2 Pedro 2
2
Llutan yachatsikuqkuna imanö kawayanqantapis käyitsinqan
Judas 3-16
1Israel nacionchö uli profëtakuna nöpata kayashqannömi qamkunachöpis llutan yachatsikuqkuna kayanqa. Pëkunaqa Teyta Diospa willakuqnin tukurmi creyitsiyäshurniki manakaqkunata yachatsiyäshunki. Tsënöllam salvakuq Señor Jesucristutapis negayanqa. Pëkunatam Teyta Dios juiciu junaqchö juklla ushakätsinqa.
2Pëkuna yachatsiyashqanta chaskirmi nunakuna jutsata rurakur kawayanqa. Tsënö kawayaptinmi Teyta Diospa willakïninta pïmëpis manakaqpaq churayanqa. 3Qellëpaq ërayashqa karmi alli tukushllapa sakyayäshunki. Pëkunata infiernuman jitëkunanpaq Teyta Dios unëpitanam destinarqan. Tsëchömi alläpa jipakï pëkunata shuyarëkan.
4Jutsa ruraq angelkunatapis Teyta Dios manam perdonarqantsu, sinöqa infiernumanmi jitëkurqan. Paqaschö kayänanpaqmi llawirkurqan juiciu junaqchö juzgananpaq.
5Noé kawanqan witsanpis jutsasapa nunakunata manam perdonarqantsu. Tsë nunakunaqa Teyta Dios munashqannö kawayänanpaq Noé willapaptinpis manam cäsuyarqantsu. Tsëmi Teyta Dios diluviuwan ushakätsirqan. Tsënö ushakätsirpis Noéta y qanchis nunakunallatam salvarqan.#Gén. 6.1-7; 8.18.
6Tsënöllam Sodoma y Gomorra markakunatapis Teyta Dios uchpayashqanyaq rupatsirqan.#Gén. 19.24. Tsënö rurarqan castigakuq kashqanta jutsasapa nunakuna käyikuyänan rëkurmi. 7Tsë markakunata kayarpis Lotllatam alli nuna kaptin salvarqan. Pëmi tsë markakunachö aksë nunakuna jutsata rurayaptin ima rurëtapis puëdirqantsu.#Gén. 19.1-16, 29. 8Pëkuna kaqchö tärarmi jutsankunata rikar y llutankunata parlayashqanta wiyar waran waran alläpa llakikurqan.
9Tsënöpam musyantsik pë munashqannö kawaq kaqtaqa llapantsiktapis Teyta Dios ima jipakïkunapitapis salvamänantsikpaq kashqanta. Tsënö kaptinpis jutsa ruraqkunataqa juiciu junaqchömi feyupa castiganqa.
10Mas feyupam castiganqa pïmëwanpis ërayashqa kakuqkunatanäqa. Tsë nunakunaqa Teyta Diostapis manam cäsuyantsu. Yachaq tukurmi supëkunatapis mana mantsashpa ashayan. 11Ciëluchö këkaq angelkunaqa nunakunapita mas mandakuq këkarpis y Teyta Diospa nöpanchö këkarpis manam supëkunata ashayantsu.
12Tsë nunakunaqa mana käyirmi tsënö ashayan. Wätakunanö yarpëninnaq karmi wanutsishqa kayänanllapaq yurikuyashqa. Mana allita rurëkäyashqanllachömi ushakäyanqapis. 13Wakinkunata jipatsiyashqanpitam kikinkunapis jipayanqa. Rikëkäyaptin llutankunata rurarpis mana penqakushpam jeqchikachäyan. Qamkuna mikuyänëkipaq ëllukäyashqëkichöpis llutankunata parlarmi kushikuyan.
14Tsë nunakunaqa pï warmita rikarpis munapäyanllanam. Jutsata rurarpis manam teqñayantsu. Manaraq shumaq käyikuqkunatam llutankunata yachatsiyan. Nuna mayinta imëkanöpapis sakyëtaqa alläpam yachëkuyan. Tsënö kayashqanpitam feyupa castigashqa kayanqa.
15Teyta Dios munashqannö nöpata kawashqa karpis kananqa Diospita oqrakashqam purikäyan. Beorpa tsurin Balaam qellë rëkur mana allita rurashqannömi pëkunapis llutankunata rurëkäyan. 16Qellëpaq ërayar Balaam ëwëkaptinmi china ashnun parlapar mana ëwananpaq micharqan.#Núm. 22.4-35.
17Tsë nunakunaqa tsakishqa pukyunömi y wakpa këpa purikuq pukutënömi këkäyan. Pëkunapaqqa alläpa paqas sitiu alistashqanam këkan [wiñëpa] tsëchö llawiräyänanpaq. 18Pëkunaqa alabakurmi yachaq tukur imatapis parlayan. Jutsankunata tsëraq jaqirishqa kaqkunatam llutankunata rurayänanpaq kallpatsayan.
19Nunakunatam äniyan yachatsiyashqanta cäsukur libri kawakuyänanpaq kashqanta. Tsënö änirpis kikinkunaqa manam libritsu kayan, sinöqa jutsapa poderninchömi këkäyan. Ima viciupis nunata venciptinqa tsë viciupa poderninchömi këkan.#Juan 8.34; Rom. 6.6, 16.
20Salvamaqnintsik Señor Jesucristuta chaskikushqana këkar jutsa rurëllachö yapë kakurqa nöpa kanqanpitapis mas peormi tikrakurin.#Mat. 12.45; Luc. 11.26. 21Diospa willakïninta chaskishqa këkar jutsa rurëman kutikunan këkaptinqa mejor ama tsë sagrädu willakïninta chaskinmanpistsu karqan. 22Jutsa rurëman kutikuqkunapaqqa rasun kaqllatam kënö niyan: <<Allquqa oqyashqanta yapëmi mikun. Kuchipis armaratsishqa yapëmi leqitachö qarishpärin>>.#Prov. 26.11.
Currently Selected:
2 Pedro 2: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.