Mbimbi 4
4
Munima yakuwa kwa Yelusalema
1Vuvwa vwa ngolinde yetu yakuvyazima vunahu,
mamanya a Njuvo ya Shukulu Kalunga
anashandokela mu vitapalo mwoshe.
2Vakwenje va Siyone vapwile va seo
yakama kuli yetu ngwe ngolinde,
oloni ololo valinakuvapangesa
ngwe vindeo vyangoco vya vuma.
3Nameme vaina ya vana va vimbanje
akalele mwamuvwa vana vendi,
oloni vanu vange vanapu ngwe vanavilanda,
vali na muuka kuli vana vavo.
4Vecelela vana vavo kulanduka
ku njala na kutsa ku lihwila,
vanike valinakulomba vyakulya
oloni naumo wai avanavyo.
5Vanu vaje vakele nakulya vyakulya
vyavivwa valinakulanduka
ku njala mu vitapalo,
vanu vaje vayoyele kuyoya kwakuvwa,
valinakushakezeka vyakulya
mu vimbulu vya mazilo.
6 #
Kus 19:24
Vanu vange vanavanyanyamesa manene
kutuvakana vuvi vwa Sondoma,
nganda ije yanyongele na nzili ya Njambi.
7Vana va vimyene vetu va vanalume
kuvapwile vaka-kujwala embwe,
oloni vapwile vakutoka to ngwe mavele,
vakele na nzili, co lalo vapwile vakutakama,
nakuvyazima navukangule.
8Ololo vanavevala mu vitapalo
kujeneka kuvazivuka,
vihanga vyavo vinazivala vwi,
co vikonde vyavo vinominina
a vitsiya vyavo cau ngwe viti.
9Vaje vatsililile mu nzita
vatsile mwamuvwa kutuvakana
vaje vanatsi kukotokela,
vaje valandukile ku njala noo vatsile
omwo vajenekele vyakulya vyakuvayoyesa.
10 #
Kwi 28:57; Ezek 5:10 Tuyando twakama tuje twezile
ali vanu vange twavanenelele
tuyando twakukomokesa,
visemi va vanakazi vatelekele vana vavo
kupwa vyakulya vyavo.
11Shukulu Kalunga wecelele vukalu vwendi vwakama,
washwamekele tuhya a Siyone tuje twayenyekele yoshe njwa.
12Naumo wai kwoshe-ikwoshe nambe ku vaka-kushwana
va miyati yeka wakulaelele ngeci vitozi vasa kutuva nakukovela
mu vikolo vya Yelusalema.
13Oloni eci calingiwile,
omo vaka-kwimanena va mu Yelusalema valingile vuvi,
co vaka-kukombelela vamwo vakele na mulonga
wakunena kutsa kwa vanu vakujeneka mulonga.
14Co vantwama vendi vakele nakwendangana mu vitapalo
ngwe tupuputwa.
Valijwalesele na maninga,
co naumo wai wasele kuvakwata.
15Vanu vatambekele ngwavo,
“Tundeni kuli yetu!
Munalijwalesa kesi mutukwate!”
Ngecivene, vakele nakwendangana
kutunda ku lifuti limo,
nakuya ku lifuti likwavo,
oloni naumo wai wavatambwile.
16Shukulu Kalunga kombileko
mbunge lalo kuli vakevo, ikeye vavenya wavashandwele.
Kasingimikile nameme vaka-kukombelela vetu,
nambe vantwama vetu.
17Twakengelelele vukwasi kwija kuli yetu
noo twajukile kukengelela.
Twakengelelele ngeci tumone vukwasi
vutunda ku muyati umo wa vanu,
oloni muyati wa vanu naumo wai watwanene vukwasi.
18Vitozi vakele nakutukengelela,
oloni kutwasele nameme kwenda mu vitapalo.
Matangwa etu ahwile,
co twetele ku shongo yawo.
19Vaka-kutukava vatushekele vwasi
kutuvakana vingonga vakupulula.
Vatukavele mu malundu,
nakutukwatela mu mambo cishitumukila.
20Co vafungulwile nsina yakuyoya kwetu,
ikeyo mwene uje yaangwile Shukulu Kalunga,
uje itwakulaelele ngwetu akatunyunga
kuli voshe vatukovelela nakutulwisa.
21Yeni vanu va Endome na Uze, joleleni,
vwaeleleni mwoshe mumunashakela.
Neni lalo tuyando tweni tulinakwija,
neni lalo mukapelyangela
mushelengwa na shwamwa.
22Siyone natambula fweto yendi ya vuvi,
co Shukulu Kalunga kakavatumbika lalo
mu vunzinda embwe.
Oloni Endome,
Shukulu Kalunga akakunyanyamesa nakusholola
milonga ya vilinga vyove.
Currently Selected:
Mbimbi 4: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006