Acts 2
2
Ndoni ooba ꞌálhaꞌ hoontꞌohne, buyudíltsꞌut
1ꞋEt Lizwif budzenis whuti, Pentecost#2:1 Njan dzin dakelh kꞌunꞌa Ndoni dzin huwhútni. ꞋOh daꞌ Lizwifne budzenis whuti ꞌi haꞌ nukat-un huwhútni. huwhútni-un, whusahóoltsꞌut whe tsꞌiyanne Jesus ooba ꞌalha ꞌuhoontꞌohne ꞌilhoghun yoh hudilhtsꞌi. 2Khuntsul ndo yatꞌah tsꞌe ꞌuhuduztsꞌai ꞌantsꞌi nilhtsꞌi cho diltsꞌulh leꞌ whutni. ꞋInkꞌez nyo yoh hudilhtsꞌí-un ndulcho whudutni. 3ꞋInkꞌez la ꞌantsꞌi kwun ndultꞌoh-i hitilhꞌen ꞌinkꞌez lhawh tizkat whe yoh dilhtsꞌíne ꞌilhoghun hinli whe bukꞌé dinkat. 4ꞋEt dilhtsꞌíne tsꞌiyawh Ndoni buyudíltsꞌut ꞌinkꞌez khuni whutsodaꞌ tꞌehinúszun-i be yawhehúnilhduk, ꞌet Ndoni bugha óoninꞌai ndo dooniꞌ ha.
5ꞋEt ꞌawet lhane Lizwifne, Yakꞌusda yunidúlhne hinli Jerusalem húdilhtsꞌi lheldoh keyoh tsꞌe ha hándilne. 6ꞋEt keyoh whutꞌenne ꞌantsꞌi whudutni ꞌet huwhudántsꞌo ha, ꞌilhuhozdil lhelhtsꞌun keyoh whutꞌenne bughuni be bubulh yáwhehunilhduk tube whe bughá ꞌunjaz. 7-8Buba hooncha ꞌinkꞌez ꞌuhudutni, “Ntsꞌenꞌa ꞌuwhutátꞌelh? Ndunne Galilee whutꞌenne lheꞌhutni nekꞌuyáhulhduk wheni nekꞌunꞌa ubuzditsꞌo,” hutni. 9“Wheni Parthia, Media, ꞌinkꞌez Elam whutꞌenne tsinli. Mesopotamia whutsꞌun, Judea ꞌinkꞌez Cappadocia whutꞌenne cha tsinli. Pontus whutsꞌun, ꞌinkꞌez Asia tsꞌu haíndilne cha tsinli. 10Phrygia whutsꞌun, ꞌinkꞌez Pamphylia whutꞌenne cha tsinli. ꞋEt Egypt whutsꞌun, ꞌinkꞌez Lybia whunat Cyrene whuzih whutꞌenne cha, whulohne cha Rome tsꞌe ha tsꞌándil. 11ꞋAlhgoh Lizwifne ꞌinkꞌez ꞌudun yun kꞌut whutꞌenne, mbe la Lizwif tsꞌu nálhyane, netoh whulohne cha Crete ꞌinkꞌez Arabia tsꞌu haíndilne tsinli. ꞋEt hoontsꞌi dáhoolcho ꞌi be Yakꞌusda neꞌústꞌen-un, ꞌet ndúhoolcho whe whenichꞌoh neghuni kꞌunꞌa, whuz unꞌa ubuzditsꞌo,” hutni. 12Bughá neꞌusjaz ꞌinkꞌez ꞌuhootꞌeꞌ tsꞌe hooloh whe tsꞌiyawh lhuhoodulkut, “Dawhútanelh whe suba ꞌuwhutni?” lhodutni.
13ꞋEt ꞌuyoonne, ꞌenne la Jesus ooba ꞌalhaꞌ ꞌuntꞌohne ghu hidloh, “Ndunne dune yatahinátnaiꞌ,” wheꞌ hutni hubuhútni.
Peter Lizwifne bubulh yálhduk
14ꞋEt Peter whelꞌaꞌne butoh dudinya ꞌinkꞌez ꞌilhozdilne bubulh whe nduniltul, “Judea dunene ꞌinkꞌez nohni Jerusalem whutꞌenne cha tsꞌiyawh soo zúlhtsꞌai, ꞌet la nohdósniꞌ dáhooja njan ꞌet huwun. 15Ndunne dune ꞌaw talhahunítnaiꞌ nohni ndunáhzun hoontsꞌi, tsꞌantꞌez ꞌandit tsꞌiya dzetniz whutso 9:00 ꞌuhoontꞌoh. 16ꞋEt hoontsꞌi njan dawhútꞌen-un, ꞌet la Yakꞌusda be nus hónꞌen-un, Joel, huwu yailhduk whe ndutni,
17‘ꞋUdekꞌez dzin whusahónzut de, ni Yakꞌusda,
ꞌet de syughi si sgha ꞌen tsꞌiyanne dune yududútiltsꞌulh.
Nohuzkehke nus daóotanelh-un ꞌet huwu yahutilhduk.
Nohchilke cha bube nghun newhúltsꞌuk-un tꞌehontázin.
Nohduneti ꞌenne cha nótitus whe tꞌehóntizeh.
18ꞋInkꞌez ꞌoh de sba ꞌutꞌenne,
ꞌenne hoontsꞌi dune cha tsꞌekoo cha tsꞌiyawh syughi si sgha ꞌenne buye ídutiltsꞌulh ꞌet huwa ꞌenne cha nus daóotanelh-un huwu yahutilhduk.
19Ndo yat ꞌet cha ꞌinkꞌez ndi yun kꞌut cha huwa ꞌítꞌen te néꞌwhutisꞌen.
ꞋEt ꞌuskaiꞌ cha, kwun cha,
ꞌinkꞌez lhut lhai cha whutáleh.
20Sa cha tsálhgus yudútiltsꞌulh
ꞌinkꞌez ꞌulhdzis oozaꞌ cha ꞌuskaiꞌ kꞌunꞌa dulkꞌun tileh,
ndet la whéwhunujut ꞌinkꞌez whudíztiꞌ dzin neMoodihti whusatíyalh ꞌet whutso ꞌuwhutánelh.
21ꞋEt ndet la whusahónzut-un,
ꞌet whusaóotiltsꞌulh mbene la neMoodihti hudutijih hitsꞌu hukwa ꞌutnine, ꞌenne hudutijih.’”
22Peter ꞌet cha ndutni, “Israel ootsꞌu hainzutne sghuni soo cho oozúlhtsꞌai, Jesus Nazareth whutꞌen-un, Yakꞌusda nohtsꞌítilhꞌaꞌ-un, ꞌen Yakꞌusda gha huwa ꞌítꞌen teneꞌútꞌen, ꞌet whe whunóhnilhtun njan nohtoh ꞌuhootꞌen ꞌet huwa tꞌewhunáhzun. 23Yakꞌusda nanínízut ꞌinkꞌez ꞌudaꞌ tꞌeooninzun-un, ꞌi be ꞌudaꞌ Jesus nohtlꞌa tíltelh néwhuninꞌai. Nohni nohgha lubeshi ꞌulhꞌenne Jesus tulalhgus ꞌuhídunilhtꞌo ꞌet whe súlhghi. 24ꞋEn Yakꞌusda nahuyílhnaꞌ. Be datsꞌútsaih-i yuchꞌa nilde, ꞌaw ꞌilhiz daootsah huba lheꞌhóotꞌoh ꞌet huwa. 25ꞋEt ꞌudaꞌ David yughu yailhduk ínleꞌ whe ndutni,
‘ꞋAhoolhyiz neMoodihti szih nusꞌen.
Nailhni tsꞌunkꞌus szih usyin dzoh noszut whuchꞌa.
26ꞋEt huwa ꞌahoolhyiz sdzi hóontꞌiꞌ,
ꞌinkꞌez whuníni bulh cha yasduk,
ꞌinkꞌez si ꞌatsul yinka susda.
Datíssah de ꞌaw whénoozjut ꞌaítꞌoh.
27ꞋEt whe natnilh keyoh si szul ꞌaw ꞌet neóolhtelh ꞌaítꞌoh
ꞌinkꞌez Ndun tsꞌihꞌun ꞌúntꞌoh-un ꞌaw ooyustꞌe oolhjut ꞌaítꞌoh.
28ꞋIlhiz khutisnalh-un, ꞌet whusúnilhtan.
Sulh ꞌíntꞌoh ꞌet huwa hoonústꞌiꞌ sutalhtselh.’”
29Peter ꞌon ꞌun cha ndutni, “Sulh dunene ꞌinkꞌez sulh ꞌuntꞌohne David netsodaꞌ-un keyoh whuduchun unlí-un, ꞌen ghun tsꞌihꞌun unꞌa whunóhnoostun hukwaꞌ nuszun. David dazsai ꞌinkꞌez ꞌuháyálhti ꞌinkꞌez ootsꞌun kꞌut ꞌawhuz nezih whuzꞌai. 30ꞋEn Yakꞌusda be nus hóoꞌen-un ꞌuntꞌoh ꞌinkꞌez Yakꞌusda ye yútsꞌu nahizya tꞌeinínzun. ꞋInkꞌez Yakꞌusda yuba néwhuninꞌai whe yúlhni, ‘David ootsꞌu haínzut-un, ꞌen ꞌilhudzin David kꞌunꞌa ookwꞌutsꞌuzda cho diztiꞌ-i kꞌutidalh,’ ꞌen Christ ꞌuntꞌoh. 31David nus hónꞌen whe Christ dunádutádalh ꞌet huwu yailhduk whe ndutni,
‘Yaidlane toh ꞌaw néyolhtelh ꞌaítꞌoh,
ooyustꞌe cha ꞌaw oolhjut ꞌaítꞌoh.’
32ꞋEt ndun Jesus ꞌen dazsai whe Yakꞌusda nahuyílhnaꞌ inleꞌ ꞌinkꞌez wheni oogha hodulꞌehne tsꞌiyawh khuna whe tsꞌanꞌen ꞌet huwa. ꞋAlhaꞌ nahítnaꞌ tꞌetsꞌonínzun. 33Ndo yakꞌuz ꞌukꞌenus whudíztiꞌ-un, ꞌet Yakꞌusda oonailhni tsꞌe natlꞌa idalhdaꞌ ꞌinkꞌez netsꞌú yoozi-i, ꞌi gha Yakꞌusda duYeꞌ yutlꞌa hónꞌai. ꞋInka ꞌen Ndoni netsꞌítilhꞌaꞌ ꞌinkꞌez neyudíltsꞌut. ꞋInkꞌez ꞌalhaꞌ ꞌuntꞌoh ꞌandit dzin ndi ꞌi oozúlhtsꞌai ꞌinkꞌez nulhꞌen. 34ꞋAw David yakꞌuz nulhiyal, ꞌet hoontsꞌi njan ndutni,
‘Moodihti ꞌen sMoodihti ꞌet ndúyulhni,
“Njan nailhni tsꞌe sghu sinda,
35Ndet la nchꞌaz ditnine buchꞌaꞌ nus de hukwꞌélhꞌaz ꞌet la ꞌilhiz bumoodih ꞌonleꞌ.”’
36ꞋEt huwa Israel ootsꞌu hainzutne tsꞌiyawh tꞌehonozin, ꞌalhaꞌ ndun Jesus tulalhgus undunulhtꞌó-un, ꞌen Yakꞌusda Moodihti ꞌinkꞌez Christ yulhtsi.”
37ꞋEt Peter hidántsꞌo whe soo tsꞌihꞌun budzi tꞌaíznai. ꞋInkꞌez Peter ꞌinkꞌez ꞌuyoonne whelꞌaꞌne bulh hubuhoodulhkut, “Neulhutsinke, Peter nedaniꞌ-un huwun dáztinelh?”
38ꞋEt Peter ꞌubulhni, “ꞋIlhone ꞌahli whe lhtꞌananahdilh ꞌinkꞌez Jesus Christ booziꞌ gha too be ꞌúlhneh. ꞋEt nohlubeshi nohunaoodeh ꞌinkꞌez la Ndoni nohyudóoltsꞌit. 39Mbene la Yakꞌusda neMoodihti bukaꞌ dutinelhne, ꞌilhone ꞌahli whe Ndoni nohtsꞌú yoozi inleꞌ, nohuzkeh cha ꞌinkꞌez nilhzaꞌ yun kꞌut whutꞌenne, ꞌenne hoontsꞌi.”
40ꞋEt Peter saꞌ whe bubulh yálhduk ꞌinkꞌez buba nus whúnilhtꞌi ꞌinkꞌez ubúlhni, “ꞋUdudúlhyis! Ndunne ntsiꞌne buchꞌaz nálhꞌah, ꞌinkꞌez bubulh ꞌahtꞌen iloh, Yakꞌusda dzoh nubutilhdeh wheꞌ hoontꞌoh.” 41Lhane huhóontꞌiꞌ whe highuni huyílhchoot ꞌinkꞌez too beꞌ hulya. 3,000ne atꞌenne, ꞌenne butsꞌúnne hudindil.
42ꞋAhoolhyiz ꞌilhuhodulh, ꞌinkꞌez whelꞌaꞌne whubuhodulhꞌeh. Tsꞌiyawh ꞌalhgoh lhulh ꞌuhutꞌen. ꞋInkꞌez ꞌudekꞌelhaz hulhgha naꞌhitꞌal-un whe whunahulnih ha lhlaꞌ hutꞌalh ꞌinkꞌez ꞌalhgoh tenahududli.
Ntsꞌenꞌa la ooba ꞌalha ꞌuhoontꞌohne yinka hudilhtsꞌi
43ꞋEt whelꞌaꞌne huwa ꞌítꞌen te neꞌhustꞌen ꞌinkꞌez tsꞌiyanne nujut buyudankut. 44Ooba ꞌalha ꞌuhoontꞌohne tsꞌiyawh ꞌilhoh nuhúdilh ꞌinkꞌez huyutꞌí-i tsꞌiyawh huyé lhla ꞌutꞌen. 45ꞋIlhoghun yutꞌi-i be ꞌóokuk te ꞌi la tsꞌiyanne mbene la ꞌen dunidzítne, ꞌenne sooniya butahuyudzih. 46Lizwif bulugliz whucho ꞌet dzin totsuk ꞌilhuhodulh. Duyoh ꞌet ꞌalhgoh budzi únzoo ꞌinkꞌez huhóontꞌiꞌ whe lhla naꞌhutꞌulh. 47ꞋEt mbene la ooba ꞌalha ꞌuhoontꞌohne Yakꞌusda ba hodílhtiꞌ, ꞌinkꞌez Jerusalem whutꞌenne, ꞌenne cha butsꞌun hínzoo. Mbene la dijízne, ꞌenne neMoodihti dzin totsuk ꞌon nus ꞌuhuniltsuk bubulh tsíh.
Currently Selected:
Acts 2: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.