Huan 11
11
Lázaro a bai sosegá
1Un sierto hòmber, yamá Lázaro, a bira malu. E tabata biba na Betania, e pueblo kaminda Maria i Marta, ruman muhé di Maria, tabata biba.#Lukas 10:38-39 2E Maria akí tabata e mesun ku a hunta Hesus su pia ku perfume i seka nan ku su kabei; e hòmber malu tabata su ruman.#Huan 12:3 3E ruman muhénan a manda bisa Hesus: ‘Señor, esun ku Bo ta stima, ta malu.’ 4Ora Hesus a tende e notisia, El a bisa: ‘E malesa akí no ta resultá den morto, ma ta pa duna Dios gloria; pa medio di e malesa ei Yu di Dios lo haña gloria.’ 5-6P'esei ora Hesus a tende ku Lázaro tabata malu, El a keda dos dia mas kaminda E tabata, ounke E tabata stima Marta i su ruman muhé i Lázaro. 7Mas despues El a bisa su disipelnan: ‘Laga nos ban Hudea atrobe.’ 8Ma su disipelnan a bis'É: ‘Rabi, n' ta ki dia ei e hendenan di Hudea tabata buska Bo pa piedra; anto Bo ke bai atrobe?’ 9Hesus a kontestá nan: ‘Durante un dia no ta diesdos ora tin lus? Si un hende kana den dia e no ta trompeká, pasobra e ta mira e lus ku ta bria riba mundu. 10Ma si un hende kana anochi e ta trompeká, pasobra e no tin lus pa lag'é mira.’
11Hesus a agregá na loke El a kaba di bisa: ‘Nos amigu Lázaro a bai sosegá, ma Ami ta bai lant'é.’ 12Su disipelnan a kontest'É: ‘Si ta sosegá e ta sosegá su kurpa, lo e rekuperá.’ 13Hesus tabata ke men ku Lázaro a muri, ma nan tabatin den nan kabes ku ta tokante sosiegu di soño Hesus tabata papia. 14P'esei Hesus a bisa nan bon kla: ‘Lázaro a muri, 15ma Mi ta kontentu pa boso ku Mi no tabata serka dje, p'asina boso kere. Ban serka dje.’ 16E ora ei Tomas, yamá tambe ‘Ohochi’, a bisa e otro disipelnan: ‘Laga nos tambe ban huntu kunÉ, ya nos ta muri huntu kunÉ!’
Hesus ta resurekshon i bida
17Ora Hesus a yega, El a tende ku nan a dera Lázaro kuater dia pasá kaba. 18Betania tabata keda serka di Herusalèm, mas o ménos tres kilometer leu; 19p'esei hopi hende djei a bini serka Marta i Maria pa konsolá nan ku morto di nan ruman.
20Ora Marta a tende ku Hesus tabata na kaminda, el a bai kontr'É. Maria a keda kas. 21Marta a bisa Hesus: ‘Señor, si Bo tabata aki, mi ruman lo no a muri. 22Ma te ainda mi ta konsiente ku si Bo pidi Dios algu, lo E no nenga Bo!’ 23Hesus a bis'é: ‘Bo ruman lo lanta for di morto.’ 24Marta a rospond'É: ‘Mi sa ku e ta lanta for di morto, riba e último dia, ora Dios lanta tur morto.’#Daniel 12:2; 2 Makabeonan 7:2 25Hesus a bis'é: ‘Ami ta resurekshon i bida; esun ku kere den Mi, lo biba asta si e muri.#Romanonan 6:4-5; Kolosensenan 2:12 26I niun hende ku tin bida eterno, lo no muri nunka mas. Bo ta kere esaki?’ 27Marta a kontest'É: ‘Sí, Señor, ya mi a kere kaba ku Abo ta e Mesias, e Yu di Dios, ku a bini na mundu.’
Hesus ta yora
28Despues di a bisa asina, Marta a bai kas bèk i bisa su ruman Maria ketu ketu: ‘Maestro ta aki; E ke papia ku bo.’ 29Asina Maria a tende loke Marta a bis'é, el a lanta mesora bai serka Hesus. 30Hesus no a drenta e pueblo ainda, ma tabata na e lugá kaminda Marta a kontr'É. 31Ora e hendenan ku tabata konsolá Maria na kas, a mir'é lanta bai purá, nan a siguié. Nan a pensa ku ta graf di Lázaro e tabata bai bishitá pa yora morto di su ruman.
