Lako Yani 1
1
Era Kune Rarawa na Isireli e Ijipita
1Oqo na yacadra na luve i Isireli ka ra a lako vata mai kei Jekope i Ijipita kei na nodra dui vuvale; 2O Rupeni, o Simione, o Livai, o Juta, 3o Isakari, o Sevuloni, o Penijamini, 4o Tani, o Navitalai, o Kata, kei Aseri. 5Na kedra i wiliwili taucoko na kawa i Jekope e vitusagavulu.#1.5 E dua na i vakavakadewa makawa 75 (raica na Caka 7.14). Ia sa tiko rawa mai Ijipita na luvena o Iosefo.
Vakararawataki o Ira na Isireli
6A sa mate o Iosefo kei iratou kece na tuakana, kei na i tabatamata o ya; 7ia era a tubu na Isireli me ra lewe vuqa, ka ra sa yaco me dua na yavusa levu ka kaukauwa sara, ka ra sa vakasinaiti Ijipita.#Caka 7.17
8A sa dua tale na tui vou e Ijipita, ka sa sega ni kila e dua na ka me baleti Iosefo.#Caka 7.18 9A sa tukuna vei ira na nona tamata, “Raica, era sa lewe vuqa mai na Isireli ka ra sa tamata kaukauwa cake sara mai vei keda. 10Me da kusa rawa ka vakatulewa vei ira, me ra kakua ni tubu cake tiko de lakolako era na keda meca ka vakacibi i valu vei keda, eda na sega ni valuti ira rawa, ka ra dro tani mai na noda vanua. Me vakasaqarai eso na sala me tarovi kina na tubu ni kedra i wiliwili.”#Caka 7.19 11Ena vuku ni ka oqo, era a lesia kina eso na turaga dauveivakabobulataki me ra vakasaurarataki ira na Isireli ena cakacaka kaukauwa eso. Era a tara na koro lelevu o Picomi kei Ramisese me nei tui Ijipita. 12Ia na levu ga ni nodra vakasaurarataki na Isireli, na levu talega ni tubu cake ni kedra i wiliwili kei na nodra teteva yani na loma ni vanua. Sa yaco me ra rere kina vakalevu na kai Ijipita. 13A yaco me ca sara vakalevu na nodra vakasaurarataki ira na Isireli o ira na Ijipita, ena veicakacaka kecega era cakava, 14ka vakararawataki ira ena veicakacaka bibi ka dredre eso me vaka na vavi lase, na buli biriki, kei na veimataqali cakacaka kaukauwa kecega e tautuba, ka ra sa sega ni lomani.
15A sa qai kaya na tui Ijipita vei rau na marama dauvakasucugone o Sifira kei Pua, 16“Kevaka o drau sa vakasucumi ira na yalewa ni Iperiu ka tagane na luvedra, drau vakamatea; ia drau laivi ira ga na luvedra yalewa me ra bula.” 17Ia oi rau na dauvakasucugone e rau sa marama daurerevaka na Kalou, ka rau mani sega kina ni vakayacora na ka a vakarota na tui me rau cakava, ia e rau a laivi ira ga na gonetagane me ra bula. 18A sa qai vakarota kina na tui me rau kau mai na marama dauvakasucugone ni Iperiu ka kaya vei rau, “A cava drau sa vakabulai ira kina na gonetagane?”
19E rau a kaya na marama dauvakasucugone ni Iperiu vua na tui, “O ira na yalewa ni Iperiu era sega ni vakataki ira na yalewa ni Ijipita; e rawarawa sara na nodra vakasucu, ka ra sa dau vakasucu oti tu ni bera ni keirau yaco yani.” 20Ena vuku ni ka oqo, a sa vukei rau vakavinaka kina na marama dauvakasucugone na Kalou ka sa yaco me ra tubu cake tikoga ka kaukauwa na Iperiu. 21Ia ena vuku ni nodrau rerevaka na Kalou na marama dauvakasucugone, a mani rau vakaluveni kina ka vakamatavuvale.
22A sa vakarota na tui vei ira na nona tamata ka kaya, “Mo ni vesuki ira kece sara na gonetagane sucu vou mai vei ira na Iperiu ka viritaki ira ki na uciwai na Naile, ia mo ni laivi ira ga na yalewa me ra bula.”#Caka 7.19
Currently Selected:
Lako Yani 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.