1 Mizimbu 29
29
Vwana vwakutungisa Njuvo ya Shukulu Kalunga
1Mwene Ndaviti walekele mbunga yoshe ngwendi, “Munange Solomoni ikeye yanaangula Njambi, oloni ikeye acili mwanike, kesi na mana manene. Vipangi evi vilingiwa vinapu vyakama manene, omwo Njuvo eyi kesi ya vanu embwe, oloni inapu Njuvo ya Shukulu Kalunga Njambi. 2#1 Miz 22:5 Njinalingi na nzili yange yoshe kuvwaesa vyakupangesa Njuvo ya Shukulu Kalunga, ngolinde, na siliva, na vunengu, na vutale, na mavaya, na mamanya a seo yakama, na mamanya akwola, na mamanya akucakeya mweka na mweka, na mamanya amavala akusalimba asi. 3Co lalo akamwa yevi vyoshe njinalingi, njinaana siliva na ngolinde vyakutunda ku vufuko vwange, omwo ya cizemo cange a Njuvo ya Shukulu Kalunga Njambi. 4Vulemu vwa ngolinde yakujela injinaana vunatuvakana 100, na 240 ya vulemu vwa siliva yakujela yakucakeya a vivumbe vya Njuvo ya Shukulu Kalunga, 5na vyuma vyoshe vije vivakalinga vaka-vutongwe. Co ololo iya ali na cizango cakwana vwana kuli Shukulu Kalunga?”
6Asinoni vakulunu va vikota, na vamyata va miyati, na vaka-kushika nzita, na vaka-kwendesa vipangi vya mwene valyanene vakevo vavenya kwana vwana, 7co vaanene vyuma evi ku vipangi vya Njuvo ya Shukulu Kalunga, vanenele ngolinde ya vulemu vwakupwa 170, na siliva ya vulemu vwakutuvakana 340, na vunengu vwa vulemu vwakupwa 620, co na vutale vwa vulemu vwakutuvakana 3,400.
8Co vaje vakele na mamanya a seo yakama vaanene ku vufuko vwa mu Njuvo ya Shukulu Kalunga, vuje vwakele nakunyunga Njehiyele kaLevi wa ku cikota ca Ngeleshone. 9Co vanu vaanene na cizango kuli Shukulu Kalunga, cavavwasele manene akumona ngeci vanana vyavingi. Co mwene Ndaviti lalo nendi wavwaelelele manene.
Ndaviti ashangazala Njambi
10Co aje vene, kulutwe lwa mbunga yoshe, Mwene Ndaviti washangazalele Shukulu Kalunga, wendekele ngwendi, “Shukulu Kalunga Njambi ya kukulwila yetu Yakomba, vakushangazale ku myaka yoshe! 11#Mat 6:13 Yove wapwa uwakama, wa nzili, na vumpau, na vuvwa, na vumwene vwove vwapwa vwakama. Vyuma vyoshe vya mwilu nevi vya asi vyapwa vyove, co yove wapwa mwene, yove wapwa muka-kushwana vyoshe. 12Vufuko vwoshe na kasingimiko vyatunda kuli yove, washwana vyuma vyoshe na nzili yove na vukama vwove, co yove wasa kupwisa munu woshe kupwa wakama na nzili. 13Ngecivene, ololo Njambi yetu, tulinakukukandelela, nakushangazala lizina lyove lya vumpau.
