Zan 9
9
Zozii ya 'citutunyɔ bhlo jabha
1Zozii ‑kʋ 'lɛ 'plɩda na, ɔ ya nclɔɔ bhlo 'lɩ, ɔ ‑glɩa 'citutunyɔ 'nyɩ ma yɔɔ 'lɛ valɩ. 2Ɔla gɩlɩnyaa* yɔɔ neencla lebhe: «Canyɔ, ncaasaa nua 'lɛ nyinyi 'nyɩ nclɔɔ ‑naa ‑glɩa 'lɛ 'citutunyɔ 'nyɩ ma yɔɔ 'lɛ valɩ bha? Ɔmɔ bha ‑aana ɔla valɩnyaa bha?» 3Zozii ya maa neenŋonu lebhe: «‑N 'ta ɔmɔ naa, ‑n 'ta ɔla valɩnyaa. ‑Ma ka ɩ 'plɩ 'lɛ sɛɛ ɩya ncɛlɩ 'ka nclɔɔ ‑naa nɩkplaan, Laagɔ 'la lobholia 'lɩlɩ! 4Daa ‑zeli ‑ga ka 'lɛ na, ɩ ‑fata lebhe ‑a nʋ ɔmɔa ‑ɔ lobhuun 'lɛ na, 'la lobholia. 'Tutua cɩ 'ka plaa ɩya nclɔɔ bhlogbɩɩ 'la 'kanɩ lobholi nʋlɩɛ mino. 5Daa n ‑kʋ ka ka 'lɛ ‑laagɔzɔan na, ‑n ‑glɩ ‑laagɔzɔan 'la zezezeli.»
6Daa ɔ nyɩtɛ 'lɛ wɔlɩ ‑naa na, Zozii ya ‑daadʋ ‑dʋdʋ 'kʋ 'pa, ɔ ya ʋya pipia 'cakalɩ, ɩ ya ‑bʋbɔnzɩ 'plɩ 'nyɩ ɔ yɩɩ 'citutunyɔa 'la 'cia ‑bʋa. 7Ɔ yɔɔ 'cla lebhe: «Mʋ 'nyiklea ma la 'lɛ Silowee na nɩkplaan ɩya ‑n wɔlʋ 'klʋ.» Siloweea sa ‑zɔn lebhe: «Lobhulobhunyɔ*». 'Citutunyɔa ya mʋ, ɔ ya 'klʋ wɔlʋ 'nyɩ daa ɔ cɔlɔ 'lɛ na, ɔ lɩanɩasa.
8'Dɛ 'la ‑dɩklea 'la ncɛlɩa ɩya maa ‑ɔ lɩa ‑azlaa 'mɔɔ 'lɛ, sa ɔ ‑glɩa ‑zlazlanyɔ na, claa lebhe: «‑N 'ta nclɔɔ ‑naa ‑ɔ 'taa 'lɛ sakʋ 'nyɩ ‑ɔ ‑zla 'taa 'lɛ bha?» 9‑Anʋa claa lebhe: «Ɔmɔ ‑kʋ 'lɛ 'dɛ.» ‑Da -naanʋaa claa lebhe: «‑Wɔɔ ‑n 'ta ɔmɔ, ‑ma ka ɔ ‑yɔɔsɔ 'wlʋlʋ 'lɛ.» ‑Ma ɔmɔ 'titi claa lebhe: «‑Amʋ ‑kʋ 'lɛ 'dɛ.» 10Na, ma yɔɔ neencla lebhe: «'Nsasa ɩ 'plɩplɩlɩa 'lɛ 'nyɩ ‑naa 'cia ya 'lɛ 'gbokalɩ bha?» 11Ɔ ya maa neenŋonu lebhe: «Nclɔɔa ma la 'lɛ Zozii na, ɔmɔ ‑ɔ nʋ 'lɛ ‑bʋbɔnzɩ, ‑ɔ yɩɩ 'lɛ 'na 'cia ‑bʋa 'nyɩ ɔ yaan 'lɛ 'cla lebhe: Mʋ Silowee ɩya ‑n wɔlʋ 'klʋ. Na, n ya 'yɛpɩ mʋ 'nyɩ n wɔlʋ 'lɛ 'klʋ na, n ya 'lɛ salɩ.» 12Ma yɔɔ neencla lebhe: «Ɔmɔ ‑naa, 'nda ɔ ‑kʋa 'lɛ bha?» Ɔ ya 'cla lebhe: «N 'ta ‑ci.»
Falizɩɛnnyaa cla nclɔɔa ‑ɔ jabha 'lɛ na neen
13Na, ma ya ɔmɔa ‑ɔ ‑glɩa 'lɛ 'citutuyɔa 'nyɩ ‑ɔ jabha 'lɛ na, Falizɩɛnnyaa* 'bhlɩ fa. 14Clɩɩa 'kʋa Zozii nʋa 'lɛ ‑bʋbɔnzɩa 'nyɩ ɔ kalɩa 'mɔɔ 'lɛ 'ci 'gbo na, ɩ ‑glɩa Zifʋnyaa* 'la nyɔkwɛclɩɩ*. 15Falizɩɛnnyaa ‑ma yɔɔ neencla saa ɩ 'plɩplɩlɩ 'lɛ 'nyɩ ɔ lɩnɩ 'lɛ sa na. Ɔ ya maa neenŋonu lebhe: «Ɔ ya 'na 'cia ‑bʋbɔnzɩ ‑bʋa, n ya 'lɛ 'klʋ wɔlʋ 'nyɩ n lɩnɩ 'lɛ sa.» 16Falizɩɛnnyaa ‑anʋa claa lebhe: «Nclɔɔ ‑naa 'ta Laagɔ 'la nclɔɔ ‑glɩ. Sa 'ɔ 'nyiyi 'ta nyɔkwɛclɩɩa na.» ‑Ma ‑da -naanʋaa ‑ma claa lebhe: «'Nsasa nyinyinʋyɔ cɩ 'kaa 'lɛ ‑sa 'la 'ciinzizlielɩlobholi nʋlɩɛ mino bha?» 'Nyɩ ma ya nɩkplaan do. 17Na, ma ya ‑awlɛ 'citutunyɔa neencla lebhe: «'Nyɩ ‑mɔɔ 'nsasa ‑n 'lɩlɩlɩ 'lɛ ɔmɔa ‑ɔ kalɩ 'lɛ ‑naa 'cia 'gbo na bha?» Ɔ ya maa neenŋonu lebhe: «Laagɔnekʋnyɩtɛnyɔ* ɔ ‑glɩ 'lɛ.»
18Zifʋnyaa 'taa ‑wa lebhe ma 'kaa ‑nʋawlɛ la lebhe ɔ ‑glɩa ‑bɛkadaa 'citutunyɔ 'nyɩ ɔla 'cia yanɩ 'lɛ 'gbokalɩ, ɩla gbʋ 'kʋ na, ma ya gba 'nyɩ ɔla valɩnyaa ya ci. 19Ma ya maa neencla lebhe: «A ‑yowlia a na a ya 'lɛ 'citutuyɔ cɩ valɩ na, ɔmɔ 'titi ‑kʋ 'lɛ -da bha? Na, 'nsasa ɩ 'plɩplɩlɩa 'lɛ 'nyɩ ‑yaka ɔ lɩnɩ 'lɛ sa bha?» 20Ɔla valɩnyaa ya maa neenŋonu lebhe: «‑A ‑lio ‑danʋfʋɛ lebhe ɔ ‑glɩ ‑a ‑yowli 'nyɩ ɔ ‑glɩa 'citutunyɔ 'nyɩ ‑a yɔɔ 'lɛ valɩ. 21‑Ma saa ɩ 'plɩplɩlɩ 'lɛ 'nyɩ ɔ lɩnɩ ‑pɔtɔnʋ sa na, ɩmɩ 'nyɩ ‑a 'ta ‑ci. 'Nyɩ ɔmɔa ‑ɔ kalɩɔ 'lɛ 'ci 'gbo na, ɔmɔ ‑ma ‑a 'tɔɔ ‑ci. Na, a 'cla ɔmɔ 'titi neen, sa da ɔ yanɩ 'lɛ ŋeni na, ɔ cɩ mino 'nyɩ ɔ cɩnɩ ɔmɔ 'titi ɔla cra wɔlɩ nyɩtɛ!» 22Ka ɔla valɩnyaa nyɩtɛa 'lɛ sɛɛ ‑ofi lebhe, ma 'gulua Zifʋnyaa tocɩa. Sa maa ‑naa yaa tooto zʋ lebhe ma cɩa ncaatʋtʋʋntʋa ‑ɔ cɩ 'lɛ 'cla lebhe Zozii ‑glɩ Laagɔ 'la ‑Sasanyɔa* na, bhibhiepalʋa* ‑zɔn 'tli. 23Ɩla gbʋ na, dɛ ɔla valɩnyaa 'cla 'lɛ lebhe ɔ ‑glɩnɩ ɔla 'wlua nclɔɔ, ‑ma ma 'clɔɔ neen.
