Amosa 4
4
O le A‘oa‘iga ‘iā Isaraelu
1‘Ia ‘outou fa‘alogologo i lenei ‘upu o ‘outou povi fafine o Vasana, o lo‘o i le mauga o Samaria, o ē fa‘asauā i ē vaivai ma fa‘asaunoa i ē matitiva, o ē fa‘apea atu i o latou matai, “‘Aumai ia, matou te feinu ai.” 2‘Ua tautō le Ali‘i le ATUA i lona pa‘ia, fa‘auta, e o‘o mai aso ‘iā te ‘outou na te ‘ave‘eseina ai ‘outou i mātau ma la ‘outou fānau i mātau i‘a.#2 Tu 19.28; Sala 89.35; Iere 16.16 3Tou te ō atu fo‘i i mea ‘ua lepetia, ta‘itasi i le mea ‘ua ia lumana‘i ai, e lafoa‘iina ‘outou a‘i le maota, o lo‘o fetalai mai ai le ALI‘I.
O le lē Usita‘i o Isaraelu
4‘Ia ‘outou ō mai i Peteli ma fai ai amio leaga; ‘inā fa‘atele ia agasala i Kilikala; ‘ia ‘outou avatu i taeao a ‘outou taulaga ma mea e sefulua‘i a ‘outou mea i lona tolu o tausaga.#Nume 28.3-4; Iere 7.21; Eseki 20.39; Hose 4.15 5‘Inā fai ia se taulaga fa‘afetai i mea ‘ua fa‘afefeteina; ‘ia ‘outou tala‘iina taulaga e faia ma le loto, ‘ia ‘outou logo atu ai; auā o lo ‘outou loto lea, le fānauga a Isaraelu e, o lo‘o fetalai mai ai le Ali‘i le ATUA.
6O a‘u fo‘i, ‘ua ‘ou avatu ‘iā te ‘outou nifo mamā ‘iā ‘outou ‘a‘ai uma ma le oge i mea e ‘ai i o ‘outou nu‘u uma; a ‘ua ‘outou le toe fo‘i mai lava ‘iā te a‘u, o lo‘o fetalai mai ai le ALI‘I.#Teu 28.57; Iere 15.7; Hakai 2.17 7‘Ua ‘ou tāofia fo‘i le ua ‘iā te ‘outou, ‘ae toe tolu masina i le o‘o ai le seleselegāsaito; ‘ua ‘ou fa‘atotō ifo le timu i le tasi ‘a‘ai, a o le isi ‘a‘ai ‘ua ‘ou le fa‘atimuina; ‘ua timu le tasi pito nu‘u, a o le nu‘u e le‘i timu ‘ua mago lea. 8‘Ona ō atu ai lea o ‘a‘ai po lua pe tolu i le tasi ‘a‘ai e inu vai ai; a ‘ua lē malilie; a ‘ua lē toe fo‘i mai lava ‘outou ‘iā te a‘u, o lo‘o fetalai mai ai le ALI‘I.
9‘Ua ‘ou taia ‘outou i le mamae ma le polopologā, ‘ua ‘aina e le sē kasama o ‘outou fa‘ato‘aga ma o ‘outou tōvine ma o ‘outou mati ma o ‘outou olive; a ‘ua lē toe fo‘i mai ‘outou ‘iā te a‘u, o lo‘o fetalai mai ai le ALI‘I.#Teu 28.22, 28, 60; Ioe 1.4
10‘Ua ‘ou ‘auina atu ‘iā te ‘outou le fa‘ama‘i, e pei ‘ona i ai i Aikupito; ‘ua ‘ou fasia i le pelu o ‘outou taulele‘a, o ‘outou solofanua fo‘i ‘ua ‘ave‘eseina; ‘ua ‘ou fa‘ao‘o a‘e i o ‘outou pogaiisu le elo o a ‘outou toagalauapi; a ‘ua ‘outou le toe fo‘i mai ‘iā te a‘u, o lo‘o fetalai mai ai le ALI‘I.#Eso 12.29; 2 Tu 13.7; Sala 78.50; Ioe 2.20
11‘Ua ‘ou fa‘aumatia nisi o ‘outou fa‘apei ‘ona fa‘aumatia e le Atua o Sotoma ma Komoro; e pei o le motumotu o le afi ‘outou ‘ua se‘ia mai le afi; a ‘ua ‘outou le toe fo‘i mai ‘iā te a‘u, o lo‘o fetalai mai ai le ALI‘I.#Kene 19.24 12O le mea lea e fa‘apea ai ‘ona ‘ou faia ‘iā te oe Isaraelu e, ‘Ou te fai lenei mea ‘iā te oe, o le mea lava lea Isaraelu e, ‘ia e sauni ai lua te fetaia‘i ma lou Atua.
13Auā fa‘auta mai,#Sala 102.25; 139.2; Iere 10.16; Amo 5.8; 8.9; Mika 1.3
o lē na faia mauga ma na faia le matagi.
Ma ‘ua fa‘ailoaina atu i le tagata lona manatu,
o lē na te liua le taeao i le pouliuli,
o lē savali i luga o mea maualuluga o le lalolagi.
O le ALI‘I, o le Atua o ‘au, o lona suafa lea.
Currently Selected:
Amosa 4: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.