HAGARAHENGA 8
8
Na hagapunariata o Aroni mo karena
(Tahinga 29.1-37)
1Na Araha ki vi tanga o Moise, ki vi: 2“Go merarâ o Aroni mo karena tanga na maana na ruma na gahu apuna iaku ma ko migirâ me na tuguni ni mane ni vogasiha, na oile ni moneha, na bêhâgaterua na puruka mane tanga na vogasiha ni bonoteniha ni tasi, na sipi mane gi rua ma na heni henigi na bereti ga pe ahunga. 3Hemuri ko unira na Isiraelita hato ka arâ me i ngekana.
4O Moise ki kato manga na Araha i bonasia, ma na matena na Isiraelita ka bani haku me i ngekana, 5ngaia ki vi tangara, ki vi: “Inê kê sugi katoa na marâ na Araha i bonasiê renia.”
6O Moise ki unira me o Aroni mo karena ma ki bonasira ka mamanu, hanana ga matarotaro suria na ramata na rotu. 7Ngaia ki hagatugunia o Aroni renirerua na tuguni, na ani i borahu ma na ani i abubu, ma ki hugusia renia na hogosina. Ngaia ki hagahaga renia na gahu ni parematona ma ki surua na kakavina huria. 8Ngaia ki naka i matona na anga ni girarasiha ma ki nakarerua na hê ni girarasiha i rarona. 9Ngaia ki naka na esara i bêna ma ki naka na tarepuri na golo i raena, na girarana vi o Aroni ka na anina na Araha. Nga hanana na Araha i bani bonasia o Moise ngekana.
10Hemuri o Moise ki têa na oile ni moneha ma ki monea re na ruma na gahu apuna iana na Araha henigi na ara ni marâ hato i rarona renia. Vikana ngaia ki hagapunarigi tanga na Araha. 11Ngaia ki tahusigenia hagepi tagua na oile igê na bea ni vogasiha, igê na marâ tanga, igê na maraguhu ni tananiha ma igê na hunana. Ngaia ki hagapunarigi vikana tanga na Araha. 12Ngaia ki karangia tagua na oile i bêna o Aroni hanana i hagapunaria. 13Hemuri o Moise ki unira me o karena o Aroni, ki hagatugunira renigi na gahu ni mane ni vogasiha abubu, ki hugusira renigi na hogosita ma ki nakagi i bêta na esara na gahu, manga na Araha i bani bonasia vikana.
14Hemuri o Moise ki urua me na bêhâgana na puruka mane tanga na vogasiha ni bonoteniha ni tasi ma o Aroni mo karena ka nakagi râ na rimata i bêna. 15O Moise ki nahuia ki me, ki tora tagua na gapuna, ki anumia na kakêna igê ma ki taruhigi re na bugusuni na sukuni na bea ni vogasiha renia, hanana i hagapunarigi. Na gapuna na agua i hita râ, ngaia ki karangia i ano i hunana na bea ni vogasiha. Ngaia ki hagamatarotaroa ma ki hagapunaria vikana. 16O Moise ki tavogi râ na êbena hato, na aunâbana, na agua koro na rokona henia na êbena igê ma na guana apinige iana henia na êbeterua igê, ma ki sungigi ngaigi hato igê na bea ni vogasiha. 17Na puruka na agua ga hita râ henigi na gavona, na hasigona ma na angena ngaia ki sungigi tarege râ tenia na tênga, manga na Araha i bani bonasia vikana.
18Hemuri o Moise ki urua me na sipi mane tanga i susu renia. O Aroni mo karena ka nakagi râ na rimata i bêna. 19O Moise ki nahuia ki me ma ki tahusigenia na gapuna igê na apaneni ge he na bea ni vogasiha. 20-21Ngaia ki rukaruka na sipi mane. Ngaia ki tananigi na êgana ma na aunâbana, ma ki sungigi na bêna, na êbena ma na agua hato ga hita so igê na bea ni vogasiha, manga na Araha i bani bonasia vikana. Na vogasiha i susu renia ngekana ka na vogasiha ni ngêra ma na vanuhana ki hagakoro obana na Araha.
22Hemuri o Moise ki urua me na ruata na sipi mane tanga na hagapunariata na mane ni vogasiha. O Aroni mo karena ka nakagi râ na rimata i bêna. 23O Moise ki nahuia ki me, ki tavoa tagua na gapuna ma ki taruhigi na verona na karingana na otona o Aroni, na kakêna raha na otona, ma na kakêna raha na êgana na otona renia. 24Hemuri ngaia ki unira me o karena o Aroni ma ki taruhigi na veroni na karingata na otota, na kakêta raha na rimata na otota ma na kakêta raha na êgata na otota renia na gapuna. Na gapu na agua i hita râ, ngaia ki tahusigenia igê na apaneni ge he na bea ni vogasiha. 25Ngaia ki tavogi râ êbena hato, na kerena ubega, êbena hato na aunâbana, na agua koro na rokona henia na êbena igê, na guana apinige iana henia na êbeterua igê ma na êgana na otona. 26Hemuri ngaia ki tavogi na guani na bereti tenia na heni, na bereti ga pe ahunga ma ka bani hagapunarigi tanga na Araha: na guana gi tage i upupuga, na ani gi tage ga toraria henia na oile, ma na guana manihinihi. Ngaia ki nakagi akê igê na êbena ma na megana na êgana na otona. 27Ngaia ki nakagi ngaigi hato i na ababani rimata o Aroni mo karena ma ngaira ka hagapunarigi tanga na Araha. 28Hemuri o Moise ki tavogi tenira, ki nakagi akê igê na vogasiha i susu renia igê na bea ni vogasiha ma ki sungigi manga na vogasiha na hagapunariata. Ngaia ka na vogasiha ni ngêra ma na vanuhana ki hagakoro obana na Araha. 29Hemuri o Moise ki têa na megana na matona na sipi mane ma ki hagapunaria tanga na Araha. Na megana na matona na sipi mane na hagapunariata ngekana ka na anina o Moise. O Moise ki katogi na ara tarani hato ngegana suria bonasiha iana na Araha tanga.
30O Moise ki tavogi tagua na oile ni moneha ma tagua na gapu i oga igê na bea ni vogasiha ma ki kamusira o Aroni mo karena henigi na tuguni iata renigi. Vikana ngaia ki hagapunarira henigi na tuguni iata tanga na Araha.
31O Moise ki vi tangara o Aroni mo karena, ki vi: “Mu migirâ na hasigoni tanga na maana na ruma na gahu apuna iana na Araha, mu hagagobogi ma kamu ngaugi i ngekana henigi na bereti tenia na heni ga oga igê na votovoto ni hagapunariha, manga na Araha i bani haribona vikana. 32Na hasigoni ma na bereti ga hitahita râ, mu sungigi nga. 33Mu gâga nga i maana na ruma na gahu apuna surigi na tangiani gi pi mataro me ki hatohato na hagapunariami. 34Na Araha ki bonasigia ka katogi na tarani ga katogi i ngekê, hanana i hatohato tenigamu na tasi iami. 35Mu gâga nga i maana na ruma na gahu apuna igê na tangiani ma na bungiani surigi na tangiani gi pi ma kamu katogi na marâ na Araha i bani bonasigamu renigi. Manga i mareha, hoi, igamu kamu page meme. Ngaia nga ka na bonasiha iana na Araha tangê.” 36Ngekana o Aroni mo karena ka katogi na ara ni marâ hato na Araha i bani haribona renigi tangara i harana o Moise.
Currently Selected:
HAGARAHENGA 8: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific