Galatiya ma 1
1
Wak sanna
1Mbi Bulus, bage temeya, a be ne naa dasana ma ta to, ko ne laar ɓyareya ge ndu ne ta to, amma ne Jeso Kris ma ne Báá Dok, na ge ne ta̰ na ne naa ge siya ma buwal zi digi ta, 2ɓanna ne ná vya ma pet nama ge ne ka ne go poseya ne mbi ma, i teme maktub hon ɓase ge Dok ne ma ge ne suwal Galatiya go ma. 3Kwa a̰se ma ne halas ge nee Báá Dok ne, ne ge Bageyal Jeso Kris ne na ka poseya ne aŋ. 4Kris, na ge ne ho̰ tene siya ne nee sone ma pe, ndwara abe nee ne doŋ pe ge ma̰ ge ge sone mbe no zi ya uzi laar ɓyareya ge nee Bá Dok ne zi. 5Uwareya hon Dok doŋ pe ma ne doŋ pe ma! A go.
Ya̰meya ge Galatiya ma ne
(Gal 3:1-5, 4:9-20, 5:1-12)
6Mbi ke ajab ne saŋgeya ge aŋ ne saŋge ta se avun cap ne ndu ge ne tó aŋ ya ne kwa a̰se ge Kris ne ta uzi pe, aŋ saŋge aŋ ndwara fare ge kwaɗa ge ɗogle pe ya no. 7Ago fare ge kwaɗa ge ɗogle to. Amma a naa a̰me ma iigi aŋ ne baŋ, a ɓyare er fare ge kwaɗa ge Kris ne. 8Ko na ka i sḛ ma, ko maleka ma ka̰ bama koo ne digi zi ya, kadɗa a waage aŋ fare ge kwaɗa ge ɗogle ya hini ne ge i ne waage aŋ na, wak vḛneya ge Dok ne ka na pal! 9I jan na ya jan zo, se no mbi gwan dwage aŋ na janna: kadɗa ndu a̰me waage aŋ fare ge kwaɗa ge ɗogle ya hini ne ge aŋ ne ame na, wak vḛneya ge Dok ne ka na pal! 10Ago, ne se no ɗe, mbi ɓyare doreya ge naa dasana ma ne, ko ge Dok ne ɗaa? Mbi ɓyare ke naa dasana ma sḛ tuli ɗaa? Te go mbi ka ɓyare ke naa dasana ma sḛ tuli, mbi te ya kat mo̰r ge Kris ne to.
Tolla ge Bulus ne ne temel pe
(Tkm 9:1-30, 22:3-16, 26:9-20)
11Ná vya ma, mbi ke aŋ kwarra go, fare ge kwaɗa ge mbi ne waage na mbi ɓo na da ne ndu dasana ta to. 12Ago a be ndu dasana ho̰ mbi na ne to, ko hate mbi na ne to, a Jeso Kris dya̰ na mbi ta ne. 13Aŋ za̰ kaŋ ge mbi ne ka kerra swaga ge mbi ne ka hateya ge Yuda ma ne zi: mbi ka ke ɓase ge Dok ne ma yál ge be to, mbi ka ɓyare burmi na uzi. 14Ge hateya ge Yuda ma ne zi, mbi waɗe mbi kaam ge goŋ ma gḛ nama ge ne mbi hir go ma, mbi ka da ne yil gḛ ne hada ge i bá ma ne pe. 15Amma swaga ge bage ne mbege mbi ne mbi ná laar zi ya day, ne tó mbi kwa a̰se ge na ne zi, ne ndi go na kwaɗa 16na dyan na vya mbi ta, ne da pe mbi waage fare ge kwaɗa ge na ne pehir ge ɗogle ma ta, be ge ɓyare yuwaleya ne ndu a̰me ta to, 17ko be ge mbo Ursalima mbo ɓol naa ge temeya ge ne ka mbi ndwara zḛ zaŋgal ma to, mbi he viya̰ mbo suwal Arab, mbi gwan gwan’a suwal Damas go no.
18Del ataa go̰r go, mbi mbo Ursalima ya mbo ŋgay tene Kefas ta, mbi ke dam wol para anuwa̰y na ta. 19Mbi be kwa naa ge temeya ge may ma to, mbi kwa Yakub ge Bageyal ná vya ɗeŋgo. 20Swaga njaŋge aŋ fare mbe no go, mbi jan aŋ fare ge fareba Dok ndwara se, mbi kun hale to. 21Ne go̰r go, mbi mbo suwal Siriya ma ne Kilikiya. 22Amma ɓase ge Dok ne ma ge ne suwal Yahudiya go ma, naa ge ne Kris zi ma, a be ka kwa mbi to. 23A ka za̰ janna ɗeŋgo go: «Ndu ge ne ka ke nee yál ge be to mbe gá waage fare ge kwaɗa ge na ne ka ɓyare burmi na mbe.» 24A ka uware Dok ne mbi pe.
Currently Selected:
Galatiya ma 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.