Nehemías 4
4
Sanbalat i Tobias ta chèrchè e hudiunan
1 # 4:1-23 ta korespondé ku v. 3:33—4:17 den teksto hebreo. Ora Sanbalat a tende ku nos tabata rekonstruí e muraya, e tabata skupi kandela di rabia; el a hasi chèrchè di e hudiunan. 2El a bisa den presensia di su koleganan i e sòldánan di ehérsito di Samaria: ‘Ta kiko e pobersitu hudiunan ei ta kere? Ku nan mes por hasi e trabou akí òf ku nan lo por ofresé sakrifisio atrobe? Nan ta kere ku nan por terminá e trabou den un dia? Òf ku nan por lanta e muraya ku e piedranan kimá ku nan a saka for di e ruina ei?’
3E amonita Tobias ku tabata pará banda di dje, a kontestá: ‘Ai, maske kuantu nan traha, un zoro so lo por basha e muraya di piedra ei abou, si e bula riba dje.’
Orashon di Nehemías
4E ora ei mi a resa: ‘Mi Dios, tende kon nan ta hasi chèrchè di nos ei. Laga nan ofensanan kai riba nan mes kabes. Entregá nan den man di enemigu komo botin i laga nan bai un pais strañero komo prezu. 5No pordoná nan maldat ni no sera wowo pa nan pikánan, pasobra nan a insultá esnan ku ta rekonstruí e muraya.’
Menasa di parti di e enemigunan
6Nos a sigui ku rekonstrukshon di e muraya i nos a yega na mitar di e altura nesesario, pasobra e pueblo tabata traha ku smak. 7Pero ora Sanbalat, Tobias i tambe e arabirnan, e amonitanan i e hendenan di Ashdod a haña sa ku rekonstrukshon di e muraya di Herusalèm tabata avansá i ku e burakunan den dje tabata kasi tur será, nan a bira furioso. 8Nan a sera kabes pa sali bai bringa kontra Herusalèm i bruha tera aya. 9Pero nos a resa na nos Dios i nos a pone guardia di dia i anochi pa defendé nos kontra nan. 10E hudiunan a bisa:
‘Nos no por karga kos mas,
e kantidat di piedra ta muchu grandi.
Nos no ta kapas pa rekonstruí e muraya akí.’
11Nos enemigunan a pensa ku nos lo no ripará nada te ora nan ta meimei di nos. E ora ei nan lo mata nos i para e trabou. 12E hudiunan ku tabata biba meimei di nan, a bin bisa nos mas ku dies bia di tur banda: ‘Boso mester bini bèk serka nos.’ 13E ora ei mi a ordená e hendenan bai para, famia pa famia, tras di e muraya, na e partinan mas abou di siudat, na e lugánan ku no tabata protegé, ku nan spada, lansa i bog den man. 14Ora mi a mira nan pará, mi a aserká nan i mi a bisa e siudadanonan prominente, e lidernan i sobrá di e pueblo: ‘Boso no mester tin miedu di e hendenan ei; kòrda kon grandi i temibel Señor ta. Lucha pa boso rumannan, boso yunan muhé i hòmber, boso kasá i boso kas.’
15Ora nos enemigunan a haña sa ku nos a deskubrí nan intenshon i ku Dios a frustra nan plannan, nos tur por a bolbe bèk na e muraya, kada ken na su trabou. 16-17For di e dia ei, mitar di mi hendenan tabata hasi e trabou i e otro mitar tabata tene warda, bon armá ku lansa, eskudo, bog i korasa. E lidernan di Huda a duna e pueblo ku tabata rekonstruí e muraya, tur nan apoyo. E kargadónan a sigui hiba karga, pero nan tabata traha ku un man i tabata tene lansa ku e otro man. 18Tur e trahadónan tabatin nan spada na kustia i banda di mi tabatin un hende kla pa supla kachu pa bati alarma. 19Mi a bisa e siudadanonan prominente, e lidernan i sobrá di e pueblo: ‘E trabou ta asina grandi ku nos ta plamá riba henter e largura di e muraya, leu for di otro. 20Asina boso tende kachu, boso mester djòin nos, nos Dios lo bringa pa nos.’ 21Asina ta ku nos tabata traha for di ora di dia habri te ora strea sali, miéntras ku mitar di e hòmbernan tabata karga lansa. 22Tambe mi a ordená e pueblo mesora pa kada hende ku su ayudantenan pasa nochi den Herusalèm pa nan tene warda durante anochi i traha den dia. 23Ni ami, ni mi famianan, ni mi sirbidónan, ni e guardianan ku tabata serka mi, no tabata kita paña, si no tabata pa dal un baño.
Currently Selected:
Nehemías 4: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013