Tite 1
1
Litumeliso
1Liñolo le, li zwa Paulusi mutang'a Mulimu ni muapositola wa Jesu Kreste.
Ni beezwi ba ba ketilwe ki Mulimu ku ba isa mwa tumelo ni ku ba luta niti ya bulumeli bwa luna. 2Niti ye i libile kwa sepo ya bupilo ba bu sa feli. Mulimu ya sa pumi, u lu sepisize bupilo bo i sa li kwa makalelo. 3A bu bonahaza, ka nako ye swanela ka linzwi la hae. Ki sona se ni filwe ku bulela, mi ni si bulela ka taelo ya Mulimu Mupilisi wa luna.
4 #
2 Bakor 8.23; Magal 2.3; 1 Tim 4.10 Ni ñolela wena Tite, mwan'a ka wa niti mwa tumelo ye lu kopanezi.
Mulimu Ndate ni Jesu Kreste Mupilisi wa luna ba ku fe sishemo ni kozo.
Musebezi wa Tite mwa Kreta
5Ni ku siile mwa Kreta kuli u lukise lika kaufela ze ne tokwa ku lukiswa, ni kuli u beye bahulu ba keleke mwa minzi kaufela. U hupule likelezo za ka. 6#1 Tim 3.2-7 Muhulu wa keleke u swanezi ku ba mutu ya si na koli, mi ya si ka ba ni linyalo le liñwi hape. Bana ba hae ba swanezi ku ba balumeli, isiñi ba ba bulelwa ka ze maswe kamba ba ba sa utwi. 7Muhulu wa keleke ki ya zamaisa musebezi wa Mulimu, cwale u lukela ku sa ba ni mulatu. A si ke a ba ya itata, kamba wa kacimacima. A si ke a ba munwi wa bucwala, kamba mulwani, kamba ya putelela batu ka takazo ya mali. 8A be mutu ya na ni kamuhelo, ya lata ze nde. A be ya na ni buiswalo, ya lukile, ya kenile ni wa mikwa ye minde. 9U swanezi ku kumalela linzwi la niti, ka mo li lutezwi, kuli a kone ku kutaza ba bañwi ka lituto za niti, ni ku supeza ba ba li hanyeza kuli ba fosa.
10Kakuli ki ba bañata, sihulu mwahal'a balumeli ba Majuda, ba ba sa lati ku ya ka milao, mi ba ba puma ba bañwi ka ku bulela ze si na tuso. 11Ki swanelo mane ku ba kuzisa, kakuli ba filikanya mabasi kaufela ka ku luta ze sa swaneli, ili ka libaka le li swabisa la ku bata mali. 12Wahabo bona yo muñwi, ye ne li mupolofita, ki yena ya ize, “Makreta ki mahata, libatana ze maswe ni baci ba ba buzwa.” 13Mi s'a bulezi ki niti. Kabakaleo, u ba kalimele hahulu, kuli ba be ni tumelo ye lukile. 14U ba kalimele kuli ba si ke ba itinga fa matangu a sijuda ni kwa milao ya batu ba ba fulalezi niti. 15Ku ba ba kenile, linto kamukana li kenile. Kono ku ba ba tezi masila ni ba ba sa lumeli ha ku na se si kenile, kakuli minahano ni mazwalo a bona a silafalile. 16Ba bulela kuli ba ziba Mulimu, kono ba mu latula ka likezo za bona. Ba na ni lutimbo, ha ba utwi, mi misebezi ye minde kaufela ya ba palelwa.
Currently Selected:
Tite 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.