Iutita 15
15
O le Manumālō o Isaraelu
1‘Ua fa‘alogo le ‘au ‘atoa a Asuria ‘ua vavae‘eseina le ulu o Holofene, ‘ua lē toe maumanatu i latou, ‘ua lē aumaua se tonu, ‘ua ‘ana‘ana tasi i le mata‘u ma le tetemū, ‘ua latou fa‘amoemoe tasi i le sola‘aga. 2‘Ua lē tautala fo‘i le tasi tagata ma lē ‘ua la te tuā‘oi, a ‘ua punonou o latou ulu, ‘ua tu‘ulafoa‘i a latou mea uma ma ‘ua latou taufetuli i le fia ‘alo‘ese i tagata Eperu sa latou fa‘alogo i ai o oso mai ‘iā te i latou ma o latou ‘au‘upega; na sōsōla i latou i auala o le fanua laulelei ma ala o mea maupu‘epu‘e. 3A ‘ua iloa e le fānauga a Isaraelu le sola‘aga, ‘ua latou mulimuli atu i ai, ‘ua latou ō ifo, o ili a latou pū ma ‘alalaga ma tuliloa ‘iā te i latou. 4‘Ua sōsōla ma le televave o tagata Asuria ma le lē potopoto lava, a o le fānauga a Isaraelu sa pei o se ‘au e tasi o tuliloa ‘iā te i latou, o lea na latou fasia ai o i latou uma na mafai ‘ona latou maua.
5‘Ua ‘auina atu fo‘i e Usia ana savali i ‘a‘ai uma ma nu‘u uma o Isaraelu; 6a o nu‘u ta‘itasi ma ‘a‘ai ta‘itasi ‘ua latou ‘auina atu o taulele‘a filifilia ma le ‘au‘upega e mulimuli atu ‘iā te i latou; ma ‘ua latou tuliloa ‘iā te i latou i le pelu se‘ia o‘o atu lava i tuā‘oi o lo latou lau‘ele‘ele. 7A o ē sa totoe i Paitulia ‘ua latou ulu atu i le togālauapi o Asuria, ma ‘ua ‘ave ma latou o le ‘oloa na tu‘ulafoa‘iina e tagata Asuria i lo latou sola‘aga ma ‘ua matuā mamafa a latou avega. 8A o i latou na toe fo‘i i Paitulia ma le manumālō, ‘ua ‘aumai ma i latou a latou mea uma, ‘ua lē mafaitaulia ai o lafu manu ma solofanua, ‘atoa ma a latou meafale, ‘ua mau‘oloa uma ai lava o tagatanu‘u ‘atoa ma ali‘i ‘iā latou mea na vetea.
‘Ua Fa‘amamaluina e Isaraelu le Manumālō
9A o Ioakimo le ositaulaga sili, na malaga lava ia mai Ierusalema i Paitulia, fa‘atasi mōna toeaina uma, i lona fia va‘ava‘ai atu ‘iā Iutita. 10‘Ua alu o Iutita e fa‘afetaia‘i ‘iā te ia, ‘ona latou fa‘amanū atu uma lea ‘iā te ia ma le leo gatasitasi, o fa‘apea atu: “O oe o le mamalu o Ierusalema, o oe o le fiafia o Isaraelu, o oe o le vi‘iga o lo tatou nu‘u, 11auā na e fa‘amalosi, ma ‘ua fa‘amausalīina o lou loto ‘ona ‘ua e naunau i le loto mamā ma ‘ua e lē toe fia nofo i se tasi ‘ina ‘ua oti o lau tane. O le mea lea na fa‘amalosi ai oe i le ‘a‘ao o le Ali‘i, o le mea fo‘i lea e vi‘ia ai oe i le fa‘avavau.” 12Ma ‘ua fai ane e le nu‘u uma: “Amene! Amene!”
13A ‘ua ‘atoa aso e tolusefulu o fa‘aputuputu pea e le nu‘u o Isaraelu o mea vetea a tagata Asuria. 14I le o mea uma na iloatino ai o mea tonu a Holofene, ‘ua tu‘uina atu ia ‘iā Iutita, o le auro ma le ario, o ‘ofu ma ma‘a tāua ma meafale uma, ‘ua tu‘uina atu uma ‘iā te ia e le nu‘u. 15Ma ‘ua fai le fiafia o le nu‘u uma, o fafine ma teine ma taulele‘a, i ni fa‘aili ma ni kitara.#Eso 15.20; Fa‘ama 11.34; 1 Samu 18.6; Iere 31.4, 13
Currently Selected:
Iutita 15: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.