Zan 4
4
Zozii ‑ya Samaliiŋlɔ zʋ 'dɩ
1Zozii ya sɛɛ cibhlili le Falizɩɛnnyaa* yaa 'nu lebhe ɔ lɩa gɩlɩnya* ‑bhutukpa 'nyɩ ɔ zʋa ncaabhutukpa 'nyu 'wlu 'nyɩ ɔ zia Zaan 'kʋ. 2‑Nʋawlɛ nanɩ 'lɛ na, Zozii 'titi zʋ 'taa ncɛlɩ 'nyu 'wlu, ‑ma ɔla gɩlɩnyaa ‑ɔ zʋa 'lɛ ncɛlɩ 'nyu 'wlu. 3Na, ɔ ya Zudeebhlɩa 'kʋ 'wlʋ 'nyɩ ɔ ya Galileebhlɩa 'kʋ cɔlɔ. 4‑Ma ɩ ‑fataa lebhe ɔ 'ŋatɩa Samaliibhlɩa. 5Na, ɔ ya Samaliibhlɩa 'la 'dua ma la 'lɛ Sikaa na 'kʋ ŋeni. Dɩpɩa 'taa ‑dʋdʋa Zakɔpʋ 'nyɩ 'lɛ ɔ ‑yowli Zozɛfʋ na, cɩ da tlʋ. 6Dɩpɩa 'titi Zakɔpʋ 'la 'gbojlobhukua ‑kʋa 'lɛ. ‑Gugwiea ɔ bhli 'lɛ na, 'la sɛsʋa 'la gbʋ, Zozii ‑kʋa 'gbojlobhukua cɩ sa. 'Ylʋa yaanɩa dɩdɩ slo.
7Na, Samaliiŋlɔ bhlo ya 'nyu 'lukan ci. Zozii yɔɔ 'cla lebhe: «'Nyɩɩn 'nyu ɩya n 'ka 'mla.» 8Ɔla gɩlɩnyaa yaa 'dua 'kʋ lililɩɩ ‑pɩakan mʋ. 9Samaliiŋlɔa yɔɔ 'cla lebhe: «'Sʋɛ! ‑Mɔɔ Zifʋnyɔ*, ‑n 'clalɩɩn 'mlamlanyu, ‑amʋa ‑ɔ ‑glɩ 'lɛ Samaliiŋlɔ na!» ‑Masa, Zifʋnyaa 'taa ‑wa le maya Samaliinyaa 'ka wɔlɩ bhlogbɩɩ 'kʋwlalɩ na. 10Zozii yɔɔ 'cla lebhe: «‑N ‑kaa 'nanɩa Laagɔ nʋ 'lɛ ɩya ɔmɔa ‑ɔ clɔɔ 'lɛ lebhe: 'Nyɩɩn 'nyu ɩya n 'ka 'mla na ‑cia na, ‑mɔ ‑ɔ ‑cɩ kaa 'lɛ 'clalɩ ɩya ɔ 'kaa ‑mɔɔ 'lɛ 'nyua ‑ʋ 'nyɩ 'lɛ jabhʋa na 'nyɩ.»
11‑Ma 'ŋlɔa yɔɔ neencla lebhe: «‑Kwlenyɔ, ‑n 'ta 'nyulusonu ‑ka 'nyɩ 'gbojlobhukua tlʋʋn, na 'nda ‑n ‑cɩ kaa 'lɛ nyuu ‑naa ‑ʋ nyɩ 'lɛ jabhʋa na 'lɩlɩ bha? 12Ka ‑n zi 'lɛ ‑a tokadɔ Zakɔpʋ 'kʋ bha? Ɔmɔ ‑ɔ 'nyɩ 'lɛ ‑anyɩ 'gbojlobhuku ‑naa, ɔmɔ 'titi ya ʋla nɩkplaan 'la 'nyua 'mla, ɔya ɔla 'cuo, ɩya ɔla mla.» 13Zozii yɔɔ neenŋonu lebhe: «Ncaatʋtʋʋntʋa ‑ɔ mla 'lɛ nyuu ‑naa na, 'nyutʋ cɩ 'ka ka ‑azlɔɔ 'bhla. 14‑Ma ɔmɔa ‑ɔ ‑cɩ ka 'lɛ 'nyua n cɩ 'kɔɔ 'lɛ 'nyɩ na 'mla na, 'nyutʋ ‑ylɛylɛ cɩ 'takɩnɩɔ 'bhla. ‑Masa 'nyua n cɩ 'kɔɔ 'lɛ 'nyɩ na, ʋ cɩ 'kɔɔ nɩkplaan, 'nyukobhua jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na 'wlʋlʋ 'lɛ nɩkplaan na 'plɩlɩ.» 15'Ŋlɔa yɔɔ 'cla lebhe: «‑Kwlenyɔ 'maa 'nyɩɩn 'nyu ‑naa ɩya 'nyutʋ 'la kanɩɩn 'bhla ɩya 'na kanɩ ‑da 'nyulukan ci.»
