Yuba 8
8
Bilidadaa fala singena Yuba xa
1Suxa kaan Bilidada yi falan tongo, a naxa,
2“Han waxatin mundun yi,
i luyɛ i fala xuini?
Han waxatin mundun yi,
i fala xuine findɛ foye ɲaxin na?
3Alaa sariyan kalɛ ba?
Ala Sɛnbɛ Kanna tinxinna kalɛ ba?
4I ya diine yulubin liga nɛn a ra,
Ala yi e saran e murutɛ feene ra.
5Koni, xa i tan Ala fen,
xa i Ala Sɛnbɛ Kanna maxandi,
6xa i sariɲan, xa i fanɲɛ ayi,
a i malima nɛn,
a i raxɛtɛ i funfuni.
7I kii fonna mi yi sese ra,
i kii nɛnɛn findima nɛn binye gbeen na.
8Nayi, mayixɛtɛ danguxine maxɔdin,
i xaxili dɔxɔ e benbane xaxilimayaan xɔn.
9Amasɔtɔ, en barixi xoroni,
en mi sese kolon,
en ma siimayaan luxi nɛn
alo nininna.
10Koni, e i xaranma,
e falan tima i xa e xaxilimayani.”
11“Gbalan solɛ daraan xanbi ba?
Gbalan sabatɛ igen xanbi ba?
12Hali a xindena,
a mi sɛgɛxi,
a xarɛ sinma sɛxɛn bonne yɛɛ ra
xa a mi igeni.
13Na nan ligama muxune birin na
naxanye ɲinanma Ala xɔn.
Naxanye mi Ala kolon,
ne yigin ɲanma nɛn,
14e yigin kalama nɛn
alo simisamana yalana.
15A yigi sama a banxin nin,
koni a mi sensen,
a kankanxi a yiiseene ma,
koni e mi luma.
16A luxi nɛn
alo wudi xinden sogen na,
naxan a yiine yibandunma nakɔɔn xun ma.
17A salenne godoxi
han e sa so gɛmɛni,
a sa gɛmɛn kuiin li.
18Koni, xa a ba a tideni,
mɛnna bɔxɔna a mɛma a ra nɛn,
a naxa, ‘N tan munma i tan to.’
19E sɛwan ɲanma na kii nin
naxanye ɲinanma Ala xɔn,
gbɛtɛye fan yi mini e funfuni.
20A mato,
Ala mi sɔntaren nawolima ayi,
a mi fe ɲaxi rabane sɛnbɛ soma.
21Ala i ragelema nɛn,
a yi sɛwan sa i yi.
22I yaxune yagima nɛn,
ɲaxudene yi ɲan.”
Currently Selected:
Yuba 8: Kitabuna
Highlight
Share
Copy
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license