Tit. 2
2
Péṉker jintintiátin
1Tura amesha Titiu, péṉker chicham etserkata. Yus Chicham tátsuna nu etserkaip. 2Antsu áishmaṉ katsunt Yusna ainia nu ju̱ jintintrata. Nampechu, náṉkamas enentáimcha, esetas enentáimin ártí. Yus tana nuna umirin tura anenain ártí. Ni itiurchatri̱i̱n Yusan enentáimtusar katsuntin ártí. 3Tura núnismek nuwa̱ katsunt Yusna ainia nusha ju̱ jintintrata. Nisha núnisaraṉ Yus shuarti túramnia nuna péṉker túrawarti. Tsanumin tura nampen ácharti. Antsu péṉker wekasatniun unuinin ártí. 4Nisha yama nuatnakua nuna ni áishri̱n ni uchirí̱ncha nekas aneetniun unuiniararti. 5Ju̱nasha jintintrarti. Esetas enentáimin péṉker wekain ártiniaiti. Ni takatrí̱n péṉker takastin áiniawai. Ni áishri̱n umirin ártiniaiti. Tura waitnentin ártiniaiti. Yus shuarcha Yus Chichaman yajauch chicharkara̱i̱ṉ tusar túrawartiniaiti. “Tu jintintrarta” titiá.
6Nuyá̱ Titiu, natsa ainia nu “náṉkamsar enentáimsarum wekasairap” titiá. 7-8Tura amesha Titiu, ashí tsawant péṉker wekasata. Nu natsa wi túramun júkiar nunak túrawarmi tusam nu túrata. Tura anturtamna nu “nekaschapitia” ti̱i̱ṉ tusam esetsam enentáimsam Yus Chicham tana nu ímiatrusmek jintintiata. Nú túrakmiṉkia Yus Chichaman nakitiana nu shuar “Titiu náṉkamas chichaawai” títiaj tukamá natsaamak tujintramkattui.
9Takarin ainia nu ni takartairi̱n umirkarat tusam jintintrarta. “Shiir enentáimsarum, yajauch áimtsuk shiir umirkatarum” titiá. 10“Kasamkairap tura anaṉkawairap. Iis, péṉker túrakrumka takarniuitiatrum shiir tura asarum ii Uwemtikramin Yusri̱ Chichame̱n shíiraiti tu enentáimtikrattarme” titiá.
11Yus iin waitnentrama asa ashí aentstin uwemtikramprataj tusa wakerutmaji. 12Kame Yus waitnentrama asamtai tunáa ana nu iniaisatniuitji nu nékaji. Tura ju̱ nuṉkanmaya̱ yajauch ana nu wakerukchatniuitji. Tura antsu ju̱ nuṉkanam pujayatrik esettsar enentáimsar anaṉma wekatsuk tuke tsawant Yus anear wekasatniuitji. 13Túrar ii Yusri̱ Jesukrístu, uwemtikramajnia nu, imiá shiir iwiarnar tatí tusar nákastiniaitji. 14Jesukrístuka iin jarutramkamiaji ii tunaarí̱nia̱ uwemtikrampratajtsa. Tura Winia ajasár tuke enentáiji̱a̱i̱ péṉker túrawarat tusa ii tunaari̱n japirtampramiaji.
15Titiu, anaikiamu asam arantutsuk nu jintintrata. Yajauch ana nuna túrawara̱i̱ṉ tusam chicharkarta. Péṉkeran túruinia nu ikiaká̱rta. Tura yajauch chichartukara̱i̱ṉ tusam tuke péṉker wekasata.
Currently Selected:
Tit. 2: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.