2 TIKRONIKA 30
30
Ta ku endla nkhuvo wa Paseka.
1Hezekiya a rhuma eka va Israele hinkwavo, ni ka va Yuda, a tsala ni mapapila eka va Efrayimi ni va Manase, leswaku va ta endlwini ya Yehovha eYerusalema, ku endlela Yehovha, Xikwembu xa Israele, Paseka. 2Hosi ni tindhuna ta yena ni nhlengeletano hinkwayo va tiyisa mhaka eYerusalema, leswaku Paseka yi ta endliwa hi n'hweti ya vumbirhi; 3hikuva va tsandzeka ku yi endla enkarhini wolowo, hikuva vaprista lava tibasiseke a va nga ringananga, kutani tiko a ri hlengeletananga eYerusalema. 4Mhaka leyi yi va yi lulama emahlweni ka hosi ni le mahlweni ka nhlengeletano hinkwayo; 5kutani va kanela makungu ku tivisa etikweni hinkwaro ra Israele, ku suka eBerexeba ku ya fika eDani, leswaku va ta Yerusalema, ku endlela Yehovha, Xikwembu xa Israele, Paseka; hikuva hi malembe layo tala, a va yi endlanga hilaha ku tsariweke hakona.
6Kutani vatsutsumi va ya etikweni hinkwaro ra Israele ni ra Yuda, va ri ni matsalwa ya hosi ni ya tindhuna ta yena, va vula hi ku lerisa ka hosi va ku: “Vana va Israele, tlhelani ka Yehovha, Xikwembu xa Abrahama, ni xa Isaka, ni xa Israele, kutani yena u ta tlhela eka lava poneke xikarhi ka n'wina emavokweni ya tihosi ta Asiriya. 7Mi nga tshuki mi endla kukotisa vatata wa n'wina ni vamakwenu lava tiariseke ka Yehovha, Xikwembu xa vatata wa vona kutani a va nyiketile emakhombyeni hi laha mi swi vonaka hakona. 8Sweswi mi nga nonon'hwisi tinhamu ta n'wina kukotisa vatata wa n'wina; khomani voko ra Yehovha, mi ta evukwetsimelweni bya yena lebyi a byi hlawuleke hi masiku, mi tirhela Yehovha Xikwembu xa n'wina, kutani ku hisa ka vukari bya yena ku ta mi sukela. 9Hikuva loko mi tlhela eka Yehovha, vamakwenu ni vana va n'wina va ta kuma tintswalo eka lava va va yiseke evukhumbini, kutani va ta vuya etikweni leri; hikuva Yehovha, Xikwembu xa n'wina, u tele tintswalo ni vunene, a nga ka a nga mi fularheli loko mi vuya ka yena.”
10Vatsutsumi va ya emutini wun'wana ni wun'wana etikweni ra Efrayimi ni ra Manase va ya fika eZebuloni; kambe va va hleka va va sandza. 11Hambiswiritano, vanhu van'wana va Asere ni va Manase ni va Zebuloni va titsongahata, kutani va ta Yerusalema. 12Voko ra Yehovha ri va kona ni le tikweni ra Yuda ku va nyika mbilu yin'we ku endla hilaha hosi ni tihosana ti leriseke hakona hi rito ra Yehovha.
13Vunyingi lebyikulu bya vanhu byi hlengeletana Yerusalema, ku endla nkhuvo wa swinkwa leswo kala comela hi n'hweti ya vumbirhi: a yi ri nhlengeletano leyikulu ngopfu. 14Va sungula ku susa tialitari leti ngi ti ri Yerusalema, va susa tialitari hinkwato ta ku hisa mirhi ya risuna, va ti cukumeta exinambyaneni xa Kedroni. 15Kutani va tlhava Paseka hi siku ra khume na mune ra n'hweti ya vumbirhi. Vaprista ni Valevhi va khomiwa hi tingana kutani va tihlawula va humesa tiholokosta endlwini ya Yehovha. 16Kutani va yima endhawini ya vona hilaha va lerisiweke hakona hi nawu wa Muxe, munhu wa Xikwembu. Vaprista va xuva hi ngati leyi va tshamaka va yi amukela emavokweni ya Valevhi.
17Hikuva a ku ri ni vanhu lavo tala enhlengeletanweni lava nga tihlawulangiki, kutani Valevhi va va tlhavela timhamba ta Paseka, va va basisela Yehovha va ri hinkwavo lava nga basangiki. 18Hikuva vanhu lavo tala va tiko, lavo tala va ka Efrayimi ni va Manase, ni va Isakara ni va Zebuloni, a va tibasisanga, kutani a va dyile Paseka, ku nga ri hilaha ku tsariweke hakona. Kambe Hezekiya a va khongelerile, a ku: “Yehovha la nga ni vunene a a rivalele mani na mani la tiyeke mbilu ku lava Xikwembu, Yehovha, Xikwembu xa vatata wa yena, 19hambi a nga basisiwanga hilaha ku fanelaka evukwetsimelweni.” 20Yehovha a yingisa Hezekiya, kutani a hanyisa tiko.
21Vana va Israele lava ngi va ri Yerusalema, va endla nkhuvo wa swinkwa leswo kala comela hi masiku ya ntlhanu na mambirhi, va tsakile ngopfu; siku rin'wana ni rin'wana Valevhi ni vaprista a va dzunisa Yehovha hi timbila leti hlawuleriweke Yehovha. 22Hezekiya a khongotela hi marito lamanene Valevhi hinkwavo lava tlhariheke entirhweni wa Yehovha. Kutani va dya hi masiku ya ntlhanu na mambirhi leswi lerisiweke va ri karhi va tlhava magandzelo ya ku khensa, va dzunisa Yehovha, Xikwembu xa vatata wa vona.
23Nhlengeletano hinkwayo yi endla makungu ku va ni nkhuvo wa masiku man'wana ya ntlhanu na mambirhi, kutani va endla nkhuvo hi masiku lawa ya ntlhanu na mambirhi hi ku tsaka. 24Hikuva Hezekiya, hosi ya Yuda, a a nyikile nhlengeletano tinkunzi ta 1 000, ni tinyimpfu ta 7 000; kambe tihosana a ti nyikile nhlengeletano tinkunzi ta 1 000 ni tinyimpfu ta 10 000, kutani vaprista lavo tala a va tihlawurile. 25Nhlengeletano hinkwayo ya Yuda, ni vaprista ni Valevhi, ni nhlengeletano hinkwayo ya lava humeke etikweni ra Israele, ni valuveri lava humeke etikweni ra Israele, ni lava akeke etikweni ra Yuda, va tinyiketa ku tsaka. 26Ku va ku tsaka lokukulu Yerusalema, hikuva ku suka ka masiku ya Solomoni, n'wana Davhida, hosi ya Israele, a ku vanga na mhaka leyo tano Yerusalema. 27Kavaloko vaprista va Valevhi va pfuka va katekisa tiko; kutani rito ra vona ri yingisiwa hi Yehovha, xikhongelo xa vona xi fikela evuakweni bya ku kwetsima ka yena etilweni.
Currently Selected:
2 TIKRONIKA 30: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.