16‑Ma Zozii yɔɔ 'cla lebhe: «Mʋ, la ‑n ‑ŋuto ɩya a cɔlɔ ‑da.» 17'Ŋlɔa yɔɔ neenŋonu lebhe: «N 'ta ŋodi ‑ka.» 18Zozii yɔɔ 'cla lebhe: «‑N ‑ka 'ge 'nyɩ n 'cla lebhe ‑n 'ta ŋodi ‑ka. ‑N ya ŋodie ‑ngbi 'cɩ 'nyɩ nclɔɔa cɩa ‑n ‑kʋnɩ 'lɛ ‑pɔtɔnʋ na, ɔ 'ta ‑n ‑ŋuto ‑glɩ. Ɩmɩ ‑naa 'kʋ, ‑n ya ‑nʋawlɛ nyɩtɛ.» 19'Ŋlɔa yɔɔ 'cla lebhe: «‑Kwlenyɔ, n lɩ lebhe ‑n ‑glɩ Laagɔnekʋnyɩtɛnyɔ*. 20‑A tokadɔcɩa ya 'kike ‑naa 'wlu gʋgwlalɩ 'nyɩ anyɩ, a cla lebhe Zolizalɛmʋ ɩ ‑fata 'lɛ le ma gʋgwlalɩ bha!» 21Zozii yɔɔ 'cla lebhe: «Kalɩ 'na pɔɔtɛtɛ, 'ŋwacɩa ci 'yɛpɩ, daa a cɩ 'tanɩ 'lɛ Toa 'kike ‑naa 'kʋ, ‑aana Zolizalɛmʋ gʋgwlalɩ na. 22A gʋgwla ɔmɔa a 'ta 'lɛ ‑ci na. ‑Anyɩ, ‑a gʋgwla ɔmɔa ‑a ‑ci 'lɛ na, sa Zifʋlɔlʋa nɩkplaan gbʋʋnsalɩɛa 'wlʋlʋ 'lɛ na. 23‑Ma 'ŋwacɩa ci 'yɛpɩ 'nyɩ ɛ ya tooto ŋeni, daa ‑nʋawlɛ ‑gʋgwlanyaa, cɩ 'ka 'lɛ Toa 'wugoa ɩya ‑nʋawlɛ nɩkplaan gʋgwlalɩ na, ‑masa 'sɛ 'la ‑gʋgwlanyaa Toa 'matɩ 'lɛ na. 24Laagɔ ‑glɩ 'Wugo, na 'sɛ 'la gbʋ dɛ ɩ ‑fata 'lɛ lebhe maa ‑ɔ gʋgwlɔɔ 'lɛ na, ma gʋgwlalɩɔ 'Wugoa 'la klalɩlɩɛ ɩya ‑nʋawlɛ nɩkplaan.» 25'Ŋlɔa yɔɔ 'cla lebhe: «N ci sɛɛ lebhe Laagɔ 'la ‑Sasanyɔa* cɩ 'ka ci, ɔmɔa ma la 'lɛ Klisi na. Daa ɔ cɩ 'ka 'lɛ ci na, ɔ cɩ 'ka ‑anyɩ wɔlɩa ‑tɛtɛa ‑zɔnsa.» 26Na, Zozii yɔɔ 'cla lebhe: «‑Amʋa ‑ɔ soluo 'lɛ na, ‑amʋ ‑ɔ ‑glɩɔ 'lɛ.»
27Daa Zozii ‑kʋa 'lɛ ɩmɩ ‑naa nyɩtɛda na, gɩlɩnyaa ya ci. Ma 'lɩ 'lɛ lebhe ɔya 'ŋlɔ nyɩtɛa na, nikpoo ya maa sla. ‑Ma bhlogbɩɩ 'tɔɔ neencla lebhe: «'Lɩsaa ‑n 'matɩa 'lɛ bha?» ‑Aana: «Wɔɔsaa ‑n ‑yɔɔsɔ nyɩtɛa 'lɛ bha?»
28Na, 'ŋlɔa ya dɩpɩa ɔla 'nyukondea te, ɔ ya duku mʋ 'nyɩ ɔ ya ncɛlɩ 'cla lebhe: 29«A ci a 'lɩmʋka nclɔɔ. Ɔ yaan 'na wɔlɩa 'fɩan n nʋ 'lɛ na solu. Laagɔ 'la ‑Sasanyɔa ɔ cɩ 'ta sɛɛ 'lɛ 'plɩ bha?» 30Na, Samaliinyaa ya ‑zɔnwlʋ, ma ya mʋ 'nyɩ ma ya Zozii ŋeni.
31'Dɛ 'la daa, gɩlɩnyaa bhibhiea 'mɔɔ 'nyɩ ma claa lebhe: «Canyɔ, 'maa li ‑na.» 32‑Ma ɔ ya maa 'cla lebhe: «N ‑ka nyacea, n 'ka 'lɛ li na, 'nyɩ a 'taa ‑ci.» 33Daa ɔ nyɩtɛ 'lɛ ‑sa na, gɩlɩnyaa 'claclalɩa neen lebhe: «Ka nclɔɔ bhlo ‑lɔɔ 'lɛ nyɩ bha?» 34Na, Zozii ya maa 'cla lebhe: «'Na nyɩa, ɩ ‑glɩ le n nʋ ɔmɔa ‑ɔ lobhuun 'lɛ na, ɔla pɔɔsa ɩya n bhɩalɩ lobholia ɔ 'nyɩɩn 'lɛ na. 35Anyɩ 'titi, 'a 'cla 'ta lebhe: ‑Ɔ ‑tonɩ 'cɩ ‑nmɔɔna ɩya gologololɩɩa 'la 'dɩdaa 'ka ŋeni bha? ‑Ma ‑amʋ, n solu anyɩ lebhe: A kope ka 'kwlɩa nɩkplaan, gologololɩɩa ya tooto zalɩ. 36Ɔmɔa ‑ɔ dɩ 'lɛ na, lɩnɩ tooto ɔla dluuplʋlɩɛa 'nyɩ ɔ 'wlalɩ 'caa jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na, nɩkplaan 'wlu le golonyɔa ɩya ɔmɔa ‑ɔ dɩ 'lɛ na, 'ka ‑pɔpʋɛ nebhlo nʋnʋ. 37Ma pa 'nine 'nyɩ ma cla lebhe: Bhlo golo 'nyɩ ‑anɔ bhlo dɩ 'lɛ. Ɩmɩ ‑naa nɩkplaan, ɩ ‑glɩ ‑nʋawlɛ. 38N ya anyɩ 'kwlaa nɩkplaan a 'ta ka azla 'lɛ lobholi nʋnʋ na, 'dɩlɩkan lobhu. ‑Buun ncɛlɩ ya lobholi nʋ, 'nyɩ anyɩ a lɩnɩ 'lɛ mala lobholia 'la ‑nvʋsʋɛa.»
39Duu ‑naa 'kʋ 'la Samaliinyaa ‑bhutukpa ya ɔla wɔlɩa ‑nʋawlɛ la, sa 'ŋlɔa ya ‑danʋfʋɛ li 'nyɩ ɔ ya maa 'cla lebhe: «Ɔ yaan ɩmɩa 'fɩan n nʋ 'lɛ na, solu.» 40Na, daa Samaliinyaa ŋeni 'lɛ Zozii cɩ na, maa yɔɔ bhibhie le ɔ kʋ maa cɩ. 'Nyɩ ɔ ya dɩpɩa clɩɩ ‑mɔsɔ li. 41Maa ‑ɔ zʋɔ mala pɔɔtɛtɛa 'kʋ, ɔmɔ 'titi 'la niwɔlɩa 'la gbʋ na, ma ‑zunɩ ‑awlɛ ‑gbɔɔn. 42'Nyɩ ma claanɩa 'ŋlɔa lebhe: «‑N 'tanɩ ‑naa niwɔlɩa bhlobhlo 'la gbʋ ‑tɛɛ ‑a 'tɔɔ 'lɛ ‑ala pɔɔtɛtɛa 'kʋ zʋ, ‑ma anyɩ 'titi ‑a yɔɔ neen 'nu 'nyɩ ‑a ‑ci sɛɛ lebhe ɔmɔ ‑ɔ ‑glɩ 'lɛ ‑zaagbʋsa ‑laagɔzɔan 'la gbʋʋnsanyɔa.»
