ROMANI NA KIHA 5
5
Na mane
1Barokomu, na êraku koro,
inê kê bani oga noga i mu iaku.
Inê kê tataku na marâ i sigini koro.
Inê kê ngêgi na pirui henigi na robota.
Inê kê tonomigi na vaini ma na tavoni na susu.
Ngêngê, bamane, ma kamu totono,
totono na hetakuiha
mataro me ki ruguhigamu.
Na heta na vivita
Na gete
2Inê kê mêru
ma na aitangihaku ki pe tora bono.
Inê kê marute, vi baharana iaku
ki korekore i maani ruma, ki vi:
‘Barokomu, baharamu,
na kuvê iaku gê takuia,
gu tangahia taraku.
Na bêku ki voka renigi na kârupu
ma na varehuku renigi na vaha igê na bungiani.’
3Inê kê bani tasigi râ na gahu iaku.
Tanu hega, kani vigê hagesuru aporo nikâ?
Inê kê bani tananigi na êgaku.
Tanu hega kani vigê hagamakoragi nikâ?
4Baharana iaku ki têa na maani ruma.
Na bunaniaku ki hepehepe,
suria ngaia ki ura me hagarangi.
5Inê kê aharaga,
hanana gê taha tarana,
ki banu me baharana iaku.
Na rimaku ki ruhu
renigi na tavoni na gatoga,
ga ususu i kakêku,
matena gê têa na raburina na maani ruma.
6Inê kê taha tarana baharana iaku
ma ngaia ki bani râ.
Inê kê obania bâraha
vi ve rongoa na ringena
ma ngaia ki bani magahuru.
Inê kê bâbâ renia
ma kê pe tarahua.
Inê kê unia,
ma ngaia ki pe arami rârâ.
7Na mane ga arârâ pusia na hinua
ka tarahuê ma ka tahuruê.
Ngaira ka hagamamariê.
Na mane ga bâsuria na para ni hinua
ka tarisia râ na aruhaku.
8Kere gete ni Jerusaleme
mu suru tangê,
vi manga mu tarahua baharana iaku,
ma kamu hagarongoa,
vi inê kê haga ni bagamame,
suria gê angisia ngavê.
Na kere gete
9Igo na tohona.
I hega, maharamu
i tora getea vari tenira na ani getera?
Tanu hega kani vora
re baharana iamu manimani,
hanana go katogami, kami surusuru vikana?
Na gete
10Baharana iaku ki bâkoro ngavê
ma ki raramohaga.
Ngaia ki teharira na bera na mane.
11Na maana ki na golo,
na golo taranina.
Na varehuna ka na ahani na ni
ga ababarere
ma ka masuri manga na maaraha.
12Na maana karu bâkoro ngavê
mangarerua na kuvê
igê na ve i gogogo.
Ngairerua karu mamanu
igê na tavona na susu.
13Na parina karu unuha koro
manga na mu ni mahe.
Na gaviharana
karu mangagi na mahe memera
ma karu voka
renigi na tavoni na gatoga.
14Na rimana karu manga na golo i manaporoporo
ma karu togatoga mangagi na hê
i raha na meni.
Na apena ki mamao manga rivo siki
ma ki togatoga renigi na hê maravarava.
15Na êgana karu manaporoporo
manga na hê bâkoro.
Na golo ki têgi na hunaterua.
Ngaia ki bagararaha
manga na hungana i Libanone
mangagi na apinige ga rapu oto.
16Na harana ki mamaki ngavê.
Na ara ni marâ renia ka hagamuê.
Kere gete ni Jerusaleme,
nga hanana baharana iaku ngekana.
Ngaia nga kani barokona iaku.
Currently Selected:
ROMANI NA KIHA 5: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific