Lamentesin 3
3
Nomata hemi panis, bat Jerusalem hemi trastem Yawe
(Profet hemi tok)
1Mi nao wanfala man wea mi savegud long wei
wea Yawe hemi panisim eniwan,
taem hemi kros fogud long hem.
2Hemi ronem mi aot from delaet,
mekem mi stap long tudak.
3Hemi gohed fo wipim mi nogud,
stat long moning go-go kasem tudak.
4Panis ya blong hem
hemi mekem mit an skin blong mi i olsem oloman,
an hemi brekem olketa bon blong mi.
5Hemi mekem mi fo safa,
an mekem laef hemi had tumas,
olsem wea enemi hemi raonem taon
fo spoelem hem finis.
6Hemi mekem mi fo stap long tudak,
olsem man wea hemi dae longtaem bifoa kam.
7Hemi olsem wea
hemi taemapem mi long hevi sen,
an putum mi long prisin,
mekem mi no save ranawe.
8Nomata mi kraeaot go long hem,
bat hemi les fo lisin long prea blong mi.
9Hemi olsem wea hemi blokem rod blong mi
long bikfala wolston,
an mekem rod ya hemi had fogud.
10Hemi weitem mi,
olsem wea animol ya bea o laeon
hemi we-weit fo kasholem enisamting fo kaikaim.
11Hemi kasholem mi,
an pulum mi aot from rod,
an pisisim mi,
an livim mi long ples wea no eniwan save helpem mi.
12Hemi olsem man fo sutim bou,
an hemi tagetem mi long olketa aro blong hem.
13Olketa aro hemi sutim mi long hem,
i kasem haat blong mi.
14Olketa pipol blong mi evriwan
i gohed fo mekfan long mi.
Olketa mekem singsing fo laflaf nomoa,
stat long moning go-go kasem tudak.
15Hemi spoelem laef blong mi olsem wea
kaikai blong mi hemi roten,
an dring blong mi hemi saoa.
16Hemi pusum mi godaon long dast,
an step long mi,
wea fes blong mi hemi bangam graon,
an olketa tit blong mi i brek long ston.
17Mi no save stap moa long piis,
an mi fogetem nao
wei wea mi save stap gudfala.
18So mi tingting wea
strong blong mi hemi finis,
an mi no save weitem Yawe moa
fo hemi helpem mi.
19Oltaem mi tingting long trabol blong mi,
wea mi barava filnogud tumas,
olsem wea mi no garem hom fo res long hem,
an mi fil olsem wea mi dringim poesen.
20Evritaem mi tingabaotem disfala samting,
tingting blong mi hemi nogud tumas.
21Bat nomata olsem,
narafala samting nao mi tingabaotem,
an hemi liftimap moa tingting blong mi:
22Wei blong Yawe fo tinghevi long yumi,
hemi no save finis.
Wei blong hem fo sore an kaen long yumi,
hemi gohed olowe nomoa.
23Ya, olketa wei ya blong Yawe hemi gohed olowe,
olsem niufala de wea hemi kamap long evri moning.
Yawe, mi preisim yu fo disfala wei
wea mifala save trastem yu olowe.
24Mi tingting olsem,
“Yawe nao hemi evrisamting mi nidim,
dastawe nao mi save gohed fo trastem hem.”
25Yawe hemi blesim olketa hu i trastem hem,
an long olketa hu i laekem tumas fo savegud long hem.
26Hemi gud sapos yumi stap kuaet,
an we-weitem fo hemi kam sevem yumi.
27Hemi gud sapos yumi mas lanem wei ya
long taem wea yumi yang yet.
28Sapos Yawe hemi mekem eniwan fo safa,
hemi gud fo hem sidaon seleva,
long ples wea hemi kuaet.
29Hemi gud fo hemi mekem hem seleva lou,
bikos maet gudfala samting hemi hapen yet.
30Sapos pipol laek fo hitim hem long fes,
hemi mas no trae fo stopem olketa.
Hemi gud nomoa fo hemi letem olketa
fo mekful long hem.
31Masta ya hemi no save gohed fo les long yumi
fo evritaem olowe.
32Nomata hemi save mekem yumi fo safa,
bat bae hemi save sore an kaen long yumi,
bikos hemi tinghevi long yumi olowe.
33Hemi no filhapi
taem hemi mekem olketa pipol fo safa,
an mekem trabol fo kasem olketa.
34God hemi save,
taem enemi hemi step long yumi
taem yumi stap long prisin.
35God hu hemi hae tumas
hemi save nomoa,
taem pipol i tekemaot olketa raet blong yumi.
36Masta ya hemi save tu,
taem jaj hemi no falom stret wei
fo jajem yumi long kot.
37?Waswe, man save mekem enisamting fo hapen,
sapos Masta ya hemi no letem?
38God hu hemi hae tumas nomoa save tok,
an mekem gudfala samting o bikfala trabol fo kamap.
39?Waswe, yumi garem raet fo komplen
taem panis hemi kasem yumi from sin blong yumi?
40Hemi gud fo yumi luklukgud long olketa wei blong yumi,
mekem yumi lusim eni nogud wei,
an kambaek long Yawe.
41Hemi gud fo yumi liftimapem haat an han blong yumi
long God hu hemi stap long heven,
an yumi prea go long hem olsem,
42“Mifala sin, an mifala agensim yu,
bat yu no fogivim mifala yet.
43“Bikfala kros blong yu
hemi mekem yu fo aftarem mifala an kilim mifala dae,
an yu no save sore long mifala.
44Bikfala kros blong yu
hemi olsem klaod wea hemi tik tumas,
mekem olketa prea blong mifala
hemi no save kasem yu.
45Yu mekem mifala fo kamap olsem hip long ravis
long tingting blong pipol long wol.
46“Olketa enemi i gohed fo laf
an mekfan long mifala.
47Mifala safa tumas,
an plande trabol tu hemi kasem mifala.
Mifala i fraet fogud,
an laef blong mifala hemi barava nogud tumas.”
(Profet hemi gohed fo tok)
48Mi krae bikfala,
wea tias blong mi
hemi gohed fo ran kamdaon olsem riva
bikos yu spoelem olketa pipol blong mi.
49Bae mi gohed fo krae bikfala olowe,
an mi no save stop,
50go-go kasem taem wea Yawe hu hemi stap long heven,
hemi luk kamdaon long trabol ya.
51Taem mi lukim trabol
wea hemi kasem olketa woman blong disfala taon,
mi barava sore an krae fogud.
52Nomata mi no duim enisamting long olketa,
bat olketa enemi i kam handing long mi
olsem wea i kasholem bed long trap.
53Olketa laek fo kilim mi dae,
so olketa torowem mi go long wanfala hol,
an sutim mi long ston.
54Hemi olsem wea wata hemi kavaremapem mi,
nao mi tingse bae mi dae nao.
55Bat long insaet long hol ya,
mi kraeaot go long yu olsem,
56“!O Yawe, plis yu no satem ia blong yu
taem mi krae go long yu!”
An yu lisin kam long mi.
57Yu kam kolsap fo helpem mi,
an yu tok olsem, “Yu no fraet.”
58O Masta, yu kam an saet wetem mi,
an yu sevem laef blong mi.
59Yu lukim finis long wei
wea olketa enemi i spoelem mi.
Bat distaem, plis yu jaj long stretfala wei,
an som wea mi nao stret.
60Yu savegud wea olketa enemi blong mi
i heitem mi, an mekem plan agensim mi.
61O Yawe, yu herem
wea olketa toknogud long mi,
an mekem plan agensim mi.
62Olketa gohed fo tokagensim mi,
stat long moning go-go kasem tudak.
63Oltaem nomoa,
olketa gohed nomoa fo mekem singsing fo laflaf,
stat long moning go-go kasem tudak.
64O Yawe, plis yu sensimbaek long olketa
evri ravis samting wea olketa bin gohed fo duim.
65Plis yu satem tingting blong olketa.
!Mekem trabol fo kasem olketa!
66Plis yu ronem olketa
long bikfala kros blong yu,
mekem olketa finis from disfala wol.
Currently Selected:
Lamentesin 3: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.