Acts 4
4
Peter John bulh nahíyilhne but nébonilhti
1ꞋEt ꞌawhuz Peter John bulh dune bulh yahulhduk whe lubretne, lugliz whucho howunlíne bumoodih cha, ꞌinkꞌez Sadducee#4:1 Sadduceene, ꞌenne la ꞌuhutni, “Datsꞌúzsai ꞌinkꞌez ꞌaw natsꞌuhótnalh ꞌaítꞌoh.” hubuhútnine bugho nindil. 2Whutsꞌodutni ndunne whelꞌaꞌne Jesus dazsai ꞌinkꞌez dunadija ꞌet huwun whubuhodulhꞌeh. ꞋEt whe yaidláne dunahudutádulh ꞌalha ꞌuhoontꞌoh. 3ꞋInka ꞌom bun whutsꞌun ꞌabuhanꞌai ꞌawet hulhgha tsꞌun yoo ꞌun hoozulh ꞌet huwa. 4ꞋEt hoontsꞌi lhane ubudántsꞌone Jesus dazsai ꞌinkꞌez dunadija-un buba ꞌalha ꞌuhoontꞌoh suliꞌ. ꞋEt ꞌawet ꞌalhgoh buba ꞌálhaꞌ hoontꞌohne 5,000ne atꞌenne huzdliꞌ.
5ꞋEt ꞌawet ꞌom bun dzin Lizwif bumoodihne, butso whúdilhdzulhne cha, ꞌinkꞌez Moses be ꞌudustlꞌus ꞌukꞌu nunáguzne Jerusalem ꞌet ꞌilhúhozdil. 6ꞋInkꞌez la lubret ꞌukꞌenus díztiꞌ-un Annas huyúlhni-un Caiaphas cha, John cha, Alexander cha, ꞌinkꞌez la lubret ꞌukꞌenus díztiꞌ-un tsꞌu haíndene, ꞌenne cha, tsꞌiyawh Jerusalem ꞌilhuhozdil. 7Whelꞌaꞌne ꞌinkꞌez soo naꞌhuyinla-un, ꞌen cha dubut nébodinla ꞌinkꞌez hubuhoodulhkut “Dáhla whe ꞌahla? Ndai be úlhtus-i be uhtꞌi? Mbe booziꞌ gha ndun dune soo naꞌuhla?”
8Ndoni Peter ꞌon nus ulhtus yulhtsi whe ubúlhni, “Israel ooduneꞌne bumoodihne ꞌinkꞌez butso whúdilhdzulhne cha, 9ndun dune nulhúsyoh-un, ꞌen ba ꞌutꞌen unzoo-i ꞌutsꞌínla-i ꞌinkꞌez datsꞌínla whe soo náꞌtsꞌinla whe ꞌi ꞌandit ooka neoodulhkut. 10ꞋEt huwa nohni ꞌinkꞌez Israel ootsꞌu hainzutne soo cho tꞌeoonahzeh, Jesus Nazareth whutꞌen-un, ꞌen tulalhgus kꞌeílhti, ꞌen Yakꞌusda nahuyílhnaꞌ. ꞋEn booziꞌ ꞌinkꞌez whélhtus-un ꞌi be ndun nulhúsyoh-un, ꞌen soo náꞌtsꞌinla. 11Jesus, ꞌen ꞌuntꞌoh Yakꞌusda ꞌukꞌu nusguz-i kꞌut ndutni whe ooghu yaduk,
‘Nohni yoh ꞌuwhulhꞌenne tse ꞌúndutulhꞌuz-i,
ꞌi la ꞌuja ꞌukꞌenus tse#4:11 Ndi tse ꞌundutulhꞌuz-i Jesus Christ ꞌuntꞌoh, ni whe ꞌutni. ooka dáhotni-i suliꞌ.’
12Yinka ndulcho whe Jesus Christ ꞌen gha za ꞌuzdutijih. ꞋAw ꞌuyoonne yé ulhtus-i gha uzdoojih ꞌaítꞌoh. ꞋEt whuz unꞌa Yakꞌusda neghá whuninꞌai.”
13ꞋEt nahíyilhne tꞌehonínzun Peter ꞌinkꞌez John ꞌenne ꞌantsꞌi ꞌoh dune, ꞌaw whulhodílꞌelne ꞌuhintꞌoh. ꞋAw lhoníljut whe yahulhduk, ꞌet huwa buba hooncha, ꞌinkꞌez tꞌehonanzin Jesus Christ yulh nusudilne hinli. 14Ndun nulhúsyoh-un soo náꞌuja ꞌinkꞌez Peter John bulh buzih usyin hinilhꞌen whe ꞌet huwa ꞌaw dája hudooniꞌ ꞌaitꞌoh. 15ꞋEt ꞌinka yaduk bayoh tenábonilhꞌaꞌ ꞌinkꞌez la hukwꞌu nuhúhulhyeꞌ. 16ꞋInkꞌez la lhuhoodulkut, “Ndunne dune dábuztilelh?” hutni la, “Jerusalem whutꞌenne tsꞌiyawh tꞌehonínzun ꞌukꞌenus huwa ꞌítꞌen-un, ꞌet ꞌuhuhóonla. ꞋAw whutsꞌutsꞌoodódlai ꞌaitꞌoh. 17ꞋEt huwa ꞌaw ꞌon ꞌun ꞌuyoonne tꞌeoonoozeh whuchꞌa, ndunne dune tube cho bubeꞌ tsꞌoonolhjoot Jesus Christ booziꞌ gha ꞌaw ꞌon ꞌun ꞌuyoonne dune bulh yáhoolhduk junih.”
18ꞋEt yoh danáboninla ꞌinkꞌez ꞌubuhútni, “Ntsꞌoh dáhoontꞌoh ꞌet hoontsꞌi, ꞌaw Jesus booziꞌ gha yahoolhduk kꞌus dune húhodoolhꞌeh íloh!” 19ꞋEt Peter John bulh ꞌuhútni. “Nohnichꞌoh hukwꞌu nuní nulhzut, nohkꞌunꞌa tilah kꞌus Yakꞌusda ookꞌunꞌa tilah ꞌuztinelh? Ndet la Yakꞌusda nalh tsꞌihꞌun ꞌuhoontꞌoh? 20Ntsꞌenꞌa suba tsꞌuhonꞌen-un ꞌinkꞌez tsꞌodántsꞌo-un huwu yalhtsꞌoolhduk?”
21Nahíyilhne ꞌo ꞌun cha bube hoonolhjoot, “Jesus ghu yahoolhduk junih!” ꞌubuhútni, ꞌinkꞌez bula nahuditni. ꞋAw huwa dzoh nubuhoolhdzut-un hooloh, dune tsꞌiyanne Yakꞌusda ba hodílhtiꞌ njan dáhooja ꞌet huwa. 22Ndun dune huwa ꞌítꞌen kꞌunꞌa soo náꞌhuyinla-un, ꞌen dit whunizyat ꞌon ꞌun be yus kꞌut whe ꞌuntꞌoh.
Oobá ꞌalha ꞌuhoontꞌohne hunooljut-un whuchꞌa ténahadudli
23ꞋEt soo bula nahuditni ibulh, Peter John bulh bubulh nudilhne butsꞌu náhoostꞌaz ꞌinkꞌez lubret ꞌukꞌenus diztiꞌ-un ꞌinkꞌez butsó whudilhdzulhne cha dája ꞌubuhútni la ꞌet hukwꞌú nuhuhoolnuk. 24ꞋEt hodántsꞌo whe tsꞌiyawh lhgha Yakꞌusda tsꞌun tenawhehúndunidli, “NeMoodihti nyun Yakꞌusda ꞌintꞌoh tꞌétsꞌonínzun, yat, ndi yun, yatooꞌ, ꞌinkꞌez bunghun cha ꞌínla, ꞌinkꞌez di la bulh ꞌúhoonla-i tubulh. 25Netsodaꞌ-un David nye ꞌustle-un, Ndoni gha mba yalhduk ínleꞌ whe ndutni,
‘ꞋUdun yun kꞌut whutꞌenne,
di ha hohunílchꞌe? Di ha ndunne dune Yakꞌusda chꞌaz yáhalhduk?
26Ndi yun kꞌut lerwene,
ꞌenne cha lhotigan wheni.
ꞋInkꞌez yun moodihne cha ꞌilhúhozdil Yakꞌusda ꞌinkꞌez ooChrist,
ꞌenne hichꞌaz nedindil wheꞌ hutꞌen.’”
27ꞋEt ꞌon ꞌun tenahududli whe ꞌuhutni, “ꞋEt njan Jerusalem ꞌet Herod ꞌinkꞌez Pontius Pilate bulh ꞌudun yun kꞌut whutꞌenne cha ꞌet Israel ootsꞌu hainzutne cha tsꞌiyawh ꞌilhuhozdil whe ꞌalhaꞌ ꞌi be nYeꞌ Jesus lubeshi ooghu hooloh-un, ꞌen ooka tse hóodli neba yulhtsí-un, ꞌen hichꞌaz nedindil ꞌet wheni. 28ꞋEt ꞌudaꞌ be ilhtus-i ꞌinkꞌez nyeni be ndunínzun inleꞌ whe lhawhudinla. ꞋEt ꞌandit ꞌilhuhozdil ꞌinkꞌez daóotanelh dini ínleꞌ ꞌet ꞌoh whuya lheꞌhitꞌelh. 29ꞋEt huwa neMoodihti, neyeꞌ hoonulhjoot-un, ꞌandit dzin buboozílhtsꞌai ꞌinkꞌez ꞌaw lhtsꞌuníljut whe wheni, mbaꞌ tsꞌutꞌenne, nghuni unzoo-i be yatsꞌoolhduk neghá whuninꞌaih. 30ꞋEt huwa neMoodihti, be ílhtus ꞌi be dune ílhyis ꞌinkꞌez nYeꞌ Jesus, lubeshi ooghu hooloh-un, ꞌen yé ulhtus-i, ꞌi gha tsꞌiyanne bunalhtsꞌet hooncha ꞌinkꞌez huwa ꞌítꞌen tuneꞌ whutꞌen hóleꞌ.”
31ꞋEt ꞌawet tenáhúdúdli ꞌetsul ꞌuhudíja whe, nyo ꞌilhúhozdíl-un ndulcho nahúhoosnai ꞌinkꞌez Ndoni buyudíltsꞌut whe ꞌaw lhoníljut whe Yakꞌusda ooghuni be bubulh yáwhehunilhduk.
Ooba ꞌalha ꞌuhoontꞌohne ꞌalhgoh lhghuhudli
32Ooba ꞌalha ꞌuhoontꞌohne ꞌalhgoh tsꞌiyanne lhgha zaꞌ hutꞌen. ꞋAw oochꞌeꞌne hooloh. Ndai la huyutꞌi ꞌalhgoh huyé neꞌutꞌen. 33ꞋAw lhoníljut whe whelꞌaꞌne soo khuni ulhtus-i be, “ꞋAlhaꞌ hoontꞌoh whe Jesus neMoodihti ꞌen dunadija,” hutni, ꞌinkꞌez Yakꞌusda tube butsꞌun únzoo. 34ꞋAw ꞌilhoghun butoh ꞌendunidzit-un hooloh. Mbene la yoh kꞌus yun lhadíntꞌoh utꞌíne, wheꞌ honket, 35ꞌinkꞌez la sooniya bugha yúltsꞌuk-i, whelꞌaꞌne butlꞌa háyudzih. ꞋI la ꞌalhgoh mbene la ꞌen dunidzítne butá háyúdzih.
36ꞋInkꞌez ꞌilhoghun dune, Joses huyúlhni, ꞌen Levite-un#4:36 Levite ꞌenne lubret ꞌukꞌenus diztiꞌ-un laꞌ ꞌutꞌenne ꞌuhintꞌoh. ꞌuntꞌoh ꞌet Cyprus whuzdlí-un, ꞌen whelꞌaꞌne “Barnabas” huyúlhni, ndi booziꞌ ꞌi la, “ꞋEn nedzi ulhtus ilhꞌí-un,” ni whe ꞌutni. 37ꞋEn yun yutꞌi-i be ꞌónket ꞌinkꞌez whelꞌaꞌne butlꞌa yándzai.
Currently Selected:
Acts 4: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.