2 Samuel 11
11
David i Bat-Shèba
1Den e temporada ku naturalesa a kuminsá biba atrobe — den tempu ku e reinan tin kustumber di bai guera — David a manda Yoab huntu ku su òfisirnan i henter e ehérsito di Israel bai bringa. Nan a destruí e amonitanan i a sitia Raba. David a keda Herusalèm.
2Un dia ora nochi tabata bai sera, David a lanta for di su kama pa e keiru riba e dak plat di su palasio. For di riba dak el a mira un hende muhé ku tabata baña; e muhé ei tabata mashá bunita pa mira. 3David a laga puntra ken e muhé tabata i nan a bis'é: ‘Wèl, ta Bat-Shèba, yu di Eliam; e ta kasá di Urías, e hetita.’ 4Despues di esei David a manda su mensaheronan bai busk'é. E muhé, ku a kaba di purifiká su mes despues di su dianan di regla, a bini serka David i David a drumi kuné. Despues el a bai su kas bèk. 5E muhé a sali na estado i a laga bisa David: ‘Mi ta spera un yu di bo.’
6E ora ei David a manda un rospondi pa Yoab: ‘Laga e hetita Urías bini serka mi.’ Yoab a manda Urías serka David. 7Ora Urías a yega David a puntr'é: ‘Kon ta ku Yoab i e sòldánan? Kon ta pará ku e guera?’ 8Despues David a bisa Urías: ‘Bai kas bai dal un baño.’ Urías a sali bai. Nan a trese un plato riku p'e, ku rei a manda. 9Pero na lugá di bai kas Urías a kai drumi na entrada di e palasio huntu ku tur e sirbidónan di su shon. 10Ora nan a bisa David: ‘Urías no a bai kas,’ David a bis'é: ‘N' ta di biahe bo a bini? Pakiko bo no a bai kas?’ 11Urías a bisa David: ‘E arka di aliansa i e ehérsito di Israel i Huda ta biba den tènt, mi shon Yoab i e òfisirnan spesial di mi shon rei ta kamper den fèlt; rei ta kere ku mi por bai kas bai kome, bebe i drumi ku mi kasá? Nunka di bo bida mi no ta hasi esei!’ 12David a bisa Urías: ‘Keda aki awe tambe, e ora ei mi ta laga bo bai mañan.’ Asina Urías a keda Herusalèm te e siguiente dia. 13David a kombidá Urías pa bin kome i bebe serka dje i a lag'é bebe burachi. Sinembargo anochi Urías a bai su lugá di drumi serka e sirbidónan di rei, e no a bai su kas. 14Su manisé David a skibi Yoab un karta i a laga Urías bai entreg'é. 15David a skibi den e karta: ‘Pone Urías te dilanti kaminda e bataya lo ta mas fuerte; despues lag'é keda e so, ya nan ta herid'é i e ta muri den bataya.’ 16Ora nan a ataká e siudat, Yoab a pone Urías kaminda e tabata sa ku e enemigu tabatin e sòldánan di mas balente. 17Ora e habitantenan di e siudat a lansa un atake kontra Yoab, algun di e sòldánan i algun di e òfisirnan di David a muri; Urías, e hetita, tambe tabata den esnan ku a muri. 18Yoab a laga un mensahero bai konta David kon e bataya a bai i 19el a orden'é: ‘Ora bo kaba di konta rei di a te zèt kon henter e bataya a bai, por ta 20rei rabia i bisa bo: “Pakiko boso a aserká e siudat tantu asina pa bringa; boso no a komprondé ku nan lo a tira riba boso for di riba muraya? 21Ken a dal Abimelèk, yu di Yerubeshèt, mata? N' ta for di riba e muraya di Tebes un hende muhé a tira un piedra di mulina riba dje i lag'é haña su morto asina? Pakiko boso a aserká e muraya tantu asina?” E ora ei bo mester kontest'é: “Bo sirbidó Urías, e hetita, tambe a muri.” ’
22E mensahero a bai i ora el a yega serka David, el a konta tur kos ku Yoab a mand'é bisa. 23E mensahero a bisa David: ‘E hòmbernan ei tabata mas fuerte ku nos i nan a sali bin ataká nos den fèlt. Pero nos a pone nan retirá te na entrada di porta di siudat. 24E ora ei e tiradónan di flecha a tira for di riba muraya riba e trupanan di su mahestat, di manera ku algun òfisir spesial di rei a muri; bo sirbidó Urías, e hetita, tambe a muri.’ 25E ora ei David a bisa e mensahero: ‘Bisa Yoab pa e no preokupá muchu pa e asuntu akí, den guera mester kai víktima, si no t'esun t'e otro. Ataká e siudat ku mas forsa ainda i destruyé. Kurashá Yoab asin'ei.’
26Ora Bat-Shèba a tende ku su kasá Urías a muri, el a tene luto p'e. 27Despues ku e tempu di rou a pasa, David a laga nan trese Bat-Shèba palasio. Bat-Shèba a bira muhé di David i a dun'é un yu hòmber. Pero loke David a hasi no tabata bon den bista di SEÑOR.
Currently Selected:
2 Samuel 11: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013