Estere 8
8
Majuda ba bulelelwa kuli ba itwanele
1Ka lona lizazi leo Mulena Asuerusi a fa Muoli Estere liluwo kaufela la Hamani, sila sa Majuda. Estere a bulelela mulena kuli Morodekai ki wahabo, mi cwale Morodekai a lumelelwa ku taha fapil'a mulena. 2Mulena a zwisa lisale la kwa munwana wa hae le li na ni liswayo, l'a n'a ngile ku Hamani, mi a li fa Morodekai. Estere a beya tutu ya Hamani mwa pabalelo ya Morodekai.
3Cwale Estere a bulela hape ku mulena, a ikwiseza kwa mahutu a hae a nz'a lila. A mu kupa kuli a felise mulelo o maswe wa Hamani, muikulu wa Agagi, ili mulelo w'a n'a ezelize Majuda. 4Mulena a mu supa ka mulamu wa bulena wa gauda. Cwale Estere a yema, mi a li, 5“Haiba muñ'a ka a lata cwalo, ni ku ni utwela butuku, mi haiba a bona kuli ku lukile, muñ'a ka, eza taelo ye ta hanisa mulelo wa Hamani ku ezahala, ili ona mulelo wani w'a n'a s'a ezize Hamani, mwan'a Hamedata muikulu wa Agagi, wa kuli ku bulaiwe Majuda kaufela ba ba mwa mubuso wo. 6Na, ni ka itiisa cwañi haiba ku zieleha ko ku cwalo ku tahela banabahesu, mi batu ba ku luna luli ba bulaiwa?”
7Cwale Mulena Asuerusi a li ku Muoli Estere ni Morodekai, wa Majuda, “A mu bone. Ni bulaile Hamani kabakala mulelo wa hae wa ku bulaya Majuda. Ni file Estere tutu ya hae. 8Kono zibiso ye ezizwe ka libizo la mulena ni ku kantiwa ka liswayo la bulena ha i konwi ku fetulwa. Nihakulicwalo, mwa kona ku ñolela Majuda ze mu lata kamukana. Mwa kona ku ñola ka libizo la ka mane ni ku kanta fateñi sikantiso sa bulena.”
9Taba ye i kile ya ezahala ka lizazi la bumashumi a mabeli ka a malalu mwa kweli ya bulalu, ili yona kweli ya Sivani. Morodekai a biza bañoli ba mulena, mi a t'o ba bulelela ze ne ba swanezi ku ñolela Majuda, babusi, bazamaisi ni manduna kamukana ba mwa linaha ze mwanda ka mashumi a mabeli ni ze supile ku kalela kwa India mane ku y'o fita kwa Etiopia. Mañolo a, n'a ñolezwi batu ba naha ni naha ka puo ya bona, ni kwa Majuda cwalo ka puo ya bona. 10Morodekai a ñolisa mañolo ao ka libizo la Mulena Asuerusi, mi a' kanta ka sikantiso sa bulena. A isiwa ki batu ba ba ne ba pahami fa lipizi ze zwa mwa mulaka wa bulena.
11Mañolo a, n'a talusa kuli mulena n'a lumelela Majuda, mwa munzi ni munzi, ku kopana hamoho ni ku itwanela. Haiba ba lwaniswa ki batu ba ba sweli lilwaniso, ba ka ba ba mushobo ufi kamba ufi, mwa naha ifi ni ifi, ba kone ku itamulela mi ba ba bulaye bona, basali ba bona ni bana cwalo. Ba ba feze mbuu, ni ku hapa bufumu bwa bona. 12Mulao wo, n'o swanezi ku sebeza mwa mubuso wa Peresia kamukana ka lona lizazi le ne li ketezwi pulao ya Majuda, ili lona lizazi la bulishumi ka a malalu la kweli ya Adara, yona kweli ya bulishumi ka ze peli. 13N'o swanezi ku huwelezwa kuli ki mulao, mi u zibiswe mañi ni mañi mwa naha ifi kamba ifi, kuli Majuda ba te ba kone ku itwanela kwa lila za bona lizazi leo ha li ka taha. 14Ka taelo ya mulena, bapahami ba lipizi ba pahama lipizi za bulena, mi ba funduka ka lubilo lo lutuna. Mulao wo, wa zibiswa cwalo ni mona mwa muleneñi wa Shushani.
15Morodekai a zwa mwa ndu ya mulena a apezi liapalo za bulena za mibala ya ndilu ni busweu, ni kubo ye nde ye puzwa, ni kuwani ya bulena ye nde hahulu ya gauda. Cwale mwa mikwakwa ya Shushani kwa utwahala miluluezo ni mihuwo ya tabo. 16Kwa Majuda ya ba tabo, buiketo, nyakalalo, ni maikuto a ku tula. 17Mwa manaha ni mwa minzi kamukana, mo ne ku balilwe zibiso yeo ya mulena, Majuda ba ba ni lizazi la pumulo, la tabo, la mukiti ni nyakalalo. Mi kaniti batu ba bañata ba fetuha Majuda, kakuli ne ba se ba ba saba ka yona nako yeo.
Currently Selected:
Estere 8: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.