HAGARAHENGA 11
11
Na ganiani ga arari ma viga ngaugi
(Ramata 14.3-21)
1Na Araha ki vatererua o Moise mo Aroni renigi na ramata igê 2tangara na Isiraelita. Igamu kamu girara mu ngaura na ganiani i bemu, 3ga matanga na ababa ni ugata ma ka ngêngê hurigi na ngêhurita. 4-6Ma siana kamu ngaura na kamelo, na ngongohuriva ma na rabiti. Na ani ngegana ka pe matarotaro surigi na ramata. Ngaira ka ngêngê hurigi na ngêhurita ma ka pe matanga na ababa ni ugata. 7Siana kamu ngaura na bo. Ngaira ka pe matarotaro. Ngaira ki matanga na ababa ni ugata ma ka pe ngêngê hurigi na ngêhurita. 8Siana kamu ngaura na ganiani ngegana se vigamu hatarigi na gahuata, suria ngaira ka pe matarotaro tangagamu vigamu ngaura.
9Igamu ki arari, vigamu ngaura na ani mavê na siare ga tonga renigi na egota, na aheaheta, na heheni na kereta ma na ênahita, 10ma na anima na ega ga pe tonga renigi na marâ ngegana, siana kamu ngaura. 11Ngaira ka pe matarotaro tangagamu vigamu ngaura. Ngekana siana kamu ngaura se vigamu hatarigi na gahuata. 12Na anima na ega ga pe tonga renigi na marâ vigana, siana kamu ngaura.
13-19Siana kamu ngaura na manu igê, suria ga pe matarotaro tangagamu vigamu ngaura: na ahetaronga, na ko makukuni, na tehe, na ani raha ma na ani sisite, na emu, na manu ni waiê, na gauha ma na roke, na ani raha ma na ni sisite.
20Na ara ni marâ mamauri hato ga tonga na gagahata ma ka mareha vi na manu mangara na rango, mamanivo, na hasikoko, na pepe ma na marâ vigana, ngaira ka pe matarotaro tangagamu, vigamu ngaura, 21nga noga ma na ani ga rekereke manga na pê. 22I arari ma mu ngaura na pê, na pâpâ ma na turu. 23Na marâ getera hato ga sisite ma ka tonga renigi na gagahata ma ka angoango, ngaira ka pe matarotaro tangagamu vigamu ngaura. 24-28Na ganiani hato, ga tonga renigi na ababa ni ugata ga pe matanga ma ka pe ngêngê hurigi na ngêhurita, ma na ani hato ga tonga renigi na êgata girua ma na rimata girua henigi na kakêta, ngaira ka pe matarotaro tangagamu surigi na ramata, vigamu ngaura. Na anima na enoni i hatarigi na gahuata, ngaia ki pe matarotaro nogana mataro me ki bungibungi. Na anima na enoni i toregi râ na gahuata, ngaia ki tuguhia nga vi tananigi na gahu iana. Henaka, ma ngaia ki pe matarotaro mataro me ki bungibungi.
29-30Na ani mavê na kiki, na ani raha ma na ani sisite, na tata, na gunu na garagu ma na marâ vigana, ngaira ka pe matarotaro tangagamu, vigamu ngaura. 31Na anima na enoni ki hatarigi na gahuata, ngaia ki pe matarotaro mataro me ki bungibungi. 32Manga vi na gahuata ka votavota huria ta na marâ, na marâ ngekana ki pe matarotaro nogana, naka ma na ta se vi tanga na ta: na marâ ga tagarahia renia na apinige, se renia na gahu, se renia na gavona na ganiana se renigi na varehuna na goti. Ga tanania nga na marâ ngekana. Henaka, ma ngaia ki pe matarotaro mataro me ki bungibungi. 33Manga vi na gahuata na marâ ngegana ma ka votavota i raronna na apira na hê, na ara ni marâ i rarona ka pe matarotaro nogani ma kamu kamakamaria nga na apira na hê. 34Manga mu karangia na ve tenia na apira na hê ngekana hurigi na ngêra, i ararigamu vigamu ngaugi, na ngêra ngegana ka kahu pe matarotaro tangagamu vigamu ngaugi. I tagenana ma tanga na marâ ni tonoha i rarona na apira na hê ngekana. 35Na anima na marâ, na gahuata na marâ ngegana ga votavota huria, ngaia ki pe matarotaro nogana. Manga vi na umu na mako, mu kamakamaria nga. 36Manga vi na vebanga se na vekaru, ngaia ki ama ni matarotaro nga henaka vi na anima na marâ getea i hatarigi na gahuata, ki pe matarotaro. 37Manga vi na gahua ma ki votavota hurigi na maani ni hasinga, na maani ka ama ni matarotaro nga. 38Ma na maani ga hagavokagi igê na ve ma na gahua ki votavota hurigi, na maani ngegana ka pe matarotaro nogani.
39Manga vi na ganiana, i arari ma vigamu ngaua, ma ki meme marena, ma ta na enoni ki hataria na gahuana, ngaia ki pe matarotaro nogana mataro me ki bungibungi. 40Manga vi na enoni ma ki ngaua tagua na ganiana ngekana, ngaia ki tananigi nga na gahu iana. Henaka, ma ngaia ki pe matarotaro mataro me ki bungibungi.
41Siana kamu ngaura na marâ mamauri ga angoango i ano, 42henaka ga sisiri i ano, se ga arârâ renigi na êgata girua ma na rimata gi rua se ga rakorako. 43Siana kamu ngaura na marâ ngegana, i era ma kamu pe matarotaro nogami. 44Inê nga ka na Araha God iami ma kê apuna. Tahema mu bâsigamu nga, hanana mu apuna nogami. Siana kamu pe matarotaro. 45Inê nga ka na Araha gê toregamu hura tenia i Esipito, hanana vigê God iami. Tahema mu apuna nga, suria inê nga kanigê apuna. 46Ngaigi ngegana nga na ramata renira na marâ mamauri, na manu ma na ega ma na marâ hato ga angoango i ano. 47Mu hagakitagi, vi na ta ka matarotaro surigi na ramata ma na ta ka mareha. Mu hagakitara, vi na ganiani ta kaniga ararigamu vigamu ngaura ma na ani ta ka mareha.
Currently Selected:
HAGARAHENGA 11: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific