Galatiya ma 6
6
Ḭ me ta dṵṵl ma
1Ná vya ma, kadɗa aŋ ɓol ndu a̰me ya sone a̰me zi, aŋ ge O̰yom ne aŋ zi, ɗwabe me na ne o̰yom ge suul. Mo me, ke haŋgal, na kaage mo dé pe herra mbe zi to. 2Ḭ me ta dṵṵl ma, go no aŋ wi eya ge Kris ne wak. 3Ago kadɗa ndu a̰me ndil tene go na mbyatɗa, é no na sḛ a̰me pe ne to, na sḛ lase tene. 4Amma ndu ge daage na hale kaŋ kerra ge na ne, go no ba ɓol fare ge uware tene, na ka fare ge na ne be fare ge ndu ge ɗogle ne to. 5Ago ndu ge daage mbo in dṵṵl ge na ne.
6Ndu ge a ne hate na fare ge Dok na, na va na kaŋ kwaɗa ma ne ndu ge ne hate na. 7Lase me ta to, a ke Dok kalam to. Ago kaŋ ge ndu ne zare na, syat na. 8Ndu ge ne zare sḛ duur ge na ne pal, ne sḛ duur ta, syat hubul. Amma ndu ge ne zare O̰yom zi, ne O̰yom ta, syat ndwara ge ɗiŋnedin. 9Ka̰ me nee ta se be ge ke kaŋ ge kwaɗa to to. Ago dam ma mbo ya go, nee mbo syat na, kadɗa nee be kan ta se to. 10Ne no pe ɗe, tek ge swaga gale ne go, ke me nee temel ne kwaɗa ge naa ne pe pet, amma ne ná vya ge hon fareba ma pe gale ɓya.
Yuwaleya ge go̰r dab ne wak sanna
11Ndi me kaŋ njaŋgeya ge ga̰l ɓogo ɓogo mbe no, a mbi sḛ njaŋge aŋ na ne mbi tok zi ne. 12Naa ge a ne ɓyare ke ta kwarra le duur go ma, a nama e aŋ vyan ba̰y ne, nama ɗeŋgo go, na kaage a ke bama yál ne kaŋgre ge Kris ne pe to. 13Ago naa ge a ne vyan ba̰y mbe ma sḛ puy, a mbo ne Eya pal to, amma a ɓyare go aŋ vya̰ ba̰y, ne da pe bama ba gá uware ta ne aŋ. 14Amma mbi ɗe, kaŋ ge ɗogle ge mbi uware tene ne na to, mbi uware tene da ne kaŋgre ge nee Bageyal Jeso Kris ne ɗeŋgo, na ge ne na ta, dunya ne pé kaŋgre pala digi ne mbi pe, dimma ne a ne pé mbi kaŋgre pala digi ne dunya pe go no me. 15Ago ko ba̰y vyanna, ko ba̰y vyanna to, a be a̰me ne to, amma ge ne waɗe a go mo ka dolla ge giya̰l. 16Ne nama ge ne mbo ne wak yuwaleya mbe no pal ma pe pet, halas ma ne kwa a̰se ge Dok ne ka ne nama, nama ka ne Israyela ge Dok ne me.
17Ne gá ne zḛ no, ndu a̰me na iigi mbi to, ago mbi da ne pyalaŋ ma ge Jeso ne ne mbi duur ta. 18Ná vya ma, kwa a̰se ge nee Bageyal Jeso Kris ne na ka poseya ne aŋ pet. A go!
Currently Selected:
Galatiya ma 6: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.