1 TIMOTEO 6
6
1Tí sín chꞌexín xra̱ mé tꞌichjánxi̱n tsochóntehe sín kjuasáya tí lamo kuènte sín, kíxin ntá tí í so sín la tsꞌántaxíe̱nhya sín ihni̱é Dios la ko tsꞌántaxíe̱nhya sín tí nkehe tjakoni. 2A̱ ntá tí sín chꞌexín xra̱ la chónta sín lámo̱é sín tinkáchónki Cristo la mé chrókuíto̱ehya sín tsjikosáyehe sín tí lamo kíxin jnkoko̱á kíchó sín. La mé a̱ntsí jína chrókjuinki̱tsa sín kíxin ó nohe sín kíxin tjinki̱tsa sín ijnko nkexro tinkáchónki Cristo la chrótjuèhe sín kíchó sín. Jaha mé tjákohé sín kaín tíha.
Tí nkehe tinkáchónkini tso̱chèxinni
3Iso sín tjako tí nkehe jehó sín tjenka̱yáxin sín la tóyóe̱hya tí nkehe jína kjuako Ìnchéni Jesucristo la ko jehya tí nkehe tinkáchónkini. 4Ó jehí nchehnke sín la nínkehó noehya sín. Tí ntoáhya nixja sín la tíha mé éxí ijnko chin chónta sín la tíha mé tji̱xi̱n tí kjuachji̱no̱xínhin la ko tjanjo̱nko kíchó sín la ko tꞌántaxínhi̱n sín kíchó sín la ko chóntehya sín kíchó sín kjuasáya. 5Mé tí sín la náxrjónhya tjenka̱yáxin sín la jnkochríxín tjanjo̱nko kíchó sín la noehya sín tí nkehe chaxín. Mé tjenka̱yáxin sín kíxin tinkáchónki sín Ìnchéni kíxin xi̱kaha chrókjuacha sín nchónhya chichaon, ichro sín. Jaha la chrókui̱to̱hé tí sín xi̱kaha chꞌe. 6Tí tinkáchónkini Ìnchéni la ijnko nkehe imá tjetoan la ko tjete tíha a̱ ntá kjuaxróxin chrókꞌuejóni kjónté tí nkehe chóntani ó. 7A̱ ntá tí kokjíhini la ninkehó kuikohyani tí kuini chjasintajni la kja̱xin tió tsꞌenni la ninkehó nkehe xitjahya sátsji̱koni. 8A̱ ntá tí chóntani nkehe sineni la ko chóntani ikéni la kjónté táhó la chrókóchéhe̱ni. 9A̱ ntá tí sín tjinkaon sín imá chrókóríko sín mé tí sín a mé tsjichròe sín la lo̱nti̱ sín kíxin xi̱kaha tjenka̱yáxin sín, la mé tsꞌitjáyanxín sín tíha. 10Tí imá tjuèheni chichaon la tíha mé nuèé kaín nkehe jínahya. Jnkojín chojni imá tjinkaon sín tsochónta sín chichaon ntá tsjichròe sín tsíto̱he sín tsinkáchónki Ìnchéni la tíha mé imá sinchekjasótexín sín a̱sén sín.
Jína tí nkehe tinkáchónkini
11Jaha mé tinkachónké Dios la ti̱to̱hé kaín tí nkehe i. Chrókjuakꞌe ntoá la ko kaín a̱sán chróxráxinkávan Dios la ko chrókuinkachónkia chꞌán la ko chrótjuéhé kíchua la ko chrókónínkákonhya tjoka la ko chrókjui̱nchehnkehya a̱sán. 12Tjanjo̱nkoa kaín nkehe jehya tí jína la ko kaín a̱sán tinkachónkia Ìnchéni kíxin ntá chrókjuacha chrókꞌuayéhé tí kjuachón jnkochríxín kíxin mé xi̱kaha kꞌuíyaha Dios tí jaha. Jaha la ó tsíchro̱nka kíxin tinkachónkia Ìnchéni la ó kuínhin la ko kꞌuíkon nchónhya chojni. 13Nkayakon Dios, tí nkexro chjéhe kjuachón kaín xín tí nkehe síchón, la ko Jesucristo, tí nkexro tsíchrónka jína nkayakon chꞌín Poncio Pilato, mé tétua̱nhan 14kíxin si̱nchexiteyá kaín tí nkehe tꞌe̱to̱an Dios kíxin í chrókjuínkíhya tí nkehe chrókuinkachónkia la ntá tso̱kohya ninkexró tsꞌeka jie̱ tió tsjixrakájia tí ya̱on tsokjan Ìnchéni Jesucristo. 15Tsjixraká tí ya̱on kjueyá Dios ntá jehe chꞌán mé tsjanjon chꞌán kjuachaxin kíxin itsi Jesucristo. Dios la jehó chꞌán mé chónta chꞌán kjuachaxin tsꞌe̱to̱an chꞌán. Jehe chꞌán mé tí Rey tꞌe̱tue̱nhen kaín xín tí sín rey la ko jehe chꞌán mé Ìnché kaín chojni. 16Jehó Dios mé chónhya tsꞌen la tí tjen chꞌán la imá tꞌinkaséyan la ko kohya nínkexró tsjacha tso̱chjina tí tjen chꞌán. Nínkexró kꞌuíkonhya tí jehe chꞌán la ko ninkexró xitjahya tsꞌikon tí jehe chꞌán. Tsjikosáyeheni chꞌán kíxin jehe chꞌán chónta chꞌán kjuachaxin tsꞌe̱to̱an jnkochríxín. Amén.
17Tí sín chónta itsjé nkehe chjasintajni mé tétue̱nhén sín kíxin sinchehnkehya sín la ko tétue̱nhén sín kíxin tsochóntia̱xi̱nhya sín tí nkehe chónta sín kíxin jnkochríxínhya tsochónta sín tíha. Íchá jína chrókuinkáchónki sín Dios tjechón kíxin jehe chꞌán tjanjon chꞌán kaín xín nkehe kíxin mé xi̱kaha tjinkaon chꞌán tso̱chéhe̱ni. 18Tétue̱nhén sín kíxin chrókjuichꞌe sín tí nkehe jína kíxin tí chaxín chrókóríko sín la chrókjuinki̱tsa sín kíchó sín la chrókꞌóxika̱ye̱he sín tí nkehe chónta sín. 19Mé xi̱kaha chrókjuacha sín tí nkehe tjete kíxin chrꞌéxi̱n la jína chrókꞌuejó sín kíxin chrókjuacha chróchónta sín tí kjuachón jnkochríxín.
Kjuixixín kꞌuítuenhen chꞌín Timoteo
20Jaha Timoteo tꞌayakonhén tí xra̱ la tiénhya tí nkehe ntoáhya nixja chojni. Ntáchro sín kíxin imá nohe sín kjánchó chaxínhya tíha. 21Iso sín ó xi̱kaha ntáchro sín kíxin imá nohe sín la ntá kjuíchròe sín í tinkáchónkihya sin Ìnchéni. Dios chrókjuintayavan tí jaha. Amén. Ó tjen.
Currently Selected:
1 TIMOTEO 6: poeNT
Highlight
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc.
Learn more about Tí Nuevo Testamento cuènte Inchéni Jesucristo Cʼóna Nquìva