Huan 13
13
Hesus ta laba pia di su disipelnan
1Fiesta di Pésag tabata serka i Hesus tabata sa ku su ora a yega pa bai laga e mundu akí i bai serka su Tata. Te na final El a sigui mustra su amor pa esnan ku riba e mundu akí tabata pertenesé n'E. 2Nan tabata sintá na mesa pa kome. Ya diabel a hinka e idea pa traishoná Hesus den mente di Hudas, yu di Simon Iskariot.#13:2 Ya…Iskariot; otro posibel tradukshon: Ya diabel a disidí ku Hudas, yu di Simon Iskariot, lo traishoná Hesus 3Hesus tabata sa ku Tata a dun'É poder riba tur kos, ku El a bini di Dios i ku E tabata bai bèk serka Dios. 4P'esei El a lanta for di mesa, kita su paña djariba i mara un paña na su sintura. 5Despues El a basha awa den un kòmchi i a kuminsá laba pia di e disipelnan; ku e paña mará na su sintura, E tabata seka nan pia. 6A yega turno pa laba pia di Simon Pedro. Pedro a bis'É: ‘Señor, Abo, laba mi pia?’ 7Hesus a kontest'é: ‘Awor akí bo no ta realisá kiko Mi ta hasiendo, ma lo bo komprondé, despues ku tur kos ta tras di lomba.’ 8Pedro a rospond'É: ‘Mi n' ta laga Bo laba mi pia, hamas i nunka!’ Hesus a kontest'é: ‘Si Mi no laba bo pia, bo no ta pertenesé na Mi.’ 9Simon Pedro a bis'É: ‘Señor, no laba mi pia so antó; laba mi man i mi kabes tambe!’ 10Hesus a sigui bis'é: ‘Esun ku a baña su kurpa kaba ta kompletamente limpi, ta su pia so e mester laba ainda. Ma boso tur, ménos un, ta puru kaba.’ 11El a bisa asina, pasobra E tabata sa kaba ken tabata bai traishon'É.
12Ora Hesus a kaba di laba nan pia, El a kohe su paña djariba, bolbe tuma lugá na mesa i puntra nan: ‘Boso sa kiko Mi a hasi ku boso? 13Ku rason boso ta yama Mi “Maestro” i “Señor”, pasobra esei Mi ta. 14Ke men, si Ami, boso Señor i Maestro, a laba boso pia, boso tambe mester laba pia di otro. 15Mi a duna boso un ehèmpel pa boso tambe hasi pa otro loke Ami a hasi pa boso.#Mateo 20:28; Marko 10:45; Lukas 22:27 16Mi ta sigurá boso: Un sirbidó no ta mas altu ku su shon,#Mateo 10:24; Lukas 6:40; Huan 15:20 ni un mensahero no ta mas altu ku esun ku a mand'é. 17Awor ku boso sa e kosnan akí, boso lo ta felis si boso hasi nan tambe.
18Mi no ta papiando di boso tur; Mi sa ta ken Mi a skohe. Ma e palabranan akí di Skritura mester keda kumpli: “Esun ku a kome huntu ku Mi, a lanta kontra Mi.”#Salmo 41:9 19Mi ta konta boso e kos akí, promé ku e sosodé. Ya boso ta kere e ora ei ku “AMI TA”. 20Mi ta sigurá boso: esun ku risibí un hende ku Ami manda, ta risibí Mi mes. I esun ku risibí Mi, ta risibí Esun ku a manda Mi.’#Mateo 10:40; Marko 9:37; Lukas 9:48; 10:16
Hesus ta bisa ken lo traishon'É
(Mateo 26:20-25; Marko 14:17-21; Lukas 22:21-23)
21Despues di a papia asina, Hesus a bira tur sobresaltá i testiguá: ‘Mi ta sigurá boso: un di boso lo traishoná Mi.’ 22E disipelnan a keda mira otro. Nan no tabata sa ta ken E ker a men. 23Un di nan, e disipel ku Hesus tabata stima mashá, tabata sintá serka di Hesus. 24Simon Pedro ku seña a pidié puntra Hesus ta ken E ke men. 25E disipel a lèn patras, hala mas serka Hesus i puntr'É: ‘Señor, ta ken?’ 26Hesus a kontestá: ‘Mi ta dòp pida pan den skalchi; esun ku Mi duna e pan t'e ta e persona!’ Anto Hesus a kohe pida pan, dòp e den skalchi i duna Hudas, yu di Simon Iskariot. 27Na momento ku Hudas a tuma e pan, satanas a drent'é. Hesus a bis'é: ‘Hasi loke bo tin ku hasi lihé!’ 28Niun di e otro disipelnan sintá na mesa no tabata sa pakiko Hesus a bisa Hudas asina. 29Algun di nan a pensa ku ya ku Hudas tabata tene e kaha di plaka, Hesus a enkarg'é pa e bai kumpra loke nan tabatin mester pa e dianan di fiesta òf pa e bai duna hende pober algu. 30Hudas a tuma e pan i a sali bai mesora; nochi a sera.
Un mandamentu nobo
31Despues ku Hudas a sali bai, Hesus a bisa: ‘Awor Yu di hende ta haña gloria i Dios ta haña gloria dor di djE. 32Si Dios haña gloria dor di djE, Dios lo demostrá gloria di Yu di hende den Dios mes tambe i Dios ta bai hasi esaki umbe aki. 33Mi yunan stimá, lo Mi no ta pa muchu tempu mas huntu ku boso. Boso lo buska Mi i manera Mi a bisa e outoridatnan hudiu, asina Mi ta bisa boso awor akí tambe: Kaminda Mi ta bai, boso no por bini.#Huan 7:34 34Mi ta duna boso un mandamentu nobo: Stima otro! Manera Ami a stima boso, asina boso tambe mester stima otro.#Huan 15:12,17; 1 Huan 3:23; 2 Huan 5 35Si boso stima otro, tur hende lo sa ku boso ta mi disipel.’
Hesus ta bisa delantá ku Pedro lo neng'É
(Mateo 26:31-35; Marko 14:27-31; Lukas 22:31-34)
36Simon Pedro a puntra Hesus: ‘Señor, unda Bo ta bai?’ Hesus a rospond'é: ‘Kaminda Mi ta bai, bo no por sigui Mi awor akí, ma despues lo bo sigui Mi.’ 37Pedro a bisa: ‘Señor, pakiko mi no por sigui Bo awor akí? Mi ta entregá mi bida pa Bo!’ 38Hesus a bis'é: ‘Bo ta entregá bo bida pa Mi? Mi ta sigurá bo: promé ku gai kanta, lo bo a nenga tres be kaba ku bo konosé Mi.
Currently Selected:
Huan 13: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013