MANE NI HAGAOTONGA 18
18
O Miga ma na varo ninuni iana o Tane
1I na matena ngekana na maneraha ki mamênga vige gâga i Isiraele. I na mateni ngegana na varo ninuni iana o Tane ki bâbâ renia na mako, hanana vige parênia ma ke ogasia, suria ngaira ka mamênga vige nahunia mareta na mako nga noga ma na varo ninuni getera iana o Isiraele. 2Vikana na varo ninuni iana o Tane ki atera na vere rima na mane ramo i berarogata so mareta. Ngaira ka hagatorangenira tenirerua na hinua i Sora me Esetaole, hanana ga arâhia na agua ma ka arâ bâbâ igê. Matena ga ata râ igê na hungani i Eparaimi, ngaira ka oga noga i ruma iana o Miga. 3Matena ga oga i ngekana, ngaira ka rongo hagakita renia na mane haoru na levita. Vikê ngaira ka ura râ tanga ma ka hagatea, ka vi: “Na ta kanigo migioga ikê? Tanu hega kanigo râ me ikê?”
4Ngaia ki arami, ki vi: “O Miga ki obania vi vuriê kê voravora re na mane ni vogasiha iana. Ma inê kê vi, i koro ma.”
5Ngaira ka vi tanga, ka vi: “Gu hagatea God, manga vi na râha iamami ki togâna na marâ mi obania, se mareha.”
6Na mane ni vogasiha ki aramira, ki vi: “Siana kamu tako bâraha. Na Araha ki ngahisigamu igê na râha iami.”
7Hoi, na vere rima na mane ngegana ka tavoraha nikâ ma ka râ tanga na hinua i Laisi. Ngaira ka bâsira na enoni i ngekana ga oga igê na ramana mangara na ai ni Sitone. Ngaira ka haritagi, ka marape ma ka pe hekorekore. Ngaira ka bani nahunigi na marâ hato ga mauri re. Ngaira ka oga hagatê tenira na ai ni Sitone ma ka pe hakunira na enoni i hinua getigi.
8Matena na vere rima na mane ka aporo i Sora me Esetaole, na goata ka hagatera, ka vi: “I hega? Mu tarahua?” 9Ngaira ka arami, ka vi: “Nika, ge taharia i Laisi. Igami kami bâsia na mako i koro teha ngavê. Siana kamu hagarihu. Garigari! Henahuraua! 10Matena mu atata vê i ngekana, mu page girara, vi na enoni i ngekana ka pe hinahinaru rârâ. Ngaia ki na mako i raha. Na ara ni marâ mu obanigi ka oga igê. Na Araha ki page haganahunigamu renigi.”
11Vikana na tangarê ge ono na mane ni me tenia na varo ninuni iana o Tane ka tavoraha tenirerua i Sora me Esetaole tanga na hearihatana. 12Ngaira ka râ ma ka tênga kereso i Kiriate Jearimi i Juta. Tahema na agua ngekana ka hêtana mênga renia vi Tênga iana o Tane. 13Ngaira ka râ nga tenia i ngekana ma ka ata i ruma iana o Miga igê na hungani i Eparaimi.
14Hoi, na vere rima na mane ga bani râ bâbâ igê na mako rihia i Laisi, ngaira ka vi tangara na tamata, ka vi: “Mu bani girara vari, vi i rarona ta na ruma i ngekana ki oga igê na nununa na ataro, ga taruhia renia na siliva? Tani na nunuta na ataro getera ma na hê ni girarasiha ka gâga i ngekana nikâ. Mu tako manga i he ga henakagi?” 15Vikê ngaira ka banu i ruma iana o Miga, i oga igê na mane haoru na levita. Ngaira ka hagatea, ka vi: “I hega, na mani marâ ki koro ma?” 16Igê nga na matena ngekana na 600 na mane ni me tenia na varo ninuni iana o Tane ka ura igê na maani para ni hinua. Ngaira ka tangaru. 17Na vere rima na mane ga râ bâbâ, ka tari oto râ ka banu i ruma ma ka toregi na nunuta na ataro, na ani ga taruhia renia na siliva henigi na ani getigi ma henia na hê ni girarasiha. Ngaira ka kato vikana, matena na mane ni vogasiha ki oga henira na 600 na mane ni me igê na maani para ni hinua.
18Matena na mane ka banu i ruma iana o Miga ma ka hanagogi na nunuta na ataro ma na hê ni girarasiha, na mane ni vogasiha ki hagatera, ki vi: “Na ta mu katoa?”
19Ngaira ka vi tanga, ki vi: “Muni vê! Siana ko tamasi! Gu râ me henigami, ku mane ni vogasiha ma ni hagaotonga iamami. I hega, go mane ni vogasiha tanga na ahemata na vere tage na mane, se tanga tani na varo ninuni hagenani iata na Isiraelita?” 20Na mane ni vogasiha ki aganaria ngavê vikana. Vikê ngaia ki toregi na nunuta na ataro henia na hê ni girarasiha ma ki râ henira.
21Ngaira ka arigu vê ka râ. Na kareta, na togoha iata henigi na nahuninga iata ka nanago tarata. 22Matena ga arege râ tenia na ruma iana o Miga, o Miga ki unira haku na me i pasina tanga na hearihatana. Ngaira ka tango surira na raraha iana o Tane ka tarahura, 23ma ka ngirira. Na raraha iana o Tane ka aharo aporo ma ka hagatea o Miga, ka vi: “Na tao? Na me tanga na ta?”
24Ma o Miga ki aramira, ki vi: “Tanu hega mu hagateê? Mu pe bani girara? Igamu kamu hanagoa na mane ni vogasiha iaku henigi na nunuta na ataro, gê tahegi. Inê kê tê tara renigi!”
25Na varo ninuni iana o Tane ki vi tanga, ki vi: “Muni vê, i era ma na mane ni me igê ka mangariaga tangago ka taharigo, i era ma igo ma na ahemata iamu kamu me!” 26Hoi, na varo ninuni iana o Tane ki râ nga. O Miga ki girara vi ngaia ki pe ararira. Tahema ngaia ki arigu aporo tanga i pasina.
27Hoi, na varo ninuni iana o Tane ki tariha i Laisi henigi na nunuta na ataro, i tahegi o Miga, ma henia na mane vogasiha iana. Ngaira ka taharia i Laisi ma ka mutera na enoni igê ma ka hagamakaka na hinua. Na enoni igê ka marape ma ka haritagi. 28I mareha rârâ ta na enoni vige tamanira, suria i Laisi na hinua iata ki hagatêria i Sitone ma ngaira ka pe hakunira na enoni getera. Na hinua iata ki oga igê na maruguna tagenana manga i Beteregobo. Na varo ninuni iana o Tane ki tagarahia aporo na hinua ma ki ogasia. 29Ngaira ka urusia na atana i Laisi ma ka hêtana renia i vi Tane, suria na êvarita ka no Tane, o karena o Jakobo. 30Na raraha iana o Tane ka hagêrasia na nununa na ataro, i tahea o Miga i ngekana ma ka vogasia igê. O Jonatane karena o Geresone mo vesina o Moise kani mane ni vogasiha iata na raraha iana o Tane. Na raraha iana o Jonatane ngaira ka mane ni vogasiha rârâ mataro me na matena na merongata ka henahuraura vê na enoni. 31Na nununa na ataro i tahea o Miga ki oga i Tane suria na matena hagenani i oga na ruma na gahu iana God i hinua i Silo.
Currently Selected:
MANE NI HAGAOTONGA 18: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific