2 Tes 3
3
A bhibhie ‑ala da
1Na, bholiecɩnyɩ, a bhibhie ‑ala da ɩya ‑Kwlenyɔ 'la wɔɔnyɩtʋa 'ka 'kʋklʋʋn mʋ ɩya ma 'kʋʋ 'klʋgba le saa ɩ 'plɩ 'lɛ anyɩ sidiin na. 2A bhibhie ‑awlɛ Laagɔ le ɔ ‑sa ‑anyɩ ‑abhɔlɛnyaa wlɩɩn, sa ‑n 'ta ncɛlɩa 'fɩan ‑ɔ 'ta 'lɛ Laagɔ la ‑pɔɔtɛtɛ -ka na. 3‑Kwlenyɔ glalɩ ɔla niwɔlɩa 'kʋ. Ɔ cɩ 'ka anyɩ 'tɛtɩ 'nyɩ, ɔ 'ka anyɩ 'klʋlɩ ɩya ‑Abhɔlɛnyɔa 'la 'ka anyɩ daanlɩ. 4'Nyɩ ‑a 'tɛlɩ anyɩ ‑deli 'kʋ ‑Kwlenyɔ 'la 'ŋlɩa nɩkplaan: ‑A ‑ci sɛɛ lebhe ɩmɩa ‑a cla 'lɛ anyɩ le a nʋ na, ka a nʋɩ 'nyɩ a cɩ 'ka ka ‑azlɩɩ nʋ. 5'Naa ‑Kwlenyɔa falɩ ala pɔlɩa Laagɔ 'la ‑walʋ 'bɩɩn ɩya ɔ 'nyɩ anyɩ Klisi 'la pɔɔklalɩɛa.
Ɩ ‑fata lebhe a nʋ lobholi
6Bholiecɩnyɩ, ‑a 'clalɩ anyɩ ‑Kwlenyɔ Zozi Klisi 'la 'ŋlɩa nɩkplaan, le a tlʋbhalɩ acɩ bholiecɩa ‑ɔ ‑ba 'lɛ 'nyɩ ‑ɔ 'plɩlɩ 'ta 'lɛ cacawɔlɩa ‑a te 'lɛ anyɩ na, 'kʋ na, cɩda. 7Anyɩ 'titi, a ‑ci saa a cɩ 'ka 'lɛ -anyɩ dɩbalɩdɩbalɩlɩ na. Sa, a 'bhlɩ, ‑a 'ta ‑babanya 'bhisa 'kʋ nʋ. 8‑A 'ta nclɔɔ bhlogbɩɩ 'kpɔkpɔ lililɩɩ ‑zla. ‑Ma, 'kwlɩbhɩɛ ɩya sɛsʋ nɩkplaan, zezezeliin ɩya bhlibhliylʋʋn, a ya lobholi nʋ, ‑a 'la ka sɛ anyɩ sidiin bhlogbɩɩ 'kʋ kʋlʋ. 9Ka ‑a nʋɩ 'lɛ ‑n 'ta lebhe, ‑a 'taa ala klalɩlɩɛ 'la ‑jioli ‑ka, ‑ma ‑a ya wabha lebhe ‑a ‑ka ncɛlɩa a 'ka 'lɛ dɩbalɩ na, 'plɩ. 10Na, daa ‑a ‑kʋa 'lɛ a 'bhlɩ na, ‑a ya anyɩ 'cla lebhe: «Ɔmɔa ‑ɔ 'ta 'lɛ wa lebhe ɔ ka lobholi nʋ na, ɩ 'ta ‑fata lebhe ɔ li.» 11'Bhlɩmɔɔn, ‑a 'nu lebhe anyɩ sidiin, ‑anʋa namʋ ‑babanya 'bhisa, ma nʋ 'ta lʋʋ ‑ylɛylɛ ‑n 'ta le ma 'ye 'la wɔlɩ nɩkplaan ‑bhlilie na. 12‑A 'clalɩ 'dɛ 'la ncɛlɩa, ɩmɩ ‑naa 'nyɩ ‑Kwlenyɔ Zozi Klisi 'la 'ŋlɩa nɩkplaan ‑a lo maa wlɩɩn lebhe: 'Naa ma kʋ 'cɩɩ ɩya ma nʋ lobholi ɩya 'ma 'ka mala neen 'la lʋʋ 'lɩ.
13‑Ma anyɩ, bholiecɩnyɩ, a 'la sɛa 'nanɩnʋlɩɛ 'kʋ. 14Ka nclɔɔ 'ta ɩmɩ ‑naa ‑a nyɩtɛ 'lɛ ‑afluwaa ‑naa nɩkplaan na 'kʋ 'plɩlɩ na, a zʋlʋɔ 'ci 'kʋ ɩya a ‑yɔɔsɔ 'la kalɩkalɩlɩanɩ ɩya ɩ 'kɔɔ ‑zo ‑pla. 15'Bhlɩmɔɔn, a 'la 'mɔɔ le ala ‑zɔbhɛlɩgbanyɔ, ‑ma a -sɔɔ 'bɩ lebhe a bholi.
'Nyupalɩɛ ɩya ‑ayopalɩɛ
16'Naa ‑Kwlenyɔa ‑ɔ 'nyɩ 'lɛ pupue na, ɔmɔ 'titi ɔ 'nyɩ anyɩ pupue clɩɩa 'fɩan ɩya saa 'fɩan nɩkplaan. 'Naa ‑Kwlenyɔa kʋ anyɩa 'fɩan cɩ. 17‑Amʋ Pɔlʋ 'titi -ɔ pa 'lɛ anyɩ ‑ayo. ‑Amʋ 'titi zʋ 'lɛ ‑afluwaa ‑naa sɔɔn, sa n nʋ ‑azla 'lɛ na. 18'Naa ‑Kwlenyɔ Zozi Klisi 'la 'nyupalɩɛ kʋ anyɩa 'fɩan 'kʋ.
Currently Selected:
2 Tes 3: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.