Filipianina 2
2
Miombona sy manetry tena
1Koa raha mba manana famporisihana ao amin’i Kristy koa ianareo, na manana fanalana alahelo amin’ny fitiavana ihany, raha mba misy firaisam-po amam-panahy koa amintsika, ka mba misy fitserana amam-pangorahana ahy ihany aminareo, 2dia fenoy tanteraka ny hafaliako amin’ny firaisanareo saina, ka hiray fitiavana, hiray fo, hiray hevitra, 3tsy hanao na inona na inona amin’ny fifampiandaniana na filan-dera foana, fa samy hanetry tena sy hanao ny namany ho ambony noho ny tenany avy, 4samy tsy hihevitra ny azy ihany, fa ny an’ny namany koa.
5Manàna izao saina amam-po hita tao amin’i Kristy Jesoa izao#2,5-11 Andininy malaza ireo, fa fanaperam-boninahitr’i Kristy no hita eo, sady tsy nampoizina amin’ny taratasy tsotra foana.: 6na dia tao amin’ny fomban’Andriamanitra aza Izy, dia tsy nihevitra ny fitoviany saranga amin’Andriamanitra ho zavatra nobaboiny#2,6 Ho zavatra nobaboiny; ho zavatra famikitra, sarotra hafoy, fa nafoiny tokoa, nialany. Ny fitoviany saranga, sns. Tsy ny fomban’Andriamanitra tsy azo ialana izany, fa ny haja sy voninahitra fanome Azy., 7fa nialany izany tamin’Izy naka ny fomban’ny mpanompo#2,7 Ny fomban’ny mpanompo, ny fombantsika olombelona., ka tonga mitovy amin’ny olombelona, sy hita ho olombelona tamin’ny fisehoany rehetra, 8ary nilatsa-tenany ho ambany, nanolo-tena hanaiky hatramin’ny fahafatesana, dia fahafatesana tamin’ny Hazofijaliana. 9Ho valin’izany kosa, dia nasandratr’Andriamanitra ambony indrindra Izy, sy nomeny Anarana mihoatra#2,9 Nomeny anarana mihoatra: Izany hoe: nomeny fahamboniana sy voninahitra mendrika an’Andriamanitra, nasehony ho Andriamanitra tamim-boninahitra lehibe - na angamba tena anarana no hevitr’izany, toy ny hoe: Jesoa Kristy Tompo amin’ny and faha-11. ny anarana rehetra, 10mba handohalika amin’ny Anaran’i Jesoa avokoa ny lohalika rehetra, na ny any an-danitra, na ny etỳ an-tany, na ny any ambany, 11ary mba hanaiky avokoa ny lela rehetra fa i Jesoa Kristy dia Tompo efa niditra amin’ny voninahitr’Andriamanitra Ray.
12Noho izany, ry malalako, efa nanaiky mandrakariva koa ianareo, ka miasà amin-tahotra sy hovitra hanapitra ny famonjenareo tena, tsy tahaka ny fony aho tany aminareo fotsiny, fa mihoatra noho izany aza amin’izao aho tsy any aminareo izao, 13fa Andriamanitra no manao ao aminareo ny mikasa sy ny manao, sy hanatanteraka ny hevi-pitiavany ny aminareo. 14Ataovy tsy amim-pimonjomonjoana sy tsy amim-pisalasalana ny zavatra rehetra, 15mba ho madio tsy manan-tsiny, ary zanak’Andriamanitra tsy misy kiany ianareo eo afovoan’ny karazan’olona ratsy sy mafy fo, izay amirapiratan’ny tenanareo tahaka ny fahazavana amin’izao tontolo izao, 16mitana ny tenin’ny fiainana; dia hisy ho reharehako amin’ny andron’i Kristy, fa tsy ho nihazakazaka foana aho, na ho nisasatra foana. 17Ary faly aho na dia ny tenako aza no haidina#2,17 No haidina, sns. Na dia ny rako aza no hatao fanidina toy ny divay fampombaina ny sorona fahiny. hampombaina ny fanolorana amam-pisoronan’ny finoanareo, ka miara-mifaly aminareo rehetra. 18Mifalia amin’izany koa ianareo, ary miaraha mifaly amiko.
Asa anirahana an’i Timote sy i Epafrôdita
19Manantena ao amin’i Jesoa Tompo aho fa haniraka an’i Timote faingana aty aminareo, mba hifaliako koa rehefa reko ny toetranareo; 20fa tsy manana olona miray fo amiko sy mazoto miahy anareo toy izany aho. 21Ny rehetra#2,21 Ny rehetra. Mety hisy avaka ihany izany, ohatra: amin’ireo derainy ho tsara: 1,15.16. dia samy miahy ny azy avy, fa tsy ny an’i Jesoa Kristy; 22izy kosa dia fantatrareo fa lehilahy voazaha toetra tokoa; niara-niasa tamiko tamin’ny Evanjely izy, toy ny zanaka miaraka amin-drainy. 23Koa dia manantena ny haniraka azy ho atỳ aminareo aho, raha vao hitako izay ho toetrako. 24Ary na dia ny tenako aza, araka ny tokiko ao amin’ny Tompo, dia mbola ho avy faingana koa.
25Nihevitra anefa aho fa i Epafrôdita rahalahiko, sady mpiara-miasa sy mpiara-miady amiko, ary irakareo hanompo ahy amin’ny zavatra ilaiko, dia tokony hampandehaniko hankatỳ aminareo aloha; 26fa efa manina anareo rehetra izy, sady nalahelo noho ny nandrenesanareo azy hoe narary. 27Narary saika maty tokoa izy, fa Andriamanitra namindra fo taminy; ary tsy taminy ihany fa tamiko koa, mba tsy hananako alahelo mitongoa alahelo. 28Koa dia ny nandefa azy no nahazoto ahy kokoa, mba hifalianareo amin’ny fahitana azy indray, sy hahamaivamaivana kokoa ny alaheloko. 29Raiso an-kafaliana ao amin’ny Tompo àry izy; ary hajao ny olona toy izany; 30fa ny raharahan’i Kristy no saika nahafaty azy; ary ny fanefana ny fanompoana ahy tsy efanareo no nanaovany ny ainy tsy ho zavatra
Currently Selected:
Filipianina 2: MBC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Baiboly Katolika © La Société Biblique Malgache, 2003.