Pidipos 2
2
Utsibobëd tantiananec tabadte chiaid
1Abi tantiasho Esuquidistun: Utsibo chieshtomenquio icquin bëdambuen nabanmeta, caid icquin utsibobëd tantiananquin nabanquin dayacquio icmendac. Adecbidi mibitedi tantiananquin dayacquio icmiaid icquin natiamiaid utsibo icsho bëdambo icmendac. Adembidi Nuquin Papan aton Mayan abëd icmequin bëdambuec tabadquid icmiaidobidi nendac. Adecbidi utsibo natiasho issun nashunte bunquid icta. 2Adquidbidi nebi, quequin tantiec utsibobëd tantianancuededta. Ubi cuishoncamenuec adec tabadta. Mibitedi tantiananec: Nadombuen nabannuna, quequin abentsëcshun tantiacbimbuen tantiec bëdambuec tabadta. 3Utsibon mibi chieshënquin nacpaden nainda. Ubiuidtsëqui bëdamboshë iquebique. Cunauidtsëqui nanu, quec mibiuidtsëqui tantiadec tabadenda. Adec tabadenquio yec: Ubi bëdapabi icnuc utsibo bëdamboshëcquido neque. Nashunnu, quec bëdambuec tabadta. 4Mimbi tantiacpadombuenuidi nainquio icquin utsin tantiacpadombuentsen nata. Mitsanauidi tantienquio icquin utsibo nashuntetsen tantiata.
Esuquidistu mamënshunquin uënës uacsho uincuenmeshun Nuquin Papan abëd tabadmete chiaid
5Esuquidistubëd daëdash abentsëc yacbimbuec tabadquid icquin aidën nanëdacpadombuen naic mibitedi bëdambo ictsiac. 6Nadquid Esus icpanëdash:
Nuquin Papa padquidquiobidi Esuquidistu nepanëdash.
Adquid yec: Mibëtambi namec bëdambo iquebi, quenquio icquin Nuquin Papan chiacpadombuen napanëdash.
7Adquid icbuedi atonatedi nianec nidaidën chopanëdash.
Adec iuabimbuecquid yanec matsesash
nuquipadquidquio yampanëdash.#2.7 Ëndenquimboshë Esus tishabicnuc aidën aden nate chuipampid iste bunquin. Isa. 52.13 ista.
8Matses iuabimbuecquid yampanëdash.
Adash aton Papan chiacpadombuen nabanequi uënëspanëdash.
Cueste napotiaidën dectanquin uënës uapanëdash.#2.8 Ëndenquimbo Esus uënës uate chuipampic. Isa. 53.3-12 ista.
9Adec ambi chiampicpadec uënësacsho issun aton Papan bëdambuen ispanëdash.
Adoshombic abitedishun Icbombo icmequin bëdamboshëcquid icmepanëdash.
10Aden Nuquin Papan bëdamboshëcquid Esus icmiac, quequin tantiec aid ismec ma nëidtedi dannëshën tinquebudcuedednu,
abuc tabadquido yec, nidaidën tabadquido yec, nidaid#2.10 Uënësaidobien chuichitequien nec. ëquëduc tabadquido yec quequido.
11Ma abitedishunquio: Esuquidistu Nuquin Icbombo nec,
quequin tantiaquin: Nuquin Papatsen bëdamboshë iquec, ma canu, quequin adopanëdash.#2.11 Isayasën abitedishun: Bëdamboshë iquec, catebidi chuipampic. Isa. 45.23 ista.
Utsibo Esus tantiamequin Nuquin Papabëd tabadtequido icmete chiaid
12Cun utsibo, umbi tantiaido mibitedi neque. Tantia. Chuinu. Ubëd tabadquin umbi chiacpadombuen mimbi nadedniondacpadombuen ubi uanno nidan adembidi bëdambuen nata. Nuquin Papa dacuëdampambo icquidën chiaid niacmane, quiash aidën chiacpadombuen naic aidbëd tabadnush bëdambuec tabadta. 13Nuquin Papan: Ma bëdambuec tabadnu, quequin ambi tantiacpaden bëdambuec tabadte bunmequin mibitedi bëdambuen namendac.
14Adoac bëdambuec tabadec chushcananenda. Adecbidi: Bëdambuen nanuna, cac chieshec icsambuec onquenda. 15Esus tantiaquido icsambo iquec, utsibo quenushe. Adenda. Nuquin Papan: Cun mado nec, cun champi nec, caido yec bëdambuec tabadta. Matses dadpenquio abi icsate bunacpadequi icsamboshëcquido icnubi adequi bëdambuec tabadta. Adec tabadquin icsambo icquido mimbi Esus tantiametsiac paposhquiacbimbuecnuc. Aden nabanec mibitedi bëdambuec tabadendac. 16Adash chieshtoenquio icquin umbi chuibambued tantiaquin: Esuquidistu nidaidën padpidec choaid uëshëmbi mibitedi isec: Bëdambuen naondambi. Adoac Esus tantiec: Aidbëd iquendabi, quecuededendac. Adecbidi capucuennec chonoadquin ambembi chuibenniambo iccondambi, quequin tantiendambi. 17Bëdambo mibi iquec, Nuquin Papan mabi canu, queshun Esus tantiaquin bëdambuen nabanta. Utsibo nashunquin chieshtoenquio icquin chuibanta. Aden bëdambo nuadtequid Nuquin Papa shëdmiacbimbuen mimbi chuibanaid chuisho tantiec tsadsho ubi caic: Cuessunnenu, cac bëdambo ictsiabi. Aido bëdambo iquec, quiash mibitedi tantiec ubi cuishonquenubi adecbidi cuishonqueta. 18Adec cuishonquec ubëd cuishonquequiota.
IV. PABADOBËTAN CHUIBENNEQUIDO CHIAID
(2.19-30)
Timoteo chiaid
19Abi tantiaquid icsho Nuquin Icbo Esusën tantiamiac Timoteo mibi yacno nëbi nidmete bunebi. ¿Mitsipadec aido tabadeque? Istan, quequin nidmembi. Adoac mibitedi istanshun chuituidac cuishonquec bëdambo ictsiabi. 20Timoteopadquid utsi nibëdec. Aid abentsëcshumbi umbi mibitedi tantiacpadombuembidi tantiec. 21Utsibombien atonauidtsëqui tantiaquin Esuquidistun chiacpadombuen natiapimbo iquec. 22Timoteon bëdambuen naondash, quequin mimbi tantiec. Mimbi aden tantianubi ubëtan Esusën naid chuibanondash. Adquid yec cun madobimbuecquid nec. 23Adquid icsho mibi yacno: Istan, canun ubi quënën tsadunquido ubi caic: Cuessunnenquio icquimbien puduenmetiad, quesho tantiabono. Aden tantiashun abia nidmendambi. 24Abi tantiaquidquio icsho Nuquin Icbon: Nidtan, cac mibi yacno ubitsen badedquio nidtsiabi.
Epapadodito chiaid
25Epapadodito cun utsibimbuecquid mimbi: Nashuntan, quequin mibitedishun chomenëdaid nëmbo iquec. Utsibon chieshënnubi dacuëdenquio icquin ubëtan Esusën naid chuibanondash. Adondaidi nëbi: Mibi icnëdacno tabadec nid, cun utsi, caombi. 26Aidi mibitedi padpiden iste bunec uënësquio yec tsadposh. Ubi nënec uënëstsembued cun matses chuinuec nidaccosh, quiash shubiantiadtsëcquio icposh. 27Abimbo caic. Adec nënec uënëstsenquiosh. Adshobien Nuquin Papan bëdambuen isquin bëdanmeposh. Ubitsen bëdambo icmenuen Nuquin Papan adoposh. Epapadodito uënësquio icnuc ubi shubiec tsadsho issun: Aid uënësan uënësquio yec Pabado natianushe, queshun Nuquin Papan Epapadodito bëdanmeposh. 28Adoacsho aid mibi yacno badedquio nidmete bunebi. Aid isash mibitedi bëdambo ictsiac. Adnubi ubitsen uënësquio icbuedi bëdambo ictsiabi. 29Nuquin Icbo Esus tantiaquid yec nuquin utsi Epapadodito nidacsho isash cuishonquequin bëdambuen ista. Adquid Esus chuibanquido utsibo mibi yacno nidacsho adembidi bëdambuen ista. 30Esuquidistun chiacpadombuen naic ubëdi tabadec choash ubi nashunec nëncuenash Epapadodito uënëstsenosh. Chotiapimbo icquin mimbi: Nashuntan, cac choash nibëdantsenoshe. Mibi yacno nidacsho bëdambuen ista.
Currently Selected:
Pidipos 2: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.