HAGARAHENGA 4
4
Na vogasiha renigi na tasi ga bagararâ me
1Na Araha ki bonasia o Moise, 2ki hagarongora na Isiraelita, vi manga na enoni i bagararâ me ki tasitasi ma ki aharêngigi na anima na ramata iana na Araha, ngaia ki tuguhia vi arâ surigi na ramata igê.
3Manga vi na mane ni vogasiha i teha ma ki tasitasi ma ki katora na enoni ka tangahurira, ngaia ki tuguhia, vi tagarenia tanga na Araha na puruka mane, i apeapekoro ma ki pe baubêga, manga na vogasiha ni bonoteniha ni tasi iana. 4Ngaia ki urua me nga na puruka mane i maana na ruma na gahu apuna, ki naka na rimana i bêna na puruka mane ma ki nahuia ki meme i ngekana i maana na Araha. 5Hemuri na mane ni vogasiha i teha ki apegi nga tagua na gapuna na puruka mane ma ki mebanu igê na ruma na gahu apuna. 6Ngaia ki anumia na kakêna igê na gapu ma ki tahusigenia hagepi i maana na gahu i kuku i maana na kiboru apuna iana na Araha. 7Hemuri ngaia ki taruhigenia nga na gapu igê na bugusuni ge he na sukuni na bea ni sungiani na marâ i sigini koro i rarona na ruma na gahu apuna. Na gapu na agua i hitahita râ, ngaia ki karangia nga i hunana na bea ni vogasiha ga susu igê. 8Tenia na puruka mane ngekana ngaia ki tavogi râ nga na êbena hato, na êbena na aunâbana, 9na guana apinige iana henigi na êbeterua igê ma na agua koro na rokona henia na êbena igê. 10Na mane ni vogasiha ki toregi nga na êbena ngegana ma ki sungigi igê na bea ga susu igê tagenana manga i katoa na êbena na ganiana ni vogasiha ni ngêhaku. 11Ngaia ki tavogi nga na gavona, na hasigona hato, na bêna, na êgana ma na rimana, na aunâbana henigi na angena, 12ma ki migihura tenia na tênga tanga na agua apuna ga rurugi igê na rahu. Ma i ngekana igê na uku na rahu ngaia ki sungigi nga igê na gi na ario.
13Manga vi na hakuta hagenani na Isiraelita ma ka bagararâ me ka tasitasi ma ka aharêngigi na ramata iana na Araha, 14ngaira ki tuguhira viga tagarenia na bêhâgana na puruka mane manga na vogasiha ni bonoteniha ni tasi, matena ga tahetara vi ngaira ka bani tasi. Ngaira ka urua me nga tanga na ruma na gahu apuna iana na Araha. 15Na meraha iata ka nakagi nga na rimata i bêna na puruka mane ma ka nahuia ki meme nga i ngekana. 16Na mane ni vogasiha i teha ki mebanu nga tagua na gapuna na puruka mane igê na ruma na gahu apuna. 17Ngaia ki anumia nga na kakêna igê ma ki kamusia hagepi i maana na gahu i kuku i maana na kiboru apuna iana na Araha. 18Ngaia ki taruhigenia tagua na gapuna na puruka igê na bugusuni ge he na sukuni na bea ni sungiani na marâ i sigini koro i rarona na ruma na gahu apuna. Na gapuna na agua i hitahita râ, ngaia ki karangia nga i hunana na bea ni vogasiha ga susu igê, i gâga i maana na ruma na gahu apuna. 19Hemuri ngaia ki toregi na êbena hato ma ki sungigi igê na bea ni vogasiha. 20Ngaia ki katoa nga na puruka mane ngekana tagenana ma manga i katoa na puruka mane ni vogasiha ni bonoteniha ni tasi. Igê na tarana ngekana ngaia ki tagarenia nga na vogasiha ni bonoteniha ni tasi iata na enoni ma na tasi ka kahu hatohato tenira. 21Hemuri ngaia ki mehura nga na puruka mane tenia na tênga ma ki sungia nga manga i sungia na puruka mane ni vogasiha ni bonoteniha ni tasi iana marena. Ngaia nga ka na vogasiha ni bonoteniha ni tasi iana na hakuta.
22Manga vi na meraha ma ki bagararâ me ki tasitasi ma ki aharê igê na ramata iana na Araha. 23Ngaia ki tuguhia, vi tagarenia na goti mane i apeapekoro ma ki pe baubêga, matena i tahetara, vi ngaia ki bani tasi. 24Ngaia ki naka nga na rimana i bêna na goti ma ki nahuia ki meme i na apanena na mahana na bea ni vogasiha, na agua ga nahuira ka meme igê na ganiani tanga ga susu renigi. Ngaia nga nga na vogasiha ni bonoteniha ni tasi. 25Na mane ni vogasiha ki anumia nga na kakêna igê na gapuna na goti ma ki taruhigenia igê na bugusuni ge he na sukuni na bea ni vogasiha. Na gapu na agua i hitahita râ, ngaia ki karingia i hunana na bea ni vogasiha. 26Hemuri ngaia ki sungigi nga na êbena hato igê na bea ni vogasiha, tagenana manga i sungigi na êbeta na ganiani ni vogasiha ni ngêhaku. Ngaia nga nga hanana na mane ni vogasiha i tagarenia na vogasiha ni bonoteniha ni tasi iana na meraha ma na tasi ka kahu hatohato tenia.
27Manga vi na ataka mavê na enoni ma ki bagararâ me ki tasitasi ma ki aharê igê na ramata iana na Araha, 28ngaia ki tuguhia matena i tahetara vi ngaia ki bani tasi vi tagarenia na goti hehene i apeapekoro ma ki pe baubêga. 29Ngaia ki naka nga na rimana i bêna na goti ma ki nahuia ki meme i na apanena na mahana na bea ni vogasiha igê na agua ga nahuira ka meme igê na ganiani ga susu renira. 30Na mane ni vogasiha ki anumia nga na kakêna igê na gapuna na goti, ki taruhigenia igê na bugusuni ge he na sukuni na bea ni vogasiha ma na gapu i hitahita râ ki karangia nga i hunana na bea ni vogasiha. 31Hemuri ngaia ki tavogi râ nga na êbena hato tagenana ma manga i tavogi râ na êbeta na ganiani ni vogasiha ni ngêhaku, ma ki sungigi nga igê na bea ni vogasiha. Na vanuhana ki hagakoro obana na Araha. Ngekana nga hanana na mane ni vogasiha i tagarenia na vogasiha ni bonoteniha ni tasi iana na mane ngekana ma na tasi ki kahu hatohato tenia.
32Manga vi na mane ma ki merâ me hete na sipi tanga na vogasiha ni bonoteniha ni tasi, ngaia ki merâ me nga na sipi hehene i apeapekoro ma ki pe baubêga. 33Ngaia ki naka nga na rimana i bêna na sipi ma ki nahuia ki meme i na apanena na mahana na bea ni vogasiha igê na agua ga nahuira ka meme igê na ganiani ga susu renira. 34Na mane ni vogasiha ki anumia nga na kakêna igê na gapuna na sipi, ki taruhigenia igê na bugusuni ge he na sukuni na bea ni vogasiha, ma na gapu i hitahita râ ki karangia nga i hunana na bea ni vogasiha. 35Hemuri ngaia ki tavogi râ nga na êbena hato tagenana ma manga i tavogi râ na êbeta na sipi ni vogasiha ni ngêhaku. Ngaia ki susu tanga na Araha renia na êbena igê na bea ni vogasiha henigi na ngêra ni vogasiha ni ngêhaku. Ngekana nga hanana na mane ni vogasiha i tagarenia nga na vogasiha ni bonoteniha ni tasi iana na mane ngekana ma na tasi ki kahu hatohato tenia.
Currently Selected:
HAGARAHENGA 4: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific