2 Timotea 3
3
Mazazi a mafelelezo
1Cwale u zibe kuli ka linako za mafelelezo lu ka tahelwa ki butata. 2Batu ba ta ba baitati, ba ba lata mali, ba ba itumba ni baikuhumusi. Ba ta nyefula ni ku sa utwa bashemi ba bona, ba ba si na buitumelo ni ba ba hana za Mulimu. 3Ba ta ba batu ba ba si na lilato, ba ba na ni ñole, basebi, balwani, ba ba na ni situhu ni ba ba toya ze nde. 4Ba ta ba batu ba kalembeshwa, matanya, ba ba tezi muipo, mi ba ta tabela minyaka ku fita Mulimu. 5Ba ta likanyisa bulumeli bwa luna, kono ba ta hana maata a bona bulumeli bo. U zwe kwa batu ba ba cwalo. 6Ba bañwi ku bona ba kena mwa mandu, mi ba kolisa ka butali basali ba ba fokola, ba ba imezwi ki mulatu wa libi za bona, ni ku yaulukiswa ki litakazo za bona za mifuta-futa. 7Basali bao ba lika ku ituta nako kaufela, kono ha ba koni ku ziba niti. 8#Mut 7.11 Sina Janesi ni Jambresi ba ba ne ba hanyeza Mushe, ki mo ba inezi ni bona batu ba. Ba hanyeza niti. Ki batu ba minahano ye sa sebezi hande, ba ba palezwi mwa tumelo. 9Kono ha ba na ku zwelapili, kakuli mutu ufi ni ufi u ta bona bukuba bwa bona, sina mo ku ezahalezi ku Janesi ni Jambresi.
Likelezo ze ñwi
10Kono wena, u ni latelezi mwa lituto za ka, mwa muzamao wa ka, ni milelo ya ka. U boni tumelo ni pilu-telele ya ka, lilato ni ku itiisa kwa ka mwa butata. 11#Lik 13.14-52; 14.1-7, 8-20 U boni manyando ni maswenyeho a ka. U ziba ze ni tahezi kaufela mwa Antioke ni Ikone ni mwa Listra, ni manyando a matuna ao ni itiisize ku ona! Kono Mulena u ni lamulezi ku zona kaufela. 12Batu kaufela ba ba bata ku pila bupilo bwa sikreste ba ta nyandiswa. 13Ba ba maswe ni bapumi ba ta zwelapili mwa bumaswe. Ba ta puma ba bañwi, mi ni bona ba ta pumiwa. 14Haili wena, u tiyele ku z'o itutile ni z'o lumezi ka pilu ya hao kaufela. U ziba baluti ba hao kuli ne li bo mañi. 15Ku zwa kwa bwanana bwa hao u zibile Mañolo a Kenile, a' kona ku ku fa butali kuli u piliswe ka ku lumela ku Jesu Kreste. 16Mañolo kaufela a ñozwi ka susuezo ya moya wa Mulimu. A na ni tuso kwa ku luta niti, ku kalimela foso, ku lukisa milatu, ni ku fa likelezo ka bupilo bo bunde. 17Hape a na ni tuso kuli ya sebeleza Mulimu a be mutu ya itukisize hande ni ya na ni z'a tokwa kaufela ku eza misebezi ye minde kamukana.
Currently Selected:
2 Timotea 3: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.