Hechos 1
1
Espíritu Santuta chaskikuyänanpaq willanqan
1Tëta Teófilo,#Luc. 1.1-4. punta kaq libruchömi qellqamurqä Jesús llapan rurashqankunata y yachatsikushqankunata. Tsëkunatam rurarqan y yachatsikurqan willakur qallashqanpita 2ciëluman ewkushqan junaqyaq. Ciëluman manaraq ewkurmi akrashqan apostolninkunata Espíritu Santupa poderninwan käyitsirqan imata rurayänanpaq kaqtapis. 3Wanushqanpita kawarirkamurmi pëkunata yuripurqan chusku chunka (40) junaqyaq. Rasunpa kawëkashqanta creyiyänanpaqmi tukïnöpa yachatsirqan. Tsënöllam Teyta Diospa mandakïninpaqpis shumaq käyitsirqan.
4Apostolninkunawan këkarmi Jesús kënö nirqan: <<Qamkunata willayashqaqnömi äniyäshushqëkita#Luc. 24.49. Teytä kachamunqa. Tsëta manaraq chaskirqa Jerusalénpita amaraq ewkuyankiraqtsu. 5Juanqa yakullawanmi bautizarqan. Qamkunaqa Espíritu Santuwanmi bautizashqa kayanki. Tsënö bautizashqa kayänëkipaqqa ichikllanam pishikan>>.#Mat. 3.11; Mar. 1.8; Luc. 3.16; Juan 1.33.
Ciëluman Jesús kutikunqan
6Jesúswan ëllukashqa këkaqkunanam tapuyarqan: <<Teyta, ¿kananpitaqa Israel nacionnintsikpa mandakuqninnatsuraq kanki?>> nir.
7Jesúsnam nirqan: <<Manam tsëkunata musyayänëkitsu. Imë junaq imë höra pasakunanpaq kashqantaqa Teyta Diosllam musyan. Pëmi puëdiq këkan munashqan höra tsëkunata rurananpaq. 8Tsënö kaptinpis Espíritu Santu qamkunaman shamuptinmi poderninta chaskiyanki. Chaskirirnam willakïnïta willakuyanki Jerusalénchö, jinantin Judeachö, Samariachö y llapan markakunachöpis>>.#Mat. 28.19; Mar. 16.15; Luc. 24.47-48.
9Tsënö parlar usharirmi pallarikar qallëkurqan. Rikarëkäyaptinmi pukutë rurinman yëkur illakärirqan.#Mar. 16.19; Luc. 24.50-51. 10Tsënö këkäyaptinmi yulaq ratashllashqa ishkaq nunakuna juklla yurirkur 11niyarqan: <<Galilea nunakuna, ¿imanirtaq ciëluman rikarëkäyanki? Nöpëkikunapita ciëluman ewkushqannöllam Jesús yapë kutimunqa>>.
Judaspa rantin apóstol kananpaq Matíasta akrayanqan
12Tsëpitam Olivos jirkachö këkäyashqanpita apostolkuna Jerusalénman kutikuyarqan. Tsë jirkapita Jerusalénmanqa manam alläpa karutsu karqan, sinöqa jamakï junaqchö puriyashqannöllam.#1.12 Jamakï junaq kaptin Israel nunakuna hasta ishkë waranqa (2,000) japëllatam puriyaq. Tsëpita mastaqa manam puriyaqtsu. Ishkë waranqa japëqa juk kilömetrupita ichik masllam këkan. 13Chärirmi witsäyarqan posadaräyashqan altuman. Pëkunam kayarqan Pedro, Juan, Santiago, Andrés, Felipe, Tomás, Bartolomé, Mateo, Alfeupa tsurin Santiago, Zelote niyashqan Simón y Santiagupa tsurin Judas.#1.13 Bartolomépa juk kaq shutinmi karqan Natanael (Juan 1.45-49; 21.2). Santiagupa tsurin Judaspa juk kaq shutinmi karqan Tadeo (Mat. 10.3; Mar. 3.18). 14Pëkunam Jesúspa maman Maríawan, Jesúspa wawqinkunawan y wakin warmikunawanpis Teyta Diosta mañakuyänanpaq imëpis ëllukäyaq.
15Tsë junaqkunam Jesúsman markäkuqkuna juk pachak ishkë chunkanö (120) ëllukäyaptin Pedro shärirkur nirqan: 16<<Wawqikuna y panikuna, musyashqantsiknöpis Judasmi nunakunata pusharqan Jesústa prësu tsariyänanpaq. Tsënö kananpaq kashqanta qellqananpaqmi Espíritu Santu rey Davidta käyitsirqan. Tsëmi Judasta pasananpaq Teyta Diospa palabran ninqannölla kanan cumplishqa. 17Judasqa noqakunawanmi purirqan. Pëtapis apóstol kananpaqmi Jesús akrarqan>>.
18(Jesústa rantikushqan qellëta Judas kutitsishqanwanmi chakrata rantiyarqan. Judasqa urë senqapa jeqaptinmi pachan pashtarirqan y aqishninpis witsikärirqan. 19Tsëta musyarmi Jerusalénchö täraq nunakuna tsë chakrapa shutin churayarqan Acéldama shutin kananpaq. Pëkunapa idiömanchö Acéldama ninanqa Yawar Pampa ninanmi.)#Mat. 27.3-8.
20<<Judasta pasananpaq kaqtaqa Salmo libruchömi kënö qellqarëkan:
<< <Wayinpis chusyaq tikratsun.
Tsëchö pipis ama tärätsunnatsu>.#Sal. 69.25.
Maspis kënömi qellqarëkan:
<Pë rurananpaq kaqta jukna ruratsun>.#Sal. 109.8.
21<<Tsëmi juktana churanantsik Judaspa rantin apóstol kananpaq. Tsë nuna katsun Jesús willakur qallashqanpita patsa noqakunawan puriq. 22Tsënölla Jesústa Juan bautizashqanpita patsa#Mat. 3.16; Mar. 1.9; Luc. 3.21. ciëluman kutikushqanyaq#Mar. 16.19; Luc. 24.51. qatiraq katsun. Tsë nunata churashun noqakunanö apóstol kar Jesús kawarimushqanta willakur purinanpaq>>.
23Tsënö niptinmi ishkaq nunakunata akrayarqan. Jukmi karqan Matías. Juk kaqnam karqan José. Wakin nunakuna Joséta Barsabás niyaq y wakinnam Justo niyaq. 24Tsëpitanam Teyta Diosta mañakur niyarqan: <<Teyta Dios, musyankim nunakunapa shonqun imata yarpashqantapis. Kanan musyëkatsiyämë mëqantapis akrashqëkita. 25Akrashqëki nunam apostolniki kanqa Judas Iscariotipa rantin. Judasqa apóstol këninta mana cumplirmi wanïman ewkushqa>>.
26Tsënö mañakurir sortiyayaptinmi Matíaspaq yarqurqan. Matíaswanmi apostolkuna yapë chunka ishkë kayarqan.
Currently Selected:
Hechos 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.