Pidipos 3
3
V. NADEC TABADTA, QUEQUIN CHIAID
(3.1—4.1)
Esusuidtsëqui tantiasho Nuquin Papan bëdambuen isaid
1Tantia, cun utsibo. Nuquin Icbo Esus tantiec cuishonqueta. Umbi chiondaid padpiden chuiuatiapimbo iquebi, quenquio icquin: Tantienquio yannushe, queshun umbi chiondaidbidi padpiden dada uaquin mibitedi chuiuanu. 2Matses icsamboshë icquidon chuisho tantienda. Aido icsa uanquidombo neque. Adecbidi shui dëbid dëtemete bunquidouidi nec. Adquido icsho Nuquin Papan bëdambuen istsiash, quequin chuisho tantienda. 3Shui dëbid dëtemequidbimbuecquido yec nuquitedi Esus tantiaquidombo nec. Adquido icsho aton Mayanën tantiamiac Nuquin Papa tantiaquido nuqui nec. Adash: Esuquidistuna nebi, quiash nuquitedi cuishonquendac. Aden tantiaquid icquin: Shui dëbid dëtemequin Nuquin Papa bëdambuen ismembi, quetiapimbo nuqui iquec.#3.3 Aden aton matses chuiquin Nuquin Papan oncamiaid Edemiasën dada uapampic. Aidën dada uaid iste bunquin Ede. 4.4 ista. 4Cun tsusedpabon chiaiduidi tantiaquin nasho Nuquin Papan bëdambuen iste danquin naden chuipondambi: Cun tsusedpan chiaid utsibon daëdpactsëc nanuc umbimbo naquin dadpenquio nabanquidquio nebi, quepondabi. 5Isadaidbon tishacsho 7tedec ushshun Moisesën chiampicpadombuen shui dëbid dëtemiaid nebi. Cun tsusedpa Benjamin yampid icnuc isadaidbo nebi. Cun tabëd cun pa ebedeo icnuc ebedeombo nebi. Aidën onqueten onquequid nebi. Adquid yec Moisesën chiampid namequidquio padiseobobëd icquid nepondabi. 6Adquid icquin Moisesën chiampiduidi nate bunquin icsambo icquido danquin Esus tantiaquido cuessun secamete bunquiondabi. Aden nasho ubipadquid utsibon: Mimbi icsambuen naic, catiapimbo iccondashi.
7Aden nabanquid icquin: Umbi tantiacpadombuen naic bëdamboshë iquebi, quequin icsambuen tantiapondambi. Adondaidi nëbi Esuquidistu tantiabenshun: Umbi tantiacpaden naiquini icsambo icchitoc, quequin tantiabempondambi. 8Nëbi Cun Icbombo Esuquidistu tantiec bëdambo iquebi, quequin tantiembi. Aiduidtsëqui tantiate bunquin icsa sandoshon secacbimbuen umbi tantiacpadombuen nabanaidtedi ënondambi. 9Esuquidistubëd daëdash aidbëd abentsëc yacbimbuecquid nebi. Adquid yec Moisesën chiampicpadombuen naquin aidën chiacpadombuen nainquio icchitembi, quequin tantiec nadondabi. Nuquin Papambien Esuquidistu umbi tantiasho ubi bëdambuen isquin ambi chiacpadombuen ubi namec, quequin tantiabenondambi. 10Aden tantiabenshun Esuquidistu tantiate bunquiebi. Nadatiambocquid icquin Nuquin Papan uincuenmiac nadatiambocquidbidi icquin Esusën bëdambuen tabadmetsiashi, quec Esus tantiate bunquiebi. Nuquin Papan chiacpadombuen nasho natiamequin mëyanac Esus uënëspanëdash. Adombuembidi Nuquin Papan namiacpadombuen nasho mëyanquin cuessunniac bëdambo ictsiabi. 11Adshun uënësaido uincuenmete uëshë cainec bëdambo iquebi, quequin tantiembi.
Nuquin Papan chiacpadombuenuidi nate bunaid
12Tantia, cun utsibo, mibitedi chuinu. Nuquin Papan Chiaid niaquesambo nebi ¿quectabi ique? Abitedimbo tantiabenombi, ¿quectabi ique? Padenquio. Aden tantienquio yec abipadquid bëdamboshë icmenuen abided cuidadquid icquin Esuquidistun tantiamiondashi, quequin aid tantiec bëdamboshë icte bunquiebi. 13Adec bëdamboshë icquid yanabi icquin: Umbi nabambuedtedi tantienquio yec bëshunash: Bëdambocquid nebi, quenquio icquin ambi chiacpadombuenuidi nate bunebi, quequin chiec nebi. 14Abia choquid bëdamboshëcquid menete iquec, quequin chiac aiduidtsëqui tantiec titinquiacbimbuen Esuquidistu tantiaquin aidën chiacpadec bëdambo icte bunebi. Esuquidistu uidtsëqui tantiec uënësacsho Nuquin Papan bëdamboshëcquid menequin abi yacno ubi tabadmec, quiash bëdambo icte bunquiebi.
15Nuquin Papan chiacpadombuen natiadquio iquebi, quequin umbi chuibocpadombuen mimbi tantiatsiac. Utsien aidën chiaid abitedi nainquio icquin: Abentse abentsen naimbi, quesho Nuquin Papan ambi tantiacpadombuen mibitedi bëdambuen tantiametsiash. 16Nëbi Nuquin Papan tantiamiacpadec nuquitedi bëdambuec tabadnuna.
Nuquin Papa yacno tabadtequido chiaid
17Tantia, cun utsibo, ubi yacpadquiec bëdambuec tabadta. Umbi chuibambocpadombuen utsibon nasho issun adombuembidi bëdambuen nata. 18Umbi chuidenniondacpadombuen mibitedi padpiden shubiquimbi chiec nebi. Mibi yacno utsi utsiec icsambuec tabadquid iquec. Abided cuidadec cueste napotiaidën dectamëdaid Esuquidistu tantiaquid nebi, quebuedi aid chieshënquidbimbuec icsambuec tabadec. 19Aidotedi cumapenec mëyadtequid yacno chian annëdënquiacno nidmequin cuidendac. Peteuidtsëqui tantiec icsambo icquin ambi natemaid naic: Bëdambo iquebi, quec tabadec. Aido: Icsambuen naquido nebi, quiash dacuëdtiadquidi Nuquin Papa tantienquio icquin nidaidën icquiduidtsëqui tantiec tabadec. 20Padnuen nuquitedi Nuquin Papabëd abuc tabadtequido nendac. Abi yacno buannuec abucuësh abi yacno tabadmianquid Nuquin Icbo Esuquidistu chosho isnuen cainec nuqui tabadec. 21Choshon aidëmbi nuquin dada icsactsëcquio icbuedi aton dada chuca uacpadombuen nuquin dada chuca uaindac. Abitedishun Icbombo yec nadatiambocquid yec abitedi namequidquio icquin aden nuquin dada chuca uaindac.
Currently Selected:
Pidipos 3: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.