Zozii ya 'cilee bhlo jabha
43Clɩɩ ‑mɔsɔ 'plɩ 'lɛ na, Zozii ya 'dɛ 'wlʋ 'nyɩ ɔ ya Galileebhlɩa 'kʋ mʋ. 44Ɔmɔ 'titi yaa 'cla lebhe Laagɔnekʋnyɩtɛnyɔ* 'ta ɔ 'bhlɩ 'ŋlɩ ‑ka. 45‑Ma daa ɔ ŋeni 'lɛ Galileebhlɩa 'kʋ na, Galileenyaa yɔɔ 'nanɩ kla, sa maa ‑ma, ma ya Zolizalɛmʋ, 'fɛtlɩa 'kʋ mʋmʋ 'nyɩ ma ya ɩmɩ 'fɩan ɔ nʋnʋa 'lɛ 'yɛpɩ na 'lɩ.
46Zozii ya Galileebhlɩa 'la 'dua ma la 'lɛ Kanaa na 'kʋ cɔlɔ, gbazɩa ɔ kacilia 'lɛ 'nyua ‑diinvɛɛan na. Goonvlalobholinʋyɔ 'kadie bhlo, ɔ ‑yowli 'taa ‑ja 'nyɩ ɔ ‑kʋa 'dua ma la 'lɛ Kapɛnayumʋ na 'kʋ. 47Ɔ ya 'nu lebhe Zozii ya Zudeebhlɩa 'kʋ 'wlʋ 'nyɩ ɔ ya Galileebhlɩa 'kʋ ci. Ɔ ya mʋ ɔ yɔɔ ŋeni 'nyɩ ɔ yɔɔ bhibhie lebhe ɔ mʋ Kapɛnayumʋ ɩya ɔ jabha ɔla 'cʋa ɔya 'kwɩ clɛ 'lɛ na. 48Zozii yɔɔ 'cla lebhe: «A 'ta 'ciinzizielɩlobholi ɩya nɩkposlaslawɔlɩ 'lɩ na, a cɩ 'ta kɩnɩ pɔɔtɛtɛ 'lɩ ‑na!» 49Nclɔɔa yɔɔ 'cla lebhe: «‑A to, mʋ 'faanfan daa 'na 'cʋa 'ta 'ka 'lɛ 'ku na.» 50Zozii yɔɔ 'cla lebhe: «Mʋ, ‑ma ‑naa 'cʋa ya jabha.» Nclɔɔa ya Zozii 'la niwɔlɩa ɔla pɔɔtɛtɛa 'kʋ zʋ 'nyɩ ɔ ya 'plɩ ɔ ya mʋ. 51Daa ɔ ‑kʋa 'lɛ mʋda na, ɔla lobhocuoa yɔɔ ‑gugwie 'kʋ cili 'nyɩ ma yɔɔ 'cla lebhe: «‑Naa 'cʋa ya jabha!» 52Ɔ ya maa neencla 'ŋwacɩa 'kʋa ɔ jabhaa 'lɛ na 'nyɩ ma yɔɔ neenŋonu lebhe: «‑Cɩpaa 'la 'plɩplɩylʋʋn 'la 'ŋwacɩ bhlo, dɛ wɔtlɩa 'wlʋɔ 'lɛ 'ciin.» 53'Cʋa toa ya cibhlili lebhe 'dɛ 'la 'ŋwacɩa 'kʋ 'titi Zozii 'cla 'mɔɔ 'lɛ lebhe: «‑N ‑yowli ya jabha.» 'Nyɩ ɔ ya pɔɔtɛtɛ 'lɩ, ɔmɔ ɩya ɔla 'slinyaa 'fɩan. 54Na, 'lɩka ‑mɔsɔ ‑ciinzizielɩlobholia Zozii nʋ 'lɛ daa ɔ 'wlʋ 'lɛ Zudeebhlɩa 'kʋ 'nyɩ ɔ cɔlɔ 'lɛ Galileebhlɩa 'kʋ na.
Currently Selected:
Zan 4: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.