2 Timotea 2
2
1Haili wena, mwan'a ka, u tiye ka maata a sishemo se ili sa luna ka Jesu Kreste. 2Z'o utwile ni li luta fapil'a lipaki ze ñata, u li fe batu ba ba sepahala, kuli ba li buluke, ili batu ba ba ta kona, ni bona, ku li luta ba bañwi.
3Cwale wena u itiise mwa manyando sina musole ya sepahala wa Jesu Kreste. 4Musole ya mwa ndwa, h'a lianganyiswi ki bupilo bwa ya sa lwani, kakuli yena u bata ku tabisa muzamaisi wa hae. 5Ya keni mwa siyano, h'a na ku fumana mupuzo, konji h'a ka buluka milao. 6Mulimi ya ezize musebezi o tata, u swanezi ku fumana kalulo ya pili ya kutulo. 7Nahana se ni bulela, mi Mulena u ka ku tusa ku utwisisa lika kaufela.
8Hupula Jesu Kreste, ya zusizwe kwa bafu, ya n'a li wa lusika lwa Davida, sina mo ku bulelelwa mwa Litaba ze Nde ze ni luta. 9Na nyanda kabakala ku luta Litaba ze Nde zeo, mane ni mwa mawenge inge sisinyi. Kono linzwi la Mulimu lona ha li si ka tamwa ka mawenge. 10Mi ki lona libaka ha ni itiisa mwa lika kaufela kuli ba ba ketilwe ki Mulimu ba fumane ni bona ku piliswa ko ku li teñi ku Jesu Kreste, hamohocwalo ni kanya ye sa feli. 11Pulelo ye ki ya niti, ye li,
“Haiba lu shwile ni yena,
lu ta pila ni yena.
12 #
Mat 10.33; Luk 12.9 Haiba lu zwelapili
lu nze lu itiisa mwa butata,
lu ta busa ni yena.
Kono haiba lu mu latula,
ni yena u ta lu latula cwalo.
13Ha lu sa sepahali, yena u ta ina a nz'a sepahala, kakuli h'a koni ku ipuma ili yena.”
Mubeleki ya lukile
14Hupulisa batu litaba ze, mi fapil'a Mulimu, u ba kupe kuli ba si ke ba kananisana kabakala manzwi. Likañi ze cwalo ha li na tuso. Li sinya feela ba ba teeleza. 15U like mo u konela kaufela ku lumelelwa kamita fapil'a Mulimu, sina mubeleki ya sa swabiswi ki musebezi wa hae, mi ya luta hande litaba za niti. 16U zwe mwa litaba za ku yambutuka feela, litaba ze si na tuso, ili ze lelekela feela batu kwahule ni Mulimu. 17Ze ba luta li ta swana ni limbongola le li ca nama. Baluti ba ba cwalo ba babeli ki bo Imeneo ni Fileto. 18Ba zwile mwa nzila ya niti, mi cwale ba sinya tumelo ya balumeli ka ku bulela kuli zuho ya luna i se i felile kale. 19#Lipa 16.5 Nihakulicwalo, mutomo o tiile, o tomilwe ki Mulimu, ha u konwi ku nyanganyiswa. Mi manzwi a, a ñozwi fateñi, “Mulena u ziba bao ili ba hae,” ni hape, “Mutu kaufela ya bulela kuli ki wa Mulena, a tuhele likezo ze maswe.”
20Mwa ndu ye tuna ku na ni mikeke ya kwiti ni ya mifuta-futa. Ye miñwi ki ya silivela ni ya gauda, mi ye miñwi ki ya likota ni ya lizupa. Ye miñwi i beezwi linako ze kutekeha, haili ye miñwi yona ki ya ku itusisa ka zazi ni zazi. 21Haiba mutu a ka ikenisa mwa bumaswe bo ni bulezi kaufela, yo u ta ba sina mukeke wa kwiti wa butokwa. U ta ba mutu ya ipeile ku Mulimu, ya ineezi ku sebeleza Muñ'a hae, mi ya itukiselize ku eza misebezi ye minde kamukana. 22U zwe mwa litakazo za bunca, mi u bate ze lukile, ili tumelo, litato, ni kozo, hamoho ni ba ba lapela libizo la Mulena ka pilu ye kenile. 23Kono u hane likañi za bukuba. Wa ziba kuli li fela ka likomano. 24Kanti mutang'a Mulena h'a lukeli ku ba wa likomano. U swanezi ku ba ni musa kwa batu kaufela, ku ba muluti ya butali, ni wa pilu-telele. 25U swanezi ku ba ya lukile h'a sikulula ba ba mu hanyeza. Mwendi Mulimu a ka ba fa sibaka sa ku baka ni ku ziba niti. 26Kihona ba ta ba ni ngana hape, ba picuke siteo sa Satani ya n'a ba sweli ni ku ba hapeleza ku eza tato ya hae.
Currently Selected:
2 Timotea 2: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.