Tobit 7
7
Tobias an Rafael kasem haos blong Raguel
1Taem Tobias an enjel Rafael i kasem bikfala taon long Ekbatana, Tobias hemi tok olsem long Asaraeas, ?Brata, yu tekem mi kuiktaem go long Raguel.? Nao enjel ya hemi tekem hem go long haos blong Raguel. An tufala mitim Raguel long eria aotsaet long haos blong hem. Rafael an Tobias i talem halo long Raguel. Raguel hem tok olsem long tufala, ?Tufala brata, yutufala mas kam insaet. Mi hapi tumas fo yutufala kam insaet long haos blong mi.? Semtaem, Raguel hemi tekem tufala go insaet long haos blong hem nao. 2Raguel hemi tok olsem long waef blong hem Edna, ?!Maekrangge, disfala yangman hemi barava luk olsem kasin brata blong mi, Tobit!? 3Edna hemi askem tufala olsem, ??Yutufala blong wea ya?? Nao tufala ansa olsem, ?Mitufala blong Israel long traeb blong Naftali. Mitufala stap long biktaon long Nineve long Asiria, farawe tumas from kantri blong yumi long Israel.? 4Edna hemi ask moa olsem, ??Waswe, yutufala save long Tobit hu hemi kasin brata blong Raguel?? Tufala ansa olsem, ?Ya, mitufala savegud long hem.? Edna ask moa olsem, ??Waswe, hemi stap gud nomoa?? 5Tufala ansa olsem, ?Ya, hemi stap gud nomoa.? Nao Tobias hemi tok moa olsem, ?Tobit ya hemi dadi blong mi.? 6Taem#Jenesis 33:4; 45:14; Luk 15:20. Raguel hemi herem dat Tobit hemi dadi blong Tobias, Raguel hemi krae bikos hemi hapi tumas, so hemi stanap kuiktaem, an kisim Tobias. 7Bihaen, Raguel hemi tok olsem long tufala, ?Letem God blesim yu, san blong mi. Dadi blong yu hemi wanfala gudfala man an wei blong hem hemi stret tumas. Hemi barava nogud tumas wea stretfala man hu hemi kaen olsem hem, hemi blaen olsem.? Den Raguel hemi putum han blong hem raonem solda blong Tobias an hemi krae. 8Tufala Edna an Sera, i krae tu long Tobit. Raguel hemi welkam gud long Tobias an Rafael. So hemi kilim dae wanfala man sipsip, an hemi redim kaikai fo tufala. Taem tufala suim finis, an sidaon long ples fo kaikai, Tobias hemi askem Rafael olsem, ??Brata blong mi, Asaraeas, wataem nao bae yu askem Raguel fo mi maritim Sera?? 9Taem Raguel hemi herem toktok blong Tobias, hemi tok olsem long hem, 10?Yu kaikai an dring fastaem, mekem yu hapi disfala ivining. Hemi stret nomoa fo yu maritim Sera. Mi no letem eniwan fo maritim hem, bikos yu nao yu garem raet long laen blong mi. Bat, san blong mi, mi mas talem tru samting long yu nao, samting wea hemi hapen long hem. 11Mi letem hem fo marit sevenfala taem finis, an sevenfala man ya evriwan i from laen blong mi. Evriwan long olketa i dae long naet ya olketa marit long hem taem olketa jes go insaet long rum fo slip tugeta. Bat san blong mi, yu mas kaikai an dring fastaem. Bae Lod hemi lukaftarem yutufala.? Tobias hem ansa olsem, ?Bae mi no kaikai o dring go-go kasem taem yu talem mi hemi oraet fo mi maritim Sera.? 12Nao Raguel hemi tok olsem, ?Ya, hem oraet. Bae mi givim long yu fo maritim falom lo blong Mosis. God long heven hemi planem finis disfala marit, so yu tekem Sera olsem waef blong yu nao. Stat distaem an olowe nao, yu blong Sera, an Sera hemi blong yu. Sera hemi blong yu stat distaem an evritaem olowe nao. Letem Lod long heven hemi gadem yutufala long disfala naet. Letem hem tinghevi long yutufala, an kaen long yutufala.?
Tobias an Sera i marit
13Bihaen, Raguel hemi kolem kam dota blong hem Sera. Taem hemi kam insaet, dadi blong hem hemi holem han blong hem an givim go long Tobias. An hemi blesim tufala olsem, ?Tobias, yu tekem Sera olsem waef blong yu falom olketa tising long lo blong Mosis. Tekem hem sef go long ples blong dadi blong yu. Letem God long heven hemi givim hapi laef long yutufala.? 14Nao Raguel hemi talem Edna fo tekem kam wanfala pepa fo hem raetemdaon agrimen long marit blong tufala. Agrimen ya hemi talem dat Raguel hemi givim Sera fo maritim Tobias falom olketa tising long lo blong Mosis. 15Taem seremoni hemi finis, olketa stat fo kaikai nao. 16Raguel hemi kolem kam waef blong hem, an tok olsem long hem, ?Metron, yu go redim rum wea no eniwan stap long hem, an tekem Sera go insaet.? 17Edna hemi go redim bed olsem Raguel hemi talem hem fo duim. Bihaen, hemi tekem Sera go insaet long rum, an Sera hemi stat fo krae. Den Edna hemi draem tias blong hem, an tok olsem long hem, 18?Sera, yu no wari. Distaem mi biliv bae Lod long heven hemi mekem yu hapi an no sore moa. So dota blong mi, yu no fraet.? Den Edna hemi lusim rum ya.
Tobias hemi aotem wanfala devol from Sera
Currently Selected:
Tobit 7: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.