24Na, Falizɩɛnnyaa ya nclɔɔa ‑ɔ ‑glɩa 'lɛ 'citutuyɔa na, ‑mɔsɔda la 'nyɩ ma yɔɔ 'cla lebhe: «'Nyɩ Laagɔ 'klʋ! ‑Anyɩ, ‑a ‑ci sɛɛ lebhe nclɔɔ ‑naa, ‑glɩ nyinyinʋnyɔ.» 25Ɔ ya maa neenŋonu lebhe: «Ɔ ‑ka nyinyinʋnyɔ ‑glɩ na, n 'tɩɩ ‑ci. ‑Ma wɔlɩ bhlogbɩɩ ‑tɛɛ n ‑ci 'lɛ, ɩmɩ ‑glɩ 'lɛ lebhe: N ‑glɩa 'citutuyɔ, ‑pɔtɔnʋ n lɩnɩsa.» 26Ma yɔɔ neencla lebhe: «'Nsasa ɔ nʋnʋnʋɔ 'lɛ 'nyɩ ‑naa 'cia ya 'lɛ 'gbokalɩ bha?» 27Ɔ ya maa 'cla lebhe: «N yɩɩ anyɩ solu tooto, ‑ma a 'ta ŋonu lebhe a 'kaan 'nyukwliinpo. Na, 'lɩsaa 'la gbʋ a ‑wa 'lɛ lebhe n solu ‑awlɛ anyɩ bha? Ka anyɩ ‑ma a 'ta sɛɛ 'lɛ wabha le a 'ka ɔla gɩlɩnya* 'plɩmʋ bha?» 28Na, ma vlaa 'mɔɔ 'nyɩ ma cla lebhe: «‑Mɔɔ ‑glɩ 'lɛ ɔla gɩlɩnyɔ*, ‑ma ‑anyɩ, Moyizi 'la gɩlɩnya ‑a ‑glɩ 'lɛ. 29‑A ‑lio ‑danʋfʋɛ lebhe Laagɔ ya Moyizi solu, ‑ma ɔmɔ ‑naa, ‑a 'ta daa ɔ 'wlʋlʋ 'lɛ na ‑ci.» 30Nclɔɔa ya maa 'cla lebhe: «'Lɩka ɩmɩa 'titita -ɩ sla 'lɛ nikpoo na. Ɩmɩ -ɩ ‑glɩ 'lɛ lebhe a 'ta ɔla 'wʋlʋdaa ‑ci, ‑ma 'bhlɩmɔɔn, ɔ ya 'na 'cia 'gbokalɩ! 31‑A ‑ci sɛɛ lebhe Laagɔ 'nyɩ 'ta nyinyinʋnya ɩmɩa ma 'clalɩ 'lɛ mala bhibhielia nɩkplaan na. ‑Ma nclɔɔ ‑ka Laagɔ zʋ 'nyɩ ɔ ‑ka ɔla pɔɔsa nʋ na, ɔ 'nyɩɔ ɩmɩa ɔ 'clalɩ 'lɛ na. 32'Nyɩ ‑a 'ta ka ‑azla 'nu lebhe nclɔɔ ya nclɔɔa ‑ɔ ‑glɩ 'lɛ 'citutunyɔ 'nyɩ ma ya 'lɛ valɩ na, 'la ci 'gbokalɩ. 33Nclɔɔ ‑naa 'ta Laagɔ 'la nclɔɔ ‑glɩa na, ɔ cɩ 'taa mino ɔ 'kaa lʋʋ bhlogbɩɩ nʋ.» 34Ma yɔɔ 'cla lebhe: «‑Mɔa ma ya 'lɛ ‑naa ‑lɩɩbhuoa nyinyiin valɩlɩ na, ‑mɔ ‑wa 'lɛ lebhe ‑ɔ ‑ka anyɩ wɔlɩ ca bha?» 'Nyɩ ma yɔɔ bhibhiepalʋa* ‑zɔn 'tli.
‑Anʋasaa ‑ɔ ‑glɩa 'lɛ 'citutunyaa 'titi bha?
35Na, Zozii yaa 'nu lebhe Falizɩɛnnyaa* yaa nclɔɔa 'tli. Ɔ ‑yɔɔsɔ 'cɩlɩ 'lɛ na, ɔ yɔɔ 'cla lebhe: «‑N ka Nclɔɔa 'Cʋa* 'la pɔɔtɛtɛ bha?» 36Ɔ yɔɔ neenŋonu lebhe: «‑Kwlenyɔ, pala nclɔɔa ɔ ‑glɩ 'lɛ na ɩya n 'ka ɔla pɔɔtɛtɛ kalɩ.» 37Zozii yɔɔ 'cla lebhe: «Ɔmɔ ‑n ‑jlɛ 'lɛ. Ɔmɔa ‑ɔ soluo 'lɛ na, ɔmɔ ‑ɔ ‑glɩɔ 'lɛ.» 38Na, nclɔɔa ya 'cla lebhe: «‑Kwlenyɔ! N ‑ka ‑naa pɔɔtɛtɛ.» 'Nyɩ ɔ ya Zozii ‑deliin ‑kukoonkplii sasla. 39Na, Zozii ya 'cla lebhe: «'Tɩtɩplakan n ‑ci 'lɛ ‑laagɔzɔan le 'citutuyaa 'ka salɩ ɩya ma -ɔ lɩa 'lɛ sa na 'ka 'citutunya 'plɩ.» 40Na, Falizɩɛnnyaa ‑ɔ ‑kʋa 'mɔɔ 'lɛ cɩ na, daa ma 'nu 'lɛ wɔlɩ ‑naa na, ma yɔɔ neencla lebhe: «Na, ‑anyɩ ‑ma, ka ‑a ‑glɩmʋ 'lɛ 'citutunya bha?» 41Zozii ya maa 'cla lebhe: «Ɩ ‑ka ‑kʋ lebhe a 'kaa 'citutunya ‑glɩa na, a cɩ 'taa nyinyi kalɩ. ‑Ma a cla lebhe: ‑A 'lɩ sa, 'dɛndlana ala nyinyia ‑gbɛ anyɩ 'wlu.»
Currently Selected:
Zan 9: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.