JOELE 3
3
Na Araha ki surira na enoni ga pe tongesuria
1Na Araha ki vi:
“I na matena ngekana
inê be katora na kariaku i Juta me Jerusaleme,
ke oga aporo igê na ramana.
2Na enoni hato i maveta, ga pe tongesuriê,
inê be hagahakura igê na maruguna ni Suriha Raha.
Ma i ngekana inê be hagatamasira igê
renigi na bagaparongata tangara na kariaku.
Ngaira ka tokorenira na Isiraelita, na kariaku,
surigi na agua getegi.
Ngaira ka votoa na mako i Isiraele.
3Ngaira ka pile tasi renira na kariaku,
ga bani henahuraura,
hanana vi o ti ki page nahunira.
Na kere mane ngaira ka urusira renira na êrâ.
Ngaira ka pasi tono
ma ka urusigi na vaini renira na kere gete.
4Ai ni Taire me Sitone,
igamu kamu pe arariê.
Igamu hato na ai ni Pilisitia,
igamu kamu pe arariê.
Manga mu naka na siva tangê inê,
inê be hagenago be pariria bê aporo tangagamu igamu.
5Igamu kamu hanagogi na siliva ma na golo
ma na ruruguha raha iaku,
ma kamu nakagi i ruma ni vogasiha iami.
6Na ai ni Juta me Jerusaleme mu henahuraura
ma kamu hagavuringenira tangara na ai ni Agaia.
7Bâ, inê be torera aporo tenigi na agua,
mu hagavuringenira igê.
Na eraha, mu bani katogi tangara ngaira,
inê nikâ be katogi bê aporo tangagamu igamu.
8Inê be hagavuringenira na karemi, mane ma na gete,
tangara na ai ni Juta,
ma na ai ni Juta ka page hagavuringenira hagatê
tangara na Sabeo, na enoni i Arabia.
Ngaia kani gê visia, inê na Araha!
9“Igamu na merongata na kariaku,
mu nananêa nga na hearihatana.
Mu unira me haku na maneraha ni me iami.
Mu hakura me na mane hato ni me iami.
Mu heguniguni tanga na hearihatana.
10Na marâ ni tagaraniha i mu
mu katogi re na tangaruha ni hearihatana.
Mu tagarahigi na ora renigi na gira iami.
Igamu na enoni marusi,
mu arâ nga nogami igê na hearihatana.
11Igamu hato na enoni i maveta, mu pe tongesuriê,
mu rêrête me haku
igê na maruguna ni Suriha Raha.”
Araha, gu taharira
renira na mane ni me iamu!
12Na Araha ki vi:
“Na enoni, ga pe tongesuriê,
ki tuguhira nga, viga nananê
ma ka hakuhaku me igê na maruguna ni Suriha Raha,
hanana gê hagatamasira igê.
13Ngaira ka erataga ngavê.
Mu retera mangagi na ohu, ga mêa.
Mu menamenarira
manga na guani na vaini mu rusigi.
Na apira ka vunu ahaharê renigi,
suria na erahata ki aharêsira.”
14Na rehagaro ma na rehagaro ka oga haku
igê na maruguna ni Suriha raha.
I sugia ma na tangiana iaku, inê na Araha.
15Na arito ma na hageha karu rotoroto,
ma na higu ka pe mave.
Na Araha ki anumasira na kariana
16Na Araha ki ngere tenia i Sione
manga na laione i nguru raha.
Na ringena tenia i Jerusaleme
ki rongo raha manga na gugusuhia.
Na vavearo ma na ano karu gisigisi.
Ma na Araha ki anumasira na kariana,
ga rukuruku i pasina.
17Ngaia ki tamasi ki vi:
“Isiraelita, mu page aitangisiê maninga,
vi inê nga ki na Araha God iami.
Inê kê goga i Sione, na hungana apuna iaku.
Jerusaleme ki na hinua apuna iaku.
Na mamahuara ki asa, vige page rêa aporo.
18I na matena ngekana
na mu ni vaini ka page gahuigi na barani
ma na puruka ma na sipi
ka page manasigi na hungani.
Na ara ni ve hato i Juta
ka page vora na ve oto.
Na ve banga ki page gogo me
tenia na Ruma ni Rotu
ma ki page hagavokaria na maruguna i Akasia.
19“Esipito ki page vora na bagamanihê raha.
Etome ki page vora na masusu avagavaga,
suria ngaira ka sugaria i Juta
ma ka nahuira ka me na enoni koro.
20-21Inê be nahu baruta.
I asa be tako renira na enoni era ngegana.
Na kariaku ka page oga gatagata nga
i Juta me Jerusaleme,
ma inê nga, na Araha,
kê goga tare nga i Sione.
Currently Selected:
JOELE 3: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific