2 Tim. 3
3
Tsawant jeamtai ti yajauch túrunattawai
1Amuukatin tsawant jeakui tí itiurchat átatui. 2Shuar aya niṉki enentáimtumasartatui. Kuítian ti wakeriartatui. Naṉkamantu enentáimtumarartatui. Yúsnasha yajauch chicharsartatui. Aparí̱ncha umirkachartatui. Yumiṉsatniuncha nékachu ártatui. Ashí Yúsnancha enentáimtuschartatui. 3Aneetsuk waitnenkartichu ártatui. Tsanumin ártatui. Ni aya̱shí̱ wakeramun katsuncha ártatui. Aya kajen ártatui. Ashí péṉker túrinia nuna nemasri̱ ártatui. 4Amikrí̱ncha surukartatui. Arantsuk tunaan túrawartatui. Waantu enentáimin ártatui. Yusan nakitrar aya ní wakeramunak enentáimtusartatui. 5Yusa kakarmari̱ “ántraiti” tuíniak péṉker umirkachartatui. Túrasha Yusan umirua núnisar túrawartatui. Nu shuar peṉké pachisaip. 6Nu shuarsha shiir chichayataṉ anaṉkawar je̱á̱ wáiniawai. Tura nuwa̱ esetar enentáimchan nekas tunaarinniun anaṉkainiawai. Nu nuwa̱ ashí yajauch wakeramuja̱i̱ anaṉnainiawai. 7Tuma ásar ashí shuara chichame̱n tuke ántuiniayataṉ nekas chichaman nekaatniun tujintiainiawai. 8Yaunchu Ejiptunam Muisais úunt akupniuja̱i̱ chichaakui jimiará iwishin, Jánissha tura Jámprissha Muisaisan kajerainiak “ántar tawai” tiármiayi. Núnisaṉ ju̱ shuar nekas chichaman nakitiáiniawai. Naka enentáimiainiachu ásar Yúsnan naka jintíatniun peṉké tujintiainiawai. 9Túrasha nuna naṉkaamas kuákchartatui. Shuar ti paant ni netse túruiniamuri̱n nekarawartatui. Núnisaṉ nu jimiará iwishniuja̱i̱ túrunamiayi.
Papru Timiutéun akatrámu
10-11Tura ámeka wi tímiaj nu umireame. Wi Yusja̱i̱ shiir wekaamusha métek túriniaitme. Wi enentáimmiasha nékaitme. Áintruiniakui wáitsamaj nu nékame. Tura Yusan enentáimtakun tura aneṉkratkun shiir enentáiji̱a̱i̱ katsuntramjai. Antiukíanmasha Ikiuniunmasha tura Rístranmasha ashí yajauch túrutawarmatai wáitsamaj nu paant nékame. Túrasha ii Uuntri̱ uwemtikrurmiayi. 12Nekasaiti, shuar Jesukrístuja̱i̱ shiir túrataj tákuṉka ni nemasri̱ áintiam ti wáitsatniuiti. 13Tura ashí anaṉkartin ainia nusha kame ashí yajauch shuarsha nú yajauch túrukiar wétatui. Iwianchji̱a̱i̱ anaṉkamu ásar chikichnasha anaṉkiar wéartatui.
14Antsu ámeka unuimiam nu imiá nekasaiti tu enentáimtakum tuke emetata. Jintintrámawarmia nú shuarsha wáitrichua nu nékame. 15Uchichinmaya̱ṉ Yus Chicham nékame. Yus Chichamka uwempratniun jintintramamniaiti. Nusha “Jesukrístu nekas enentáimtakum uwemprattame” tawai. 16-17Ashí Ní Papiri̱n Yus mayatmaiti. Shuar ni chichame̱n nekaawar péṉkeran turujamai ajas ashí péṉkera nuna túrawarat tusa áarmauyayi. Tuma asa Yus Papikia shuartin unuikiartak tunáa túrajnia nu Yus Papiji̱a̱i̱ nekamatniuitji. Tura awajiakrincha esetra wekasatniun Yus Papí núnaka paant jintíak imiá péṉkeraiti.
Currently Selected:
2 Tim. 3: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.