1 Cronicas 26
26
Dagiti Guardia iti Templo
1Kastoy ti pannakaiwaras ti trabaho dagiti Levita a nagserbi a guardia ti Templo. Iti familia ni Kora, ni Meselemias nga anak ni Kore iti familia ni Asaf. 2Pito dagiti lallaki nga annak ni Meselemias: da Zacarias, Jediael, Zebadias, Jatniel, 3Elam, Jehohanan ken Eliehoenai.
4Adda#2 Sam. 6:11; 1 Cron. 13:14. met ni Obed Edom a pinaraburan ti Dios iti walo nga annak a lallaki: da Semaias, Jehozabad, Joa, Sakar, Netanel, 5Ammiel, Issacar ken Peulletai.
6-7Innem ti annak ni Semaias, ti inauna nga anak ni Obed Edom: Otni, Refael, Obed, Elzabad, Eliu ken Semakias. Mabigbigda a kameng ti familiada gapu iti naidumduma a kabaelanda. Naisangsangayan ti saririt da Eliu ken Semakias.
8Agdagup iti 62 a lallaki iti familia ni Obed Edom ti nagpaay iti daytoy a trabaho; naan-anay ti pannakasanayda. 9Sangapulo ket walo ti nagtaud iti familia ni Meselemias. Nasanayda iti trabahoda.
10Nagtaud ni Hoza iti familia ni Merari. Adda uppat nga annakna: ni Simri (nupay saan nga isu ti inauna, dinutokan ni amana a panguloda), 11da Hilkias, Tebalias ken Zacarias. Sangapulo ket tallo amin ti nagtaud iti familia ni Hosa a nagserbi a guardia ti Templo.
12Nagrupo-grupo dagiti guardia iti Templo segun ti familiada. Naikkanda iti annong iti Templo a kas kadagiti dadduma a Levita. 13Nagbibinnunot ti tunggal familia, aduda man wenno bassitda, tapno ammoda ti ruangan a guardiaanda. 14Nabunot ni Selemias ti akindaya a ruangan ket ti met akin-amianan a ruangan ti naited ken ni Zacarias nga anakna, maysa a nalaing a mammagbaga. 15Nadutokan ni Obed Edom a mangguardia iti akin-abagatan a ruangan. Nadutokan met dagiti annakna a mangguardia iti pagidulinan. 16Naited kada Suppim ken Hosa ti akinlaud a ruangan ken ti Ruangan a Salleket iti akingngato a dalan. Nabingaybingayda ket natudingan ti oras a panagguardia ti tunggal grupo. 17Innem ti agguardia iti inaldaw iti akindaya a ruangan. Sagpapat ti mangguardia iti akin-amianan ken iti akin-abagatan. Uppat met ti agguardia nga inaldaw kadagiti balay a pagidulinan, dua iti tunggal balay a pagidulinan. 18Adda uppat a guardia iti asideg ti akinlaud nga intar dagiti adigi iti igid ti dalan, ket adda met dua iti mismo nga intar dagiti adigi. 19Kasta ti naituding a batang ti panagguardia ti familia ni Kora ken ti familia ni Merari.
Dadduma nga Annong iti Templo
20Dagiti dadduma a padada a Levita#20 Levita; kuna ti maysa a kadaanan a patarus. Iti Hebreo, dagiti Levita, Ahias. ti mangaywan kadagiti pagidulinan iti gameng iti Templo ken dagiti pagidulinan kadagiti sagut a naidaton iti Dios. 21Ni Ladan nga anak ni Gerson ti nagtaudan ti adu a grupo ti familia, agraman ti familia ni Jehiel. 22Dua a kameng daytoy a familia—dagiti agkabsat a Zetam ken Joel—ti agaywan iti pagidulin ti gameng iti Templo ken pagidulinan kadagiti sagut.
23Naikkan met iti trabaho dagiti kaputotan da Amram, Isar, Hebron ken Uzziel.
24Ni Sebuel a nagtaud iti familia ni Gerson nga anak ni Moises ti kangatoan nga ofisial kadagiti agaywan iti pagidulinan iti gameng ti Templo. 25Agkabagian da Sebuel ken Selomit gapu ken ni Eliezer a kabsat ni Gersom. Ni Eliezer ti ama ni Rehabia nga ama ni Jesayas nga ama ni Joram nga ama ni Zikri nga ama ni Selomit. 26Ni Selomit ken dagiti kameng ti familiana dagiti nadutokan nga agaywan iti amin a sagut iti Dios nga indaton ni Ari David, dagiti ulo ti familia, dagiti pangulo dagiti grupo dagiti kapuonan ken dagiti ofisiales ti armada. 27Nangalada iti dadduma kadagiti nasamsamda iti gubat ket indatonda a mausar iti Templo. 28Ni Selomit ken ti familiana ti agaywan kadagiti amin a naidaton a mausar iti Templo agraman dagiti sagut nga inyeg ni profeta Samuel, ni Ari Saul, ni Abner nga anak ni Ner ken ni Joab nga anak ni Sarvia.
Annong dagiti Dadduma a Levita
29Kadagiti kaputotan ni Isar, nadutokan ni Kenanias ken dagiti annakna nga agaywan kadagiti sinuratan maipapan kadagiti mapaspasamak ken mangrisut kadagiti riri dagiti Israelita.
30Iti kaputotan ni Hebron, nadutokan ni Hasabias ken 1,700 kadagiti kakabagianna a pasig a mamaingel, a mangimaton kadagiti amin a banag iti relihion ken dagiti problema dagiti tattao iti laud ti Karayan Jordan. 31Ni Jerias ti pangulo dagiti kaputotan ni Hebron. Iti maika-40 a tawen a panagari ni David, nausisa ti familia a nagtaudan dagiti kaputotan ni Hebron. Naammoan nga adda dagiti maingel a mannakigubat a nagtaud iti daytoy a familia nga agnanaed idiay Jazer iti sakup ti Galaad. 32Pimmili ni Ari David iti 2,700 a nalatak a papangulo dagiti familia kadagiti kakabagian ni Jerias ket dinutokanna ida a mangimaton iti amin a banag a pakainaigan ti relihion ken dagiti problema dagiti tattao iti Israel iti dayaen ti Karayan Jordan—dagiti sakup ti Ruben, Gad ken Akindaya a Manases.
Currently Selected:
1 Cronicas 26: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society