2 Pedro 1
1
Apóstol Pedro napakunqan
1Markäkuq mayïkuna:
Noqa Simón Pedrum, Jesucristupa sirwiqnin y apostolnin kar, qamkunaman kë cartata cartakëkämü. Qamkunatapis Jesucristo ankupäyäshurnikim noqakunatanö salvayäshurqunki. Pëqa Diosnintsikmi y salvamaqnintsikmi. 2Qamkunapaqmi mañakü Teyta Diosta y Señornintsik Jesucristuta reqiyaptiki ankupäyäshunëkipaq y waran waran alli kawëta qoykuyäshunëkipaq.
Teyta Dios munanqannö kawanantsikpaq ninqan
3Pëta reqishqam munashqannö kawanantsikpaq Teyta Dios poderninwan tukïnöpa yanapëkämantsik. Ankupäkuq y allillata ruraq karmi tsënö kawanantsikpaq qayamarquntsik. 4Tsënöllam imëpis yanapamänantsikpaq änimarquntsik. Tsënö yanapamäshun jutsannaq kashqannö noqantsikpis jutsa rurëta jaqirir jutsannaqna kanantsikpaqmi.
5Tsënö këkaptinqa Teyta Diosman imëpis markäkuyë. Pëman markäkur allillata rurayë. Allillata rurar palabranta yachakuyë. 6Palabranta yachakur shonqïkikunachö y yarpënikikunachö katsiyë. Tsënö katsirqa wanukuyashqëkiyaqmi cäsukuyanki. Cäsukurqa Teyta Dios munashqannö kawëkäyë. 7Teyta Dios munashqannö kawarna tsë castanölla alli rikänakuyë. Y alli rikänakurna pïmëwanpis kuyanakur kawayë.
8Waran waran tsënö kawakuyaptikiqa Señornintsik Jesucristuta reqiyanqëkipis manam manakaqllapaqtsu kanqa. 9Tsënö mana kawarqa wisku rikëta mana puëdishqannömi këkäyanki. Teyta Dios perdonayäshushqëkitapis qonqëkuyarqunkim.
10Wawqikuna y panikuna, Teyta Dios qayayäshushqëkita y akrayäshushqëkita shumaq käyiyänëkipaq imëkanöpapis pë munashqannö kawakuyë. Tsënöpam jutsa rurëman imëpis ishkiyankitsu. 11Tsëmi mandakïninman chäyaptiki salvamaqnintsik Señor Jesucristo kushishqa chaskiyäshunki.
12Tsëmi musyayaptikipis y Diospa willakïninta shumaq yachakushqana kayaptikipis tsëkunata imëpis yarpëkätsiyashqëki. 13Kawëkanqäyaqqa tsëkunata imëpis nikäyashqëkim. 14Wanukunäpaqna këkashqäta Señor Jesucristo musyatsimashqana kaptinmi 15qamkunata yarpëkätsiyaq wanukuptïpis käyitsiyashqaqkunata imëpis yarpäyänëkipaq.
Jesucristo kutimunanpaq ninqan
16Señornintsik Jesucristo puëdiq kashqanta y kutimunanpaq kashqanta manam yarpënïllapitatsu yachëkätsiyaq, sinöqa shumaq chipapäkïkaqta kikï rikashqa karmi tsënö yachëkätsiyaq. 17Tsënö chipapëkaptinmi Teyta Dios gloriapita kënö nimurqan: <<Pëmi kuyë Tsurï. Pëpitam alläpa kushikü>>. 18Tsënö nimushqantaqa kikïmi wiyarqä sagrädu jirkachö Jesucristuwan këkar.#Mat. 17.1-5; Mar. 9.2-7; Luc. 9.28-35.
19Tsëmi masraq käyintsik profëtakuna willakuyashqan rasunpa kashqanta. Tsënö këkaptinqa profëtakuna qellqayanqankunata shumaq cäsukuyë. Tsëkunaqa paqaschö aktsi atsikyanqannömi këkan. Tsënö cäsukuyë patsa waraptin waraq qoyllur shonqïkikunachö atsikyanqanyaq.#1.19 Waraq qoyllur shonqïkikunachö atsikyanqanyaq ninanqa Jesucristo kutimunqanyaq ninanmi.
20Shumaq käyikuyë. Ama yarpäyëtsu Teyta Diospa palabranta nunakuna yarpëninkunallapita qellqayashqanta. 21Teyta Diospa profëtankuna manam imëpis kikinkunapa yarpëninpitatsu qellqayarqan, sinöqa Espíritu Santu käyitsiptinmi Teyta Dios yarpashqanta qellqayarqan.#2Tim. 3.16.
Currently Selected:
2 Pedro 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.