'lɛ, ‑ala Gbʋʋnsanyɔa, Zozi Klisi 'la 'klʋagbaa cɩ 'ka 'lɛ ‑zɔnwlʋ na ‑bɛ. 14Ɔmɔ Zozi Klisi 'titi ya ɔcɩ ‑sa ‑ala gbʋ le ɔ 'ka ‑anyɩ nyinyia ‑tɛtɛa nɩkplaankplɩ, ɔ 'ka ‑anyɩ ‑kplɔ ɩya ɔ 'ka ‑anyɩ ɔla 'lɔlʋ ple. Ɩya 'lɔlʋ ‑naa 'ka 'nanɩnʋlɩɛ 'la gbʋ ‑nwɔvi clɩɩa -tɛtɛa.
15Na, 'lɩka ‑sa ɩ ‑fata 'lɛ lebhe ‑n nyɩtɛ, ‑n zʋ 'tɛtɩɩn ɩya n ‑sa 'bɩ ‑jiolia ‑tɛtɛa nɩkplaazn. Na, ‑naa tea nclɔɔ bhlogbɩɩ ne ɩya ɔla 'nyi 'la sɔɔ.
Currently Selected:
Tit 2: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.