Yakub 3
3
Ɗel koyya
(Mat 12:33-37)
1Mbi ná vya ma, na ka go naa ge hate naa ma ka gḛ to, ne da pe, aŋ da ne kwarra go a mbo kun sarya nee pal ndaar kaka. 2Ago, nee pet nee ke sone ke. Kadɗa ndu a̰me ke sone fare janna zi to, a ndu ge ɗeŋger ge ne mbya wan na duur mwaɗak ne. 3Swaga ge nee ne kan arjam tisi ma wak zi ndwara e nama gwan ne bama pala nee pe se, nee e nama duur mwaɗak ke laar ɓyareya ge nee ne. 4Ndi me fak ga̰l ma gale: ga̰l ge nama ne, ne saam ge ndaar ne ɓyan nama no puy ɗe, ne firbo vya ge jyale baba, bage ne ka ne fak pe go pil na mbo swaga ge na laar ne ɓyare go. 5Go no me, ɗel a kaŋ vya ge jyale cecḛ ge duur ne, uware tene da ne kaŋ ge ɓaŋlaŋ ma. Ndi me gale, ol vya ge cecḛ til murum ge ɓaŋlaŋ. 6Ɗel a ol ne me, a dunya ge be dosol to ne, ge ne nee duur zi ne, a na hat duur mwaɗak seŋgre ne. Til katɗa ge nee ne mwaɗak, na sḛ ol ge Jahanama ne mbo til na. 7Naa dasana ma da ne pool cwage kavaar ga̰l ge ful zi ge ma ya se, ne njoole ma, ne kaŋ ge ne sar ne bama pul ma, ne sii ma me, 8amma a day ge cwage ɗel ya se to. A kaŋ ge sone ge ndu ne day wan na se to ne. Wi da ne jam ge pore ge hun siya. 9Nee uware Báá Bageyal da ne na, nee ka vḛne nee wak naa dasana ma ge Dok ne dó nama na kḭḭm zi ma pal ne na me. 10Ne wak ge ɗu mbe, uwareya ma ne wak vḛneya ka wat ne zi ya ɗaa? Ná vya ma, be ke kwaɗa na kat go mbe to. 11Tub ge ɗu da ne pool só mam ge tuli ma ne mam ge zwala ɗaa? 12Mbi ná vya ma, fere da ne pool tol uwara Olive ɗaa, ko oyo̰r da ne pool tol fere ɗaa? Tub ge mam yuwam ne pool ge só mam ge tuli to.
Zwama ge ne mbo ne digi ya
13Ndu a̰me ne aŋ buwal zi ndil tene go na zwama ko ɗalla ɗaa? Na ŋgay na ne mborra ge kwaɗa ge na ne, ne bama temel kerra ge suul ne ge zwama. 14Amma kadɗa aŋ da ne yil ge sone aŋ dulwak ma zi, ne dwatɗa ge ta̰me ma, uware me ta go aŋ zwama to, kṵ me hale fareba pal to. 15Zwama hir ge go mbe no be mbo da ne digi ya to, a ge suwar ne ne, duur ne, ne ge o̰yom ge seŋgre ne. 16Ago swaga ge yil ma ne o̰yom ge ta̰me ne go, bataraŋ ma ne kaŋ kerra ge sone ge daage ya go me. 17Amma zwama ge ne mbo ne digi zi ya a harcal gale ɓya, ɓyare swaga katɗa ge halas, suul, ne lwalwagat, wiya ne kwa a̰se ma ne kaŋ kerra ge kwaɗa, be vareya, be ndwara mbuɗiya. 18Nama ge ne ke temel ne katɗa halas pe ma, zare halas zi, siyal ge na ne mbo kat kaŋ kerra ge dosol.
Currently Selected:
Yakub 3: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.