1 JONI 2
2
O Karisito na Noda Dauveivuke
1Oi kemuni na luvequ lomani, au sa vola yani na veika oqo mo ni kakua kina ni valavala ca; ia kevaka sa valavala ca e dua na tamata, sa tiko kei keda e dua sa dau vakamamasu vua na Tamada ena vukuda — ko Jisu Karisito, na yalododonu. 2Ni sai Karisito ga na sala sa bokoci kina na noda i valavala ca, ka segai ni noda walega, ia na i valavala ca ni tamata kecega e vuravura.
3Kevaka eda sa muria tiko na i vakaro ni Kalou, eda sa vakadinadinataka kina e lomada ni da sa kilai koya. 4Kevaka sa kaya e dua na tamata, “Au sa kilai koya,” ka qai sega ni muria tiko na nona i vakaro, sa tamata lasulasu ga o koya, ka sa sega vua na dina. 5Ia o koya yadua sa muria na vosa ni Kalou, sa vakataucokotaki sara ki na nona bula na loloma ni Kalou. Oqo sa dusia ki lomada ni da sa bula tiko vua Kalou: 6o ira vakayadua sa kaya ni ra sa bula tiko vua na Kalou sa kilikili kaya me ra vakadadamuria na bula i Jisu Karisito.
Na i Vakaro Vou
7 #
Joni 13.34
Oi kemuni na wekaqu lomani, sa sega ni ka vou na i vakaro ka'u sa vola yani oqo vei kemuni; ia sai vakaro makawa ga, na kena ka sa tu vei kemuni mai na i vakatekivu. Na i vakaro makawa oqo sai koya ga na i tukutuku o ni a sa rogoca oti. 8Ia ka'u sa qai vola yani oqo vei kemuni e dua na i vakaro vou, baleta ni sa kunei na kena dina vei Karisito ka vaka talega kina vei kemuni. Ni sa takali tiko yani na butobuto, ka sa cila tu oqo na rarama dina.
9O ira era sa kaya ni ra sa bula tiko ena rarama, ia era se cati ira tikoga na wekadra, era sa tu ga ena butobuto me yacova mai na siga edaidai. 10O ira era sa lomana na wekadra era sa bula ga ena rarama, ka sa sega ni tu vei ira e dua na ka me tarabe kina e dua ki na i valavala ca. 11Ia o ira era sa cata na wekadra era sa bula ga ena butobuto; era sa lako voli ena butobuto ka ra sega ni kila na vanua era sa lakova, ni sa vakamatabokotaki ira na butobuto.
12Au sa vola yani kina vakaoqo, vei kemuni na luvequ lomani, ni sa bokoci na nomuni i valavala ca ena vuku ni yaca i Karisito. 13Au sa volavola yani kina vakaoqo, vei kemuni na tama, baleta ni o ni sa kilai koya ka sa bula mai na i vakatekivu. Au sa volavola yani kina vakaoqo, vei kemuni na i tabagone, baleta ni o ni sa kaukauwa; sa bula ga e lomamuni na vosa ni Kalou, ka o ni sa vakamalumalumutaki koya oti na vunica.
14Au sa volavola yani kina vakaoqo, vei kemuni na gone, baleta ni o ni sa kilai koya na Tamada. Au sa volavola yani kina vakaoqo, vei kemuni na i tubutubu, ni o ni sa kilai koya ka sa bula mai na i vakatekivu. Au sa volavola yani kina vakaoqo, vei kemuni na i tabagone, baleta ni o ni sa kaukauwa tiko, ka sa bula tiko e lomamuni na vosa ni Kalou, ka ni o ni sa vakamalumalumutaki koya oti na vunica.
15Ni kakua ni lomani vuravura se na veika vakavuravura. Kevaka o ni sa lomani vuravura, o ni sa sega kina ni lomani koya na Tamada. 16Ni veika kece sara era tu e vuravura — na gagadre ca ni yago, kei na gagadre ca ni mata, kei na yalo e dokadokataka na veika ni bula oqo — era sa sega sara ni lako mai vei Tamada, ia mai vuravura ga. 17Sa takali tiko vakamalua o vuravura kei na veigagadre kece sa solia vei keda; ia o ira ga sa vakayacora tiko na loma ni Kalou era na tudei ka tawamudu.
Na Meca i Karisito
18Oi kemuni na luvequ lomani, sa voleka mai na i vakataotioti ni gauna! Sa tukuni vei kemuni ni na lako mai o koya na meca i Karisito; ia oqo, era sa lewe levu sara na meca i Karisito sa basika oti mai, ka da sa kila kina ni sa voleka sara na i vakataotioti ni gauna. 19O ira oqo era sa sega dina ga ni noda i tokani, o ya na vuna era sa biuti keda kina. Ni kevaka era a noda i tokani vakaidina, ke ra se tiko ga kei keda. Ia era sa lako tani ga me vakaraitaka kina ni ra sa sega kecega ni noda i tokani.
20Ia oi kemuni, o ni sa lumuti ena Yalo Tabu mai vei Karisito, ka o ni sa kila kece kina na veika dina. 21Au sa volavola yani kina vakaoqo vei kemuni, ka sega ni baleta ni o ni sa lecava na dina; ia e baleta ga ni o ni sa kila tiko, ka kila talega ni sa sega ni dua na lasu me na tubu mai na dina.
22O cei sara mada li oqo na daunilasu? O ira ga sa tukuna ni sa sega ni Karisito ko Jisu. Sa i ira oqo na meca i Karisito: era sa cakitaka na Tamana kei na Luvena. 23Ni o ira kecega sa cakitaka na Luvena era sa cakitaki Tamana talega; ia o ira sa ciqoma na Luvena era sa ciqomi Tamana talega vakakina.
24Me dei tiko e lomamuni na veika o ni sa rogoca mai na i vakatekivu. Kevaka sa dei tikoga e lomamuni na i tukutuku o ya, o ni na tudei tikoga kina vua na Luvena kei na Tamana. 25Sa i koya ga oqo na ka sa yalataka vei keda ko Karisito — na bula tawamudu.
26Au sa vola yani oqo na veika me baleti ira era sa vinakata voli me ra vakacalai kemuni. 27Ia ena veika me baleti kemuni, sa lumuti kemuni oti ko Karisito ena Yalo Tabu. Sa sega kina ni ganita me na vakatavulici kemuni e dua tani tale, me vaka ni sa tiko ga kei kemuni na Yalo Tabu; sa dau vakatavulici kemuni na Yalo Tabu ena ka kecega, ka sa dina taucoko na veika sa vakatavulica, ka sega ni lasu. Mo ni muria sara kina na i vakavuvuli ni Yalo Tabu, ka tudei tiko vei Karisito.
28Ia oqo, kemuni na luvequ lomani, ni tudei tikoga vua, me rawa kina ni da yalodoudou tiko ni sa yaco mai o koya, ka sega ni da qai vunitaki keda mai vua ena madua ena Siga ni nona lesu mai. 29Kevaka o ni kila ni sa yalododonu ko Karisito, o ni sa qai kila sara ni ra sa luve ni Kalou o ira sa caka dodonu.
Currently Selected:
1 JONI 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.