VOSA VAKAIBALEBALE 3
3
Vakasala me Vakadinati ka Rokovi na Kalou
1Na luvequ, mo kakua ni guilecava na noqu i vakavuvuli vei iko. Mo maroroya ga e lomamu na noqu i vakaro. 2Na noqu i vakavuvuli ena vakavuna me balavu na nomu bula ka na yaco talega mo bula sautu. 3Me kakua ni yali vei iko na yalololoma kei na dina. Taubeni rau e domomu ka vola talega e yalomu. 4#Luke 2.52Ena ka oqo, o na dau vinakati kina ka rogo vinaka ena mata ni Kalou kei na mata ni tamata.
5Mo vakararavi vei Jiova ena yalomu taucoko. Kakua ni vakararavi ki na nomu kila-ka. 6Mo nanumi Jiova ena ka kecega o cakava, ena qai vakaraitaka vei iko o koya na sala dodonu. 7#Roma 12.16Kakua sara ni nanuma ni o sa vuku, ia mo rerevaki Jiova ga ka gole tani mai na sala ca. 8Kevaka o na cakava oqo, ena vaka na wainimate vinaka sa vakaotia na nomu mavoa ka vakamalumutaka na nomu mosi. 9Mo dokai Jiova ena nomu i yau kei na i sevu ni veika vinaka o sa rawata mai na nomu qele. 10Kevaka o na kitaka na ka oqo, ena sinai sara na nomu lololo ena vua ni nomu qele ka levu sara na memu waini ka na sega ni rawa mo maroroya taucoko.
11 #
Jope 5.17
#Ipe 12.5,6Na luvequ, ni sa vakadodonutaki iko ko Jiova, mo vakarorogo sara ka muria na nona i vakaro. 12#Vtaki 3.19Sa dau vakadodonutaki ira na tamata sa lomani ira ko Jiova, me vaka na nona vakadodonutaka e dua na tama na luvena e sa dau taleitaka vakalevu. 13Sa kalougata na tamata sa rawata na vuku kei na tamata sa yaco me kila-ka. 14Ni sa levu cake na ka sa rawata mai kina ka lailai mai na siliva; sa levu cake na kena yaga vei iko mai na koula. 15Sa yaga cake vakalevu o yalomatua mai na vatu talei; sa sega sara ni dua na ka o gadreva me vakatauvatani kaya. 16Sa solia vei iko o yalomatua na bula balavu ka vakakina na i yau kei na dokai. 17E rawa ni cakava o yalomatua mo bula marau ka gole kece na nona sala ki na vakacegu. 18Sa vaka na kau ni bula o yalomatua vei ira era sa mokota, ia sa kalougata o ira era sa tauri koya matua.
19Sa tauyavutaki vuravura ko Jiova ena nona vuku,
Ka sa vakarautaki lomalagi ena nona lewa.
20Na nona yalomatua sa vakavuna me drodro na veiuciwai
Kei na o me vakatauca na uca ki vuravura.
21Na luvequ, mo taura vinaka na yalomatua kei na lomavuku: kakua sara ni laiva me rau lako tani mai vei iko. 22E rau na solia vei iko na bula na bula marau ka vakaibalebale. 23O na qai maroroi vinaka kina ena nomu i lakolako, ka na sega ni tavutu na yavamu. 24O na sega ni rere ni o sa davo sobu mo moce, ia o na moce vakavinaka sara ena bogi taucoko. 25O na sega ni taqayataka na leqa tubu koso sa yaco vakidacala mai, me vaka na ka ca sa yacovi ira na tamata ca. 26Ena taqomaki iko ga ko Jiova. Ena sega ni laivi iko o koya mo coko ena dai.
27Kakua ni bureitaka na ka vinaka vei ira era gadreva, ni sa tu vei iko na kaukauwa mo cakava kina. 28Kakua ni tukuna vua na wekamu me lesu tale mada ka me qai lako tale mai ni mataka ni sa rawa mo vukei koya ga edaidai. 29Kakua ni nakita e dua na ka me na vakaleqai kina na wekamuni, o koya sa bula volekati iko ka sa tiko na nomudrau veivakabauti. 30Kakua ni veileti kei na tamata ka sega na ka e vakavuna, ka sega ni bau cakava e dua na ka ca vei iko. 31Kakua ni vuvutaki ira na tamata i tovo kaukauwa se nakita mo muria na nodra i valavala, 32baleta ni sa cata ko Jiova na tamata e cakava na ka ca, ka sa nuitaki ira ga na yalododonu. 33Sa tau na cudru i Jiova ki na nodra vale na tamata ca, ia sa vakalougatataka na nodra vale na yalododonu. 34#Jeme 4.6; 1Pita 5.5Sa sega na kedra yaga na dauveibeci vei Jiova, ia sa yalovinaka ga o koya vei ira sa yalomalumalumu. 35Era na dokai ka rogo na tamata vuku, ia ena nodra na madua na tamata lialia.
Currently Selected:
VOSA VAKAIBALEBALE 3: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.