Loma 15
15
Vwaeleleseni vakweni kesi yeni vavenya
1Yetu tunakolo mukukulaela tunapande kukwasa vaje kanda vakole mukukulaela kwavo ngeci vambate vitele vyavo. Kutwapandele kulivwaelelesa yetu vavenya embwe. 2Oloni tuvavoshe tunapande kuvwaelelesa vakwetu mukuvalingila vyavivwa, ngeci vakole mukukulaela. 3#Mya 69:9 Omwo Kilistu kalivwaelelesele ikeye vavenya embwe. Oloni ngwe muvyendeka visoneka ngwavyo “Kushaula kuje kuvamishawile kunaija ali yange.” 4Vyuma vyoshe vije vivasonekele mu Visoneka vavisonekele mukutulongesa, ngeci tukale na cinyangavili cakutunda ku lukakateya nakukutakamesa kuje kutunda ku Visoneka. 5Co Njambi, nsina ya lukakateya nakutakamesa, amyasese kukala mu viyongola vimo akati keni akukava nakutembunwina Kilistu Yesu, 6ngeci yeni voshe mukashangazale Njambi ikeye Ishe ya Mwene yetu Yesu Kilistu na lijwi limo.
Vin̄anda Vyavivwa kuli vaje kesi vaYunda
7Ngecivene, litambuleni umo na mukwavo, ngwe mwanamitambula Kilistu, ngeci mwane vumpau kuli Njambi. 8Omwo njimileka ngwange Kilistu vamupwisile muka-kupangela vaYunda, mukusholola ngeci Njambi wapwa muka-vushunga, mukulingisa vikulaeso vyendi kuli vakukulwila vavo ngeci vipwe vya vushunga, 9#2 Sam 22:50; Mya 18:49 co ngeci, nameme vaje kesi vaYunda vashangale Njambi omwo mema ku mbunge endi. Ngwe muvyendeka visoneka ngwavyo,
“Ngecivene, njikakushangazala akati ka vaje kesi vaYunda,
njikaimba nakukushangazala.”
10 #
Kwi 32:43
Co lalo visoneka vyendeka ngwavyo,
“Yeni voshe kesi vaYunda, joleleni amo na vanu va Njambi!”
11 #
Mya 117:1
Co visoneka vyendeka ngwavyo,
“Shangazaleni Shukulu Kalunga yeni voshe kesi vaYunda,
mushangazaleni yeni voshe vanu!”
12 #
Isa 11:10
Co lalo Isaya endeka ngwendi,
“Mutekulwila wa Njesi akasholoka,
akaija mukushwana vaje kesi vaYunda,
co vakaka cinyangavili cavo muli ikeye.”
13Co Njambi, nsina ya cinyangavili, amishulise nakuvwaelela kwoshe na kwoloka omwo akukulaela kweni, ngeci cinyangavili ceni cikole mu nzili ya Munzinzime Wakujela.
Omwo vikajo Paulu wavasonekelele nakusimpa
14Vakwetu, njamono ngwange mwa vushunga yeni munashulu na vuvwa, munazivisisa manene, co mwasa kulilongesa umo na mukwavo. 15Oloni mu mukanda ou njinasimpi akusoneka vyuma vimo vinjamyanukisa. Njinasimpi omwo a kutetela kuje kwananjana Njambi 16akupwa ngamba ya Kilistu Yesu akupangela vaje kesi vaYunda. Njilinakupanga ngwe muka-kukombelela mukwambulula Vin̄anda Vyavivwa vya Njambi, ngeci n̄ombelo ya vaje kesi vaYunda Njambi aitambule, ije Munzinzime Wakujela nakundika kuli ikeye. 17Mu kulitombola muli Kilistu Yesu, njasa kulishasha akupangela Njambi. 18Omwo njikasimpa nakwendeka vije lika vyanalingi Kilistu muli yange mukutwamenena vaje kesi vaYunda ngeci vononoke Njambi. Nalingi evi a majwi ange na a vilinga vyange, 19na nzili ya vizivukiso na vikomokeso, na nzili ya Munzinzime wa Njambi. Ngecivene, mukwenda kutunda ku Yelusalema nakweta ku Ilikyume, njinamanesa kwambulula Vin̄anda Vyaviwa vya Kilistu. 20Cizango cange simbu yoshe cinapu kwambulula Vin̄anda Vyavivwa mu mitambela ije kanda vazive vya Kilistu, kutewa njikatungila a luvula lwanendi laja munu weka. 21#Isa 52:15 Oloni ngwe muvyendeka visoneka ngwavyo,
“Vaje kuvavalekele ali ikeye vakamumona,
co vaje kuvazivile vakazivisisa.”
Vutumbe vwa Paulu vwakuya ku Loma
22 #
Lom 1:13
Co vanjitangwile a visimbu vyavingi mukwija kuli yeni. 23Oloni ololo njinamanesa vipangi vyange mu mitambela eyi, co njashakele a myaka yaingi ngeci njiije njakumimone, 24njili na cinyangavili cakulinga ngeci ololo. Njishaka kumimona a vungenzi vwange vwa kuya ku Sepeine, ngeci mwakunjikwase akuya kuje, omo njinasikama neni kasimbu nakuvwaelela. 25#1 Koli 16:1-4 Co ololo, njiya ku Yelusalema nakupangela vanu va Njambi kuje. 26Omwo vikungulukilo mu Masendoniya na mu Akaya vanayongola kujeneka kuvaleka kwana mulambu mukukwasa tuutu akati ka vanu va Njambi vali mu Yelusalema. 27#1 Koli 9:11 Vakevo vavenya vayongwele kulinga ngeci, oloni a n̄anda eyi, vakevo vali na likongo ngeci vavakwase. Omwo vaYunda vaaneneko vivezikiso vyavo vya munzinzime kuli vaje kesi vaYunda, co vaje kesi vaYunda vanapande kupangesa vivezikiso vyavo vya vufuko mukukwasa vaYunda. 28Omo njinamanesa vipangi evi nakwetesa vimbongo vyoshe kuli vakevo vije vivavakungulwilile, co njikaya ku Sepeine nakumisikamesa a ngila yange yakuya kuje. 29Co omo njiija kuli yeni, njazivuka ngwange njikaija nakushula kwa vivezikiso vya Kilistu.
30Njimilambelela vakwetu, ali Mwene yetu Yesu Kilistu na a cizemo ca Munzinzime ngwange, likumbasaneni amo nange mukunjilombelela manene kuli Njambi. 31Lombeleni ngeci njikakale kujeneka vushonde kuli vaka-kujeneka kukulaela mu Yundeya, co lalo vipangi vyange mu Yelusalema vakavitambule kuli vanu va Njambi vaje vali kuje. 32Ngecivene, njikaija kuli yeni nakuvwaelela kwoshe, nga cinapu cizango ca Njambi, nakuvwaelela kwakuvwa mukumisikamesa. 33Njambi, nsina ya kwoloka, akale neni voshe. Ewa.
Currently Selected:
Loma 15: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006