14“Nameme yange na vanu vange, kutwasa kukwana cuma cimo, omwo vyuma vyoshe vyapwa vwana vwakutunda kuli yove, co yetu tunakwilwisila lika vije vyapwa laja vyove. 15Yove wazivuka, Shukulu Kalunga, mukuyoya kwetu yetu tunapu ngwe vindungo na vangenzi, ngwe muvapwile vakukulwila vetu. Matangwa etu anapu ngwe kwita kwa munzinze, co kutwasa kuputumuka ku kutsa. 16Shukulu Kalunga, Njambi yetu, tunanena amolika vufuko ovu vwoshe, mukutunga Njuvo yove, mukusingimika lizina lyove lyakujela, oloni vufuko vwoshe vwatunda kuli yove, co lalo vufuko vwoshe vwakundama kuli yove. 17Njazivuka ngeci yove Njambi yange ukeseka mbunge ya munu na munu, co ukazivi kuvwaa na vanu vaje vaka-vushunga. Yange njinaana vyoshe evi kuli yove na cizango, co yange njinamono vanu vove ava vanakunguluka kuno vanaana nakuvwaelela kuli yove. 18Yove Shukulu Kalunga Njambi ya vakukulwila vetu va Avilahama, na Isake, na Yakomba, nyunga viyongola vyakulinga ngeci mu vimbunge vya vanu vove na kwaka vimbunge vyavo kuli yove. 19Ana munange Solomoni mbunge yakulumbunuka, ngeci anyunge vyuma vyoshe vije viwunamushiki, nakutunga Njuvo yove injinavwaesela cimweja vyuma vyakutungisa.”
20Asinoni Ndaviti washikile vanu ngwendi, “Shangazaleni oni Shukulu Kalunga Njambi yeni!” Co mbunga yoshe yashangazalele Shukulu Kalunga Njambi ya vakukulwila vavo, co vatsikamene nakulemesa, mukwana kasingimiko kuli Shukulu Kalunga na kuli mwene lalo.
21Co alikaki mutondo vakombelelele vimuna, nakuvakundika kuli Shukulu Kalunga, asinoni vavaanene kuli vanu ngeci valye. Vakombelelele vingombe 1,000, na majamba a vimanga 1,000, na vana va vimanga 1,000, vaje vavenyekele voshe a mutula. Co lalo vanenele mulambu wa vinyu. 22Ngecivene, a litangwa lije vavwaelelele manene omo valile nakunwa ku mesho a Shukulu Kalunga.
Vendekele lalo simbu yamucivali ngeci Solomoni ikeye mwene. Mu lizina lya Shukulu Kalunga vamuvwavesele mazi, kupwa muka-kuvashwana, na Zandoke muka-kukombelela. 23#1 Vim 2:12 Ngecivene, Solomoni washwanene a litanda lya ishe Ndaviti, lije lyamuvwaeselele Shukulu Kalunga. Co ikeye wapwile mwene wakuvezika, muyati woshe wa Isalele vamwononokele. 24Co vamyata voshe, na mashwalale, nameme vana va Ndaviti vakwavo vakulaesele ngeci vakononoka Solomoni akupwa mwene. 25Co Shukulu Kalunga waamesele manene Solomoni ku mesho a vaIsalele voshe, wamwanene vumpau vwa vumwene kuhyana vimyene vakwavo vaje vashwanene mu Isalele.
Kutsa kwa Mwene Ndaviti
26Co Ndaviti muna Njesi wapwile mwene mu Isalele mwoshe, 27#2 Sam 5:4-5; 1 Miz 3:4 myaka yashwanene yapwile makumi awana. Washwanene mu Hevelone myaka itanu na ivali, na mu Yelusalema myaka makumi atatu na itatu. 28Ikeye wakuluvalele manene omo watsile, co wakele na vufuko na kasingimiko, munendi Solomoni wamushwanene kupwa mwene. 29Vin̄anda vya Mwene Ndaviti kutunda kukushangumukila kutwala ku shongo vavisoneka mu mizimbu ya vaka-kwimanena vatatu, Samwele na Natane na Ngande. 30Visoneka evi vikevyo vituleka vati washwanene, nzili mukajo yakele nayo na vyuma vyoshe vije vyalingiwile kuli ikeye na kuli Isalele na kuli vaje vazengelekele vumwene.
Currently Selected:
1 Mizimbu 29: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006