32Maria a yega kaminda Hesus tabata i asina el a mira Hesus, el a tira su kurpa abou na suela su dilanti i a bis'É: ‘Señor, si Bo tabata aki, mi ruman lo no a muri.’ 33Ora Hesus a mira Maria i e hendenan ku a siguié ta yora, El a bira perturbá; loke El a mira a traha riba djE. 34El a puntra: ‘Unda boso a der'é?’ Nan a kontestá: ‘Señor, bin mira.’ 35Hesus tabata yora. 36E hendenan a komentá: ‘Mira kuantu E tabata stima Lázaro!’ 37Ma otronan a laga sa: ‘E ku por a duna e siegu bista, no por a hasi tambe ku e hòmber akí no a muri?’
Hesus ta lanta Lázaro for di morto
38Hesus a bolbe bira perturbá; El a bai na e graf, ku tabata un kueba tapá ku un piedra na entrada. 39El a ordená: ‘Kita e piedra.’ Marta, ruman di e defuntu, a bis'É: ‘Ma Señor, e morto ta hole kaba; e tin kuater dia morto!’ 40Hesus a kontest'é: ‘Mi no a bisa bo ku si bo kere, bo ta mira gloria di Dios?’ 41E ora ei nan a kita e piedra. Hesus a hisa su kara na shelu i bisa: ‘Tata, Mi ta gradisí Bo ku Bo a skucha Mi. 42Mi sa ku semper Bo ta skucha Mi, ma ta pa e multitut ku ta rondoná Mi aki tende, Mi ta bisa esaki. Ya nan por kere ku ta Abo a manda Mi.’ 43Despues di a resa asina, El a bisa na bos altu: ‘Lázaro, sali pafó!’ 44E defuntu a sali ku man i pia lorá den paña i kara mará ku lensu. Hesus a bisa nan: ‘Kita e pañanan ei for di su kurpa i lag'é bai.’
Kòmplòt pa mata Hesus
(Mateo 26:1-5; Marko 14:1-2; Lukas 22:1-2)
45Hopi hende ku a bin bishitá Maria i mira kiko Hesus a hasi, a kere den djE. 46Algun hende a bai konta e fariseonan loke El a hasi. 47Esei a pone ku saserdotenan importante i fariseonan a reuní ku Konseho Supremo i bisa: ‘E hòmber akí ta hasi hopi milager i nos, kiko nos mester hasi? 48Si nos lag'é sigui asin'akí, tur hende ta bai kere den dje i e romanonan ta bin kita nos for di nos lugá#11:48 nos lugá, esta nos lugá santu, den sentido di tèmpel òf e siudat Herusalèm i nos nashon for di nos.’#11:48 ta bin kita…nos; otro posibel tradukshon: ta bin destruí nos lugá i nos nashon 49Kaifas, ku tabata gransaserdote den e aña memorabel ei, a bisa nan: ‘Usa boso sintí! 50Boso no ta realisá ku ta kumbiní boso laga ún hende muri, en bes di pèrmití destrukshon di henter pueblo?’ 51Kaifas mes no a realisá importansia di su palabranan, ma komo gransaserdote den e aña memorabel ei, el a profetisá ku Hesus mester a muri pa henter e pueblo. 52No solamente pa e pueblo hudiu, ma tambe pa trese tur yu di Dios ku ta plamá, huntu i hasi nan ún.
53P'esei for di e dia ei e outoridatnan hudiu a traha plan pa mata Hesus. 54Anto pa e motibu ei Hesus no tabata bia públikamente mas entre e hendenan di Hudea, sino El a bai e region serka di desierto, i fo'i djei El a bai un siudat yamá Efraim. El a keda aya, huntu ku su disipelnan.
55Fiesta di Pésag, un fiesta hudiu, tabata serka i hopi hende di kunuku tabata subi bai Herusalèm, promé ku e dia di fiesta pa kumpli ku seremonia di purifikashon. 56Nan tabata buska Hesus pa mira i pará den tèmpel nan tabata puntra otro: ‘Kiko boso ta pensa? Lo e bini fiesta di Pésag?’ 57A sosodé ku e fariseonan i e saserdotenan importante a duna òrdu pa ken ku sa Hesus su paradero, denunsi'É, ya por koh'É prezu.
Currently Selected:
Huan 11: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013