Iutita 11
11
O le Fiafia o Holofene ‘iā Iutita
1‘Ona fai atu lea o Holofene ‘iā te ia: “‘Ia e fimalie lava oe, ‘aua fo‘i le mata‘u lou loto, auā ‘ou te le‘i fa‘aleaga atu lava i se to‘atasi o ē na loto e ‘au‘auna atu i le tupu o Nepukanesa. 2‘Ana lē tauemu fo‘i o lou nu‘u ‘iā te a‘u, po ‘ua lē si‘i a‘e lava lo‘u tao ‘iā te i latou. 3O lenei, ‘inā e ta‘u mai ia ‘iā te a‘u po o le a le mea na e te‘a ‘ese ai ‘iā i latou ma ‘ua e loto ai e sau ‘iā te i matou?”
4Ma ‘ua faimai o Iutita ‘iā te ia: “‘Ia e talileleia ‘upu a lau ‘au‘auna, auā ‘āfai ‘e te ‘ana‘ana i ‘upu a lau ‘au‘auna, ‘ona fai lea ‘iā te oe e le Atua le mea e sili ‘ona lelei. 5Auā o lo‘o soifua Nepukanesa, le tupu o le lalolagi, o lo‘o ola fo‘i ma lona malosi ‘ua ‘iā te oe e fa‘asala a‘i i agaga uma ‘ua fesēa‘i; e le gata lava i tagata ‘ua latou ‘au‘auna atu ‘iā te ia ‘ona o oe, ‘ae o‘o lava i manu o le vao ‘ua latou ‘ana‘ana ‘iā te oe.#Iere 27.6; Paru 3.16-17; Tani 2.38
6“Auā ‘ua tala‘iina i nu‘u uma le poto o lou mafaufau, ma ‘ua lauiloa e tagata uma ‘ua na o oe lava e lelei ma le malosi i lona mālō ‘atoa ma ‘ua vi‘ia lau tausiga i itūmālō uma lava. 7E lē lilo fo‘i ‘upu a Akiora, e lauiloa fo‘i le mea na poloa‘iina e fa‘ao‘o atu ‘iā te ia; 8auā ‘ua mautinoa le matuā to‘asā o lo matou Atua, ‘ua fa‘ailoa atu ai i le nu‘u i ‘upu a ana perofeta o le a tu‘uina mai i latou ‘iā te oe ‘ona o a latou agasala. 9‘Ua iloa fo‘i e le fānauga a Isaraelu ‘ua latou agasala i lo latou Atua, o lea ‘ua latou tetemū i le mata‘u ‘iā te oe. 10‘Ae maise fo‘i ‘ua tigāina i latou i le oge; ma ‘ua tusa ‘ona faitauina i latou i ē ‘ua oti ‘ona ‘ua naumati le ‘a‘ai. 11Mulimuli ane, ‘ua latou poloa‘iina ‘ia fasia o a latou manu ‘ina ‘ia latou inu ai i lo latou toto. 12O mea fo‘i na fa‘asā mo le Ali‘i lo latou Atua, na poloa‘i ai le Atua ‘ia ‘aua le tagofia, e i ai o saito, ma le uaina ma le suāu‘u, ‘ua latou manatu e fa‘aaogā mea ia ma ‘ua latou loto e ‘a‘ai i mea sa lē tatau ‘ona se‘i tago i ai lo latou lima. O le mea lea ‘ua mautinoa ai e tu‘uina mai i latou ‘ina ‘ia latou fano ‘ona o mea ia ‘ua latou faia.#Teu 14.22 13‘Ua ‘ou iloa mea ia, o a‘u o lau ‘au‘auna, ‘ona ‘ou sola ‘ese lea ‘iā te i latou ma ‘ua ‘auina mai a‘u e le Ali‘i e tala‘i atu mea ia ‘iā te oe.
14“Auā o a‘u, o lau ‘au‘auna, ‘ua ‘ou gaua‘i i le Atua, e o‘o lava i aso nei a ‘ou i ai i lou ‘āiga; e alu i fafo lau ‘au‘auna ma ‘ou tatalo ai i le Atua. 15‘Ona ia fa‘aali mai lea ‘iā te a‘u le aso e taui atu ai e ia i la latou agasala; ‘ona ‘ou sau lea ma ta‘u mai ‘iā te oe, ‘ina ‘ia ‘ou ta‘ita‘iina lava oe i totonu o le ‘a‘ai o Ierusalema, ‘ona e maua ai lea o le nu‘u ‘ato‘atoa o Isaraelu e pei o ni mamoe ‘ua leai so latou leoleo mamoe; e lē maua e o‘o lava i se maile e tasi na te ou ‘iā te oe; 16auā o le silafaga a le Atua ‘ua fa‘aalia mai ai mea nei ‘iā te a‘u. 17‘Ona ‘ua to‘asā fo‘i le Atua ‘iā te i latou, o lea ‘ua ‘auina mai ai a‘u e tala‘i atu mea lava ia ‘iā te oe.”
18‘Ua lelei fo‘i ‘upu uma ia i le manatu o Holofene ma le manatu o ana ‘au‘auna; ma ‘ua ofo i latou i lona poto ma ‘ua latou fetautalatala‘i, o fa‘apea ane:
19“E leai se tasi fafine i le lalolagi la te tutusa ma lenei i le tino lelei ma le ‘aulelei ma le fai ‘upu mafaufau.” 20Ma ‘ua fai atu o Holofene ‘iā te ia: “‘Ua mālie le mea na faia e le Atua, ‘ua na ‘auina mai oe i luma mai o lenei nu‘u ‘ina ‘ia tu‘uina mai i latou i o matou lima. 21‘Ua mālie fo‘i o lau folafolaga; o lea, a faia e lou Atua lenei mea ‘iā te a‘u, e ‘avea fo‘i o ia ma lo‘u Atua; ‘ae mamalu ai lava oe i le maota o Nepukanesa, e ta‘ua fo‘i lou igoa i le lalolagi uma.”
Currently Selected:
Iutita